Молитвы начальные ................................2
Молитвы утренние .................................3
Молитвы на сон грядущим ..........................13
Последование ко Святому Причащению ...............23
Молитвы по святом Причащении ....................43
Канон покаянный ко Господу нашему Иисусу Христу ...48
Канон умилительный с акафистом
ко Господу нашему Иисусу Христу ................54
Канон молебный ко Пресвятей Богородице ............69
Канон благодарный с акафистом
ко Пресвятей Богородице .........................77
Канон и акафист святителю и чудотворцу Николаю .....93
Канон Ангелу Хранителю ..........................110
Канон Честному и Животворящему Кресту...........116
Канон чтомый за болящего .........................124
Часы св. Пасхи ...................................131
Чин литии, совершаемой мирянином ................133
Чин литии, совершаемой мирянином
в пасхальный период ...........................136
Чин дванадесяти псалмов ..........................138
Правило от осквернения...........................150
Аще иерей: Благослове́н Бог наш:
Аще ли не иерей: Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды. Сла́ва, и ны́не :
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Таже: Го́споди, поми́луй, 12.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Воспрянув без лености, и истрезвився, востав от сна, рцы сие:
Во и́мя Отца́, и Сы́на, и Свята́го Ду́ха. Ами́нь.
Посем постой мало молча, дондеже утишатся вся чувствия: и тогда сотвори три поклоны, глаголя:
Го́споди Иису́се Христе́, Сы́не Бо́жий, поми́луй мя, гре́шнаго.
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный: Трисвятое и по О́тче наш:
Воста́вше от сна, припа́даем Ти, Бла́же, / и а́нгельскую песнь вопие́м Ти, Си́льне: / Свят, Свят, Свят еси́, Бо́же, / Богоро́дицею поми́луй нас.
Слава: От одра́ и сна воздви́гл мя еси́, Го́споди, / ум мой просвети́ и се́рдце, / и устне́ мои́ отве́рзи, / во е́же пе́ти Тя, Свята́я Тро́ице: / Свят, Свят, Свят еси́, Бо́же, / Богоро́дицею поми́луй нас.
И ныне: Внеза́пно Судия́ прии́дет, / и коего́ждо дея́ния обнажа́тся, / но стра́хом зове́м в полу́нощи: / Свят, Свят, Свят еси́, Бо́же, / Богоро́дицею поми́луй нас.
Го́споди, поми́луй, 12,
От сна воста́в, благодарю́ Тя, Свята́я Тро́ице, я́ко мно́гия ра́ди Твоея́ бла́гости и долготерпе́ния не прогне́вался еси́ на мя, лени́ваго и гре́шнаго, ниже́ погуби́л мя еси́ со беззако́ньми мои́ми; но человеколю́бствовал еси́ обы́чно и в неча́янии лежа́щаго воздви́гл мя еси́, во е́же у́треневати и славосло́вити держа́ву Твою́. И ны́не просвети́ мои́ о́чи мы́сленныя, отве́рзи моя́ уста́ поуча́тися словесе́м Твои́м, и разуме́ти за́поведи Твоя́, и твори́ти во́лю Твою́, и пе́ти Тя во испове́дании серде́чнем, и воспева́ти всесвято́е и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щего, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.
Бо́же, очи́сти мя гре́шнаго, я́ко николи́же сотвори́х благо́е пред Тобо́ю, но изба́ви мя от лука́ваго, и да бу́дет во мне во́ля Твоя́; да неосужде́нно отве́рзу уста́ моя́ недосто́йная и восхвалю́ и́мя Твое́ свято́е, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
От сна воста́в, полу́нощную песнь приношу́ Ти, Спа́се, и припа́дая вопию́ Ти: не даждь ми усну́ти во грехо́вней сме́рти, но уще́дри мя, распны́йся во́лею, и лежа́щаго мя в ле́ности ускори́в возста́ви, и спаси́ мя в предстоя́нии и моли́тве, и по сне нощне́м возсия́й ми день безгре́шен, Христе́ Бо́же, и спаси́ мя.
К Тебе́, Влады́ко Человеколю́бче, от сна воста́в прибега́ю, и на дела́ Твоя́ подвиза́юся милосе́рдием Твои́м, и молю́ся Тебе́: помози́ ми на вся́кое вре́мя, во вся́кой ве́щи, и изба́ви мя от вся́кия мирски́я злы́я ве́щи и диа́вольскаго поспеше́ния, и спаси́ мя, и введи́ в Ца́рство Твое́ ве́чное. Ты бо еси́ мой Сотвори́тель и вся́кому бла́гу Промы́сленник и Пода́тель, о Тебе́ же все упова́ние мое́, и Тебе́ сла́ву возсыла́ю, ны́не и при́сно и во ве́ки веко́в. Ами́нь.
Го́споди, И́же мно́гою Твое́ю бла́гостию и вели́кими щедро́тами Твои́ми дал еси́ мне, рабу́ Твоему́, мимоше́дшее вре́мя но́щи сея́ без напа́сти прейти́ от вся́каго зла проти́вна; Ты Сам, Влады́ко, вся́ческих Тво́рче, сподо́би мя и́стинным Твои́м све́том и просвеще́нным се́рдцем твори́ти во́лю Твою́, ны́не и при́сно и во ве́ки веко́в. Ами́нь.
Го́споди Вседержи́телю, Бо́же сил и вся́кия пло́ти, в вы́шних живы́й и на смире́нныя призира́яй, сердца́ же и утро́бы испыту́яй и сокрове́нная челове́ков я́ве предве́дый, Безнача́льный и Присносу́щный Све́те, у Него́ же несть премене́ния, или́ преложе́ния осене́ние; Сам, Безсме́ртный Царю́, приими́ моле́ния на́ша, я́же в настоя́щее вре́мя, на мно́жество Твои́х щедро́т дерза́юще, от скве́рных к Тебе́ усте́н твори́м, и оста́ви нам прегреше́ния на́ша, я́же де́лом, и сло́вом, и мы́слию, ве́дением, или́ неве́дением согреше́нная на́ми; и очи́сти ны от вся́кия скве́рны пло́ти и ду́ха. И да́руй нам бо́дренным се́рдцем и тре́звенною мы́слию всю настоя́щаго жития́ нощь прейти́, ожида́ющим прише́ствия све́тлаго и явле́ннаго дне Единоро́днаго Твоего́ Сы́на, Го́спода и Бо́га и Спа́са на́шего Иису́са Христа́, в о́ньже со сла́вою Судия́ всех прии́дет, кому́ждо отда́ти по дело́м его́; да не па́дше и облени́вшеся, но бо́дрствующе и воздви́жени в де́лание обря́щемся гото́ви, в ра́дость и Боже́ственный черто́г сла́вы Его́ совни́дем, иде́же пра́зднующих глас непреста́нный, и неизрече́нная сла́дость зря́щих Твоего́ лица́ добро́ту неизрече́нную. Ты бо еси́ и́стинный Свет, просвеща́яй и освяща́яй вся́ческая, и Тя пое́т вся тварь во ве́ки веко́в. Ами́нь.
Тя благослови́м, вы́шний Бо́же и Го́споди ми́лости, творя́щаго при́сно с на́ми вели́кая же и неизсле́дованная, сла́вная же и ужа́сная, и́хже несть числа́, пода́вшаго нам сон во упокое́ние не́мощи на́шея, и ослабле́ние трудо́в многотру́дныя пло́ти. Благодари́м Тя, я́кo не погуби́л еси́ нас со беззако́ньми на́шими, но человеколю́бствовал еси́ обы́чно, и в неча́янии лежа́щия ны воздви́гл еси́, во е́же славосло́вити держа́ву Твою́. Те́мже мо́лим безме́рную Твою́ бла́гость, просвети́ на́ша мы́сли, очеса́, и ум наш от тя́жкаго сна ле́ности возста́ви: отве́рзи на́ша уста́, и испо́лни я́ Твоего́ хвале́ния, я́ко да возмо́жем непоколе́блемо пе́ти же и испове́датися Тебе́, во всех, и от всех сла́вимому Бо́гу, Безнача́льному Отцу́, со Единоро́дным Твои́м Сы́ном, и Всесвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.
Воспева́ю благода́ть Твою́, Влады́чице, молю́ Тя, ум мой облагодати́. Ступа́ти пра́во мя наста́ви, путе́м Христо́вых за́поведей. Бде́ти к пе́сни укрепи́, уны́ния сон отгоня́ющи. Свя́зана плени́цами грехопаде́ний, мольба́ми Твои́ми разреши́, Богоневе́сто. В нощи́ мя и во дни сохраня́й, борю́щих враг избавля́ющи мя. Жизнода́теля Бо́га ро́ждшая, умерщвле́на мя страстьми́ оживи́. Я́же Свет невече́рний ро́ждшая, ду́шу мою́ осле́пшую просвети́. О ди́вная Влады́чня пала́то, дом Ду́ха Боже́ственна мене́ сотвори́. Врача́ ро́ждшая, уврачу́й души́ моея́ многоле́тныя стра́сти. Волну́ющася жите́йскою бу́рею, ко стези́ мя покая́ния напра́ви. Изба́ви мя огня́ ве́чнующаго, и че́рвия же зла́го, и та́ртара. Да мя не яви́ши бесо́м ра́дование, и́же мно́гим грехо́м пови́нника. Но́ва сотвори́ мя, обетша́вшаго нечу́вственными, Пренепоро́чная, согреше́нии. Стра́нна му́ки вся́кия покажи́ мя, и всех Влады́ку умоли́. Небе́сная ми улучи́ти весе́лия, со все́ми святы́ми, сподо́би. Пресвята́я Де́во, услы́ши глас непотре́бнаго раба́ Твоего́. Струю́ дава́й мне слеза́м, Пречи́стая, души́ моея́ скве́рну очища́ющи. Стена́ния от се́рдца приношу́ Ти непреста́нно, усе́рдствуй, Влады́чице. Моле́бную слу́жбу мою́ приими́, и Бо́гу благоутро́бному принеси́. Превы́шшая А́нгел, мирска́го мя превы́шша сли́тия сотвори́. Светоно́сная Се́не небе́сная, духо́вную благода́ть во мне напра́ви. Ру́це возде́ю и устне́ к похвале́нию, оскверне́ны скве́рною, Всенепоро́чная. Душетле́нных мя па́костей изба́ви, Христа́ приле́жно умоля́ющи; Ему́же честь и поклоне́ние подоба́ет, ны́не и при́сно и во ве́ки веко́в. Ами́нь.
Многоми́лостиве и Всеми́лостиве Бо́же мой, Го́споди Иису́се Христе́, мно́гия ра́ди любве́ сшел и воплоти́лся еси́, я́ко да спасе́ши всех. И па́ки, Спа́се, спаси́ мя по благода́ти, молю́ Тя; а́ще бо от дел спасе́ши мя, несть се благода́ть и дар, но долг па́че. Ей, мно́гий в щедро́тах и неизрече́нный в ми́лости! Ве́руяй бо в Мя, рекл еси́, о Христе́ мой, жив бу́дет и не у́зрит сме́рти во ве́ки. А́ще у́бо ве́ра, я́же в Тя, спаса́ет отча́янныя, се ве́рую, спаси́ мя, я́ко Бог мой еси́ Ты и Созда́тель. Ве́ра же вме́сто дел да вмени́тся мне, Бо́же мой, не обря́щеши бо дел отню́д оправда́ющих мя. Но та ве́ра моя́ да довле́ет вме́сто всех, та да отвеща́ет, та да оправди́т мя, та да пока́жет мя прича́стника сла́вы Твоея́ ве́чныя. Да не у́бо похи́тит мя сатана́, и похва́лится, Сло́ве, е́же отто́ргнути мя от Твоея́ руки́ и огра́ды; но или́ хощу́, спаси́ мя, или́ не хощу́, Христе́ Спа́се мой, предвари́ ско́ро, ско́ро погибо́х: Ты бо еси́ Бог мой от чре́ва ма́тере моея́. Сподо́би мя, Го́споди, ны́не возлюби́ти Тя, я́коже возлюби́х иногда́ той са́мый грех; и па́ки порабо́тати Тебе́ без ле́ности то́щно, я́коже порабо́тах пре́жде сатане́ льсти́вому. Наипа́че же порабо́таю Тебе́, Го́споду и Бо́гу моему́ Иису́су Христу́, во вся дни живота́ моего́, ны́не и при́сно и во ве́ки веко́в. Ами́нь.
Святы́й А́нгеле, предстоя́й окая́нней мое́й души́ и стра́стней мое́й жи́зни, не оста́ви мене́ гре́шнаго, ниже́ отступи́ от мене́ за невоздержа́ние мое́. Не даждь ме́ста лука́вому де́мону облада́ти мно́ю, наси́льством сме́ртнаго сего́ телесе́; укрепи́ бе́дствующую и худу́ю мою́ ру́ку и наста́ви мя на путь спасе́ния. Ей, святы́й А́нгеле Бо́жий, храни́телю и покрови́телю окая́нныя моея́ души́ и те́ла, вся мне прости́, ели́кими тя оскорби́х во вся дни живота́ моего́, и а́ще что согреши́х в преше́дшую нощь сию́, покры́й мя в настоя́щий день, и сохрани́ мя от вся́каго искуше́ния проти́внаго, да ни в ко́ем гресе́ прогне́ваю Бо́га, и моли́ся за мя ко Го́споду, да утверди́т мя в стра́се Свое́м, и досто́йна пока́жет мя раба́ Своея́ бла́гости. Ами́нь.
Пресвята́я Влады́чице моя́ Богоро́дице, святы́ми Твои́ми и всеси́льными мольба́ми отжени́ от мене́, смире́ннаго и окая́ннаго раба́ Твоего́, уны́ние, забве́ние, неразу́мие, нераде́ние, и вся скве́рная, лука́вая и ху́льная помышле́ния от окая́ннаго моего́ се́рдца и от помраче́ннаго ума́ моего́; и погаси́ пла́мень страсте́й мои́х, я́ко нищ есмь и окая́нен. И изба́ви мя от мно́гих и лю́тых воспомина́ний и предприя́тий, и от всех действ злых свободи́ мя. Я́ко благослове́на еси́ от всех родо́в, и сла́вится пречестно́е и́мя Твое́ во ве́ки веко́в. Ами́нь.
Моли́ Бо́га о мне, святы́й уго́дниче Бо́жий (имярек), я́ко аз усе́рдно к тебе́ прибега́ю, ско́рому помо́щнику и моли́твеннику о душе́ мое́й.
Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших.
Спаси́, Го́споди, лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.
Спаси́, Го́споди, и поми́луй рабо́в Твои́х: отца́ моего́ духо́внаго (имярек), роди́телей мои́х (имярек), сро́дников (имярек), нача́льников, наста́вников, благоде́телей (имярек) и всех правосла́вных христиа́н.
Упоко́й, Го́споди, ду́ши усо́пших раб Твои́х: роди́телей мои́х, сро́дников, благоде́телей (имярек), и всех правосла́вных христиа́н, и прости́ им вся согреше́ния во́льная и нево́льная, и да́руй им Ца́рствие Небе́сное.
Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
Благослови. И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, спаси́ мя, гре́шнаго.
Помяни́, Го́споди Иису́се Христе́, Бо́же наш, ми́лости и щедро́ты Твоя́ от ве́ка су́щия, и́хже ра́ди и вочелове́чился еси́, и распя́тие и смерть, спасе́ния ра́ди пра́во в Тя ве́рующих, претерпе́ти изво́лил еси́; и воскре́с из ме́ртвых, возне́слся еси́ на Небеса́ и седи́ши одесну́ю Бо́га Отца́, и призира́еши на смире́нныя мольбы́ всем се́рдцем призыва́ющих Тя. Приклони́ у́хо Твое́, и услы́ши смире́нное моле́ние мене́, непотре́бнаго раба́ Твоего́, в воню́ благоуха́ния духо́внаго, Тебе́ за вся лю́ди Твоя́ принося́щаго. И в пе́рвых помяни́ Це́рковь Твою́ Святу́ю, Собо́рную и Апо́стольскую, ю́же снабде́л еси́ честно́ю Твое́ю Кро́вию, и утверди́, и укрепи́, и разшири́, умно́жи, умири́, и непребори́му а́довыми враты́ во ве́ки сохрани́; раздира́ния Церкве́й утиши́, шата́ния язы́ческая угаси́, и ересе́й воста́ния ско́ро разори́ и искорени́, и в ничто́же си́лою Свята́го Твоего́ Ду́ха обрати́.
Спаси́, Го́споди, и поми́луй богохрани́мую страну́ на́шу, вла́сти и во́инство ея́, да ти́хое и безмо́лвное житие́ поживе́м во правове́рии, и во вся́ком благоче́стии и чистоте́.
Спаси́, Го́споди, и поми́луй Вели́каго Господи́на и Отца́ на́шего Святе́йшего Патриа́рха Алекси́я, и святе́йшия вселе́нския патриа́рхи, преосвяще́нныя митрополи́ты, архиепи́скопы и епи́скопы правосла́вныя, иере́и же и диа́коны, и весь при́чет церко́вный, я́же поста́вил еси́ пасти́ слове́сное Твое́ ста́до, и моли́твами их поми́луй и спаси́ мя гре́шнаго.
Спаси́, Го́споди, и поми́луй отца́ моего́ духо́внаго (имярек), и святы́ми его́ моли́твами прости́ моя́ согреше́ния.
Спаси́, Го́споди, и поми́луй роди́тели моя́ (имярек), бра́тию и сестры́, и сро́дники моя́ по пло́ти, и вся бли́жния ро́да моего́, и дру́ги, и да́руй им ми́рная Твоя́ и преми́рная блага́я.
Спаси́, Го́споди, и поми́луй ста́рцы и ю́ныя, ни́щия и сироты́ и вдови́цы, и су́щия в боле́зни и в печа́лех, беда́х же и ско́рбех, обстоя́ниих и плене́ниих, темни́цах же и заточе́ниих, изря́днее же в гоне́ниих, Тебе́ ра́ди и ве́ры правосла́вныя, от язы́к безбо́жных, от отсту́пник и от еретико́в, су́щия рабы́ Твоя́, и помяни́ я́, посети́, укрепи́, уте́ши, и вско́ре си́лою Твое́ю осла́бу, свобо́ду и изба́ву им пода́ждь.
Спаси́, Го́споди, и поми́луй по́сланныя в слу́жбу, путеше́ствующия, отцы́ и бра́тию на́шу, и вся правосла́вныя христиа́ны.
Спаси́, Го́споди, и поми́луй и́хже аз безу́мием мои́м соблазни́х, и от пути́ спаси́тельнаго отврати́х, к дело́м злым и неподо́бным приведо́х; Боже́ственным Твои́м Про́мыслом к пути́ спасе́ния па́ки возврати́.
Спаси́, Го́споди, и поми́луй ненави́дящия и оби́дящия мя, и творя́щия ми напа́сти, и не оста́ви их поги́бнути мене́ ра́ди, гре́шнаго.
Отступи́вшия от правосла́вныя ве́ры и поги́бельными ересьми́ ослепле́нныя, све́том Твоего́ позна́ния просвети́ и Святе́й Твое́й Апо́стольстей Собо́рней Це́ркви причти́.
Помяни́, Го́споди, от жития́ сего́ отше́дшия правове́рныя цари́ и цари́цы, благове́рныя кня́зи и княги́ни, святе́йшия патриа́рхи, преосвяще́нныя митрополи́ты, архиепи́скопы и епи́скопы правосла́вныя, во иере́йстем же и в при́чте церко́внем, и мона́шестем чи́не Тебе́ послужи́вшия, и в ве́чных Твои́х селе́ниих со святы́ми упоко́й.
Помяни́, Го́споди, ду́ши усо́пших раб Твои́х, роди́телей мои́х, (имярек), и всех сро́дников по пло́ти; и прости́ их вся согреше́ния во́льная и нево́льная, да́руя им Ца́рствие и прича́стие ве́чных Твои́х благи́х и Твоея́ безконе́чныя и блаже́нныя жи́зни наслажде́ние.
Помяни́, Го́споди, и вся в наде́жди воскресе́ния и жи́зни ве́чныя усо́пшия, отцы́ и бра́тию на́шу, и сестры́, и зде лежа́щия и повсю́ду, правосла́вныя христиа́ны, и со святы́ми Твои́ми, иде́же присеща́ет свет лица́ Твоего́, всели́, и нас поми́луй, я́ко Благ и Человеколю́бец. Ами́нь.
Пода́ждь, Го́споди, оставле́ние грехо́в всем пре́жде отше́дшим в ве́ре и наде́жди воскресе́ния, отце́м, бра́тиям и се́страм на́шим и сотвори́ им ве́чную па́мять. Трижды.
Аще иерей, глаголет: Благослове́н Бог наш:
Аще ли не иерей: Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Царю́ Небе́сный: Трисвятое: О́тче наш:
Поми́луй нас, Го́споди, поми́луй нас; / вся́каго бо отве́та недоуме́юще, / сию́ Ти моли́тву я́ко Влады́це, гре́шнии прино́сим: / поми́луй нас.
Слава: Го́споди, поми́луй нас, / на Тя бо упова́хом; / не прогне́вайся на ны зело́, / ниже́ помяни́ беззако́ний на́ших, / но при́зри и ны́не я́ко благоутро́бен, и изба́ви ны от враг на́ших; / Ты бо еси́ Бог наш, и мы лю́дие Твои́, / вси дела́ руку́ Твое́ю, и и́мя Твое́ призыва́ем.
И ныне: Милосе́рдия две́ри отве́рзи нам, / благослове́нная Богоро́дице, / наде́ющиися на Тя да не поги́бнем, / но да изба́вимся Тобо́ю от бед: / Ты бо еси́ спасе́ние ро́да христиа́нскаго.
Таже: Го́споди, поми́луй, 12.
Бо́же ве́чный и Царю́ вся́каго созда́ния, сподо́бивый мя да́же в час сей доспе́ти, прости́ ми грехи́, я́же сотвори́х в сей день де́лом, сло́вом и помышле́нием, и очи́сти, Го́споди, смире́нную мою́ ду́шу от вся́кия скве́рны пло́ти и ду́ха. И даждь ми, Го́споди, в нощи́ сей сон прейти́ в ми́ре, да воста́в от смире́ннаго ми ло́жа, благоугожду́ пресвято́му и́мени Твоему́, во вся дни живота́ моего́, и поперу́ борю́щия мя враги́ плотски́я и безпло́тныя. И изба́ви мя, Го́споди, от помышле́ний су́етных, оскверня́ющих мя, и по́хотей лука́вых. Я́ко Твое́ есть ца́рство, и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Вседержи́телю, Сло́во О́тчее, Сам соверше́н сый, Иису́се Христе́, мно́гаго ра́ди милосе́рдия Твоего́ никогда́же отлуча́йся мене́, раба́ Твоего́, но всегда́ во мне почива́й. Иису́се, до́брый Па́стырю Твои́х ове́ц, не преда́ждь мене́ крамоле́ змии́не, и жела́нию сатанину́ не оста́ви мене́, я́ко се́мя тли во мне есть. Ты у́бо, Го́споди Бо́же покланя́емый, Царю́ Святы́й, Иису́се Христе́, спя́ща мя сохрани́ немерца́ющим све́том, Ду́хом Твои́м Святы́м, И́мже освяти́л еси́ Твоя́ ученики́. Даждь, Го́споди, и мне, недосто́йному рабу́ Твоему́, спасе́ние Твое́ на ло́жи мое́м: просвети́ ум мой све́том ра́зума свята́го Ева́нгелия Твоего́, ду́шу любо́вию Креста́ Твоего́, се́рдце чистото́ю словесе́ Твоего́, те́ло мое́ Твое́ю стра́стию безстра́стною, мысль мою́ Твои́м смире́нием сохрани́, и воздви́гни мя во вре́мя подо́бно на Твое́ славосло́вие. Я́ко препросла́влен еси́ со Безнача́льным Твои́м Отце́м и с Пресвяты́м Ду́хом во ве́ки. Ами́нь.
Го́споди, Царю́ Небе́сный, Уте́шителю, Ду́ше и́стины, умилосе́рдися и поми́луй мя гре́шнаго раба́ Твоего́, и отпусти́ ми недосто́йному, и прости́ вся, ели́ка Ти согреши́х днесь я́ко челове́к, па́че же и не я́ко челове́к, но и горе́е скота́, во́льныя моя́ грехи́ и нево́льныя, ве́домыя и неве́домыя: я́же от ю́ности и от нау́ки злы, и я́же суть от на́гльства и уны́ния. А́ще и́менем Твои́м кля́хся, или́ поху́лих е́ в помышле́нии мое́м; или́ кого́ укори́х; или́ оклевета́х кого́ гне́вом мои́м, или́ опеча́лих, или́ о чем прогне́вахся; или́ солга́х, или́ безго́дно спах, или́ нищ прии́де ко мне, и презре́х его; или́ бра́та моего́ опеча́лих, или́ сва́дих, или́ кого́ осуди́х; или́ развелича́хся, или́ разгорде́хся, или́ разгне́вахся; или́ стоя́щу ми на моли́тве, ум мой о лука́вствии ми́ра сего́ подви́жеся, или́ развраще́ние помы́слих; или́ объядо́хся, или́ опи́хся, или́ без ума́ смея́хся; или́ лука́вое помы́слих, или́ добро́ту чужду́ю ви́дев, и тою́ уя́звен бых се́рдцем; или́ неподо́бная глаго́лах, или́ греху́ бра́та моего́ посмея́хся, моя́ же суть безчи́сленная согреше́ния; или́ о моли́тве не ради́х, или́ и́но что соде́ях лука́вое, не по́мню, та бо вся и бо́льша сих соде́ях. Поми́луй мя, Тво́рче мой Влады́ко, уны́лаго и недосто́йнаго раба́ Твоего́, и оста́ви ми, и отпусти́, и прости́ мя, я́ко Благ и Человеколю́бец, да с ми́ром ля́гу, усну́ и почи́ю, блу́дный, гре́шный и окая́нный аз, и поклоню́ся, и воспою́, и просла́влю пречестно́е и́мя Твое́, со Отце́м, и Единоро́дным Его́ Сы́ном, ны́не и при́сно и во ве́ки. Ами́нь.
Что́ Ти принесу́, или что́ Ти возда́м, великодарови́тый Безсме́ртный Царю́, ще́дре и Человеколю́бче Го́споди, я́ко леня́щася мене́ на Твое́ угожде́ние, и ничто́же бла́го сотво́рша, приве́л еси́ на коне́ц мимоше́дшаго дне сего́, обраще́ние и спасе́ние души́ мое́й стро́я? Ми́лостив ми бу́ди гре́шному и обнаже́нному вся́каго де́ла бла́га, возста́ви па́дшую мою́ ду́шу, оскверни́вшуюся в безме́рных согреше́ниих, и отыми́ от мене́ весь по́мысл лука́вый ви́димаго сего́ жития́. Прости́ моя́ согреше́ния, еди́не Безгре́шне, я́же Ти согреши́х в сей день, ве́дением и неве́дением, сло́вом, и де́лом, и помышле́нием, и все́ми мои́ми чу́вствы. Ты Сам, покрыва́я, сохра́ни мя от вся́каго сопроти́внаго обстоя́ния Боже́ственною Твое́ю вла́стию, и неизрече́нным человеколю́бием, и си́лою. Очи́сти, Бо́же, очи́сти мно́жество грехо́в мои́х. Благоволи́, Го́споди, изба́вити мя от се́ти лука́ваго, и спаси́ стра́стную мою́ ду́шу, и осени́ мя све́том лица́ Твоего́, егда́ прии́деши во сла́ве, и неосужде́нна ны́не сном усну́ти сотвори́, и без мечта́ния, и несмуще́н по́мысл раба́ Твоего́ соблюди́, и всю сатанину́ де́тель отжени́ от мене́, и просвети́ ми разу́мныя о́чи серде́чныя, да не усну́ в смерть. И посли́ ми А́нгела ми́рна, храни́теля и наста́вника души́ и те́лу моему́, да изба́вит мя от враг мои́х; да воста́в со одра́ моего́, принесу́ Ти благода́рственныя мольбы́. Ей, Го́споди, услы́ши мя гре́шнаго и убо́гаго раба́ Твоего́, изволе́нием и со́вестию; да́руй ми воста́вшу словесе́м Твои́м поучи́тися, и уны́ние бесо́вское дале́че от мене́ отгна́но бы́ти сотвори́ Твои́ми А́нгелы; да благословлю́ и́мя Твое́ свято́е, и просла́влю, и сла́влю Пречи́стую Богоро́дицу Мари́ю, Ю́же дал еси́ нам гре́шным заступле́ние, и приими́ Сию́ моля́щуюся за ны; вем бо, я́ко подража́ет Твое́ человеколю́бие, и моля́щися не престае́т. Тоя́ заступле́нием, и Честна́го Креста́ зна́мением, и всех святы́х Твои́х ра́ди, убо́гую ду́шу мою́ соблюди́, Иису́се Христе́ Бо́же наш, я́ко Свят еси́, и препросла́влен во ве́ки. Ами́нь.
Го́споди Бо́же наш, е́же согреши́х во дни сем сло́вом, де́лом и помышле́нием, я́ко Благ и Человеколю́бец прости́ ми. Ми́рен сон и безмяте́жен да́руй ми. А́нгела Твоего́ храни́теля посли́, покрыва́юща и соблюда́юща мя от вся́каго зла, я́ко Ты еси́ храни́тель душа́м и телесе́м на́шим, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
Го́споди Бо́же наш, в Него́же ве́ровахом, и Его́же и́мя па́че вся́каго и́мене призыва́ем, даждь нам, ко сну отходя́щим, осла́бу души́ и те́лу, и соблюди́ нас от вся́каго мечта́ния, и те́мныя сла́сти кроме́; уста́ви стремле́ние страсте́й, угаси́ разжже́ния воста́ния теле́снаго. Даждь нам целому́дренне пожи́ти де́лы и словесы́; да доброде́тельное жи́тельство восприе́млюще, обетова́нных не отпаде́м благи́х Твои́х, я́ко благослове́н еси́ во ве́ки. Ами́нь.
Го́споди, не лиши́ мене́ небе́сных Твои́х благ. Го́споди, изба́ви мя ве́чных мук. Го́споди, умо́м ли или́ помышле́нием, сло́вом или́ де́лом согреши́х, прости́ мя. Го́споди, изба́ви мя вся́каго неве́дения и забве́ния, и малоду́шия, и окамене́ннаго нечу́вствия. Го́споди, изба́ви мя от вся́каго искуше́ния. Го́споди, просвети́ мое́ се́рдце, е́же помрачи́ лука́вое похоте́ние. Го́споди, аз я́ко челове́к согреши́х, Ты же я́ко Бог щедр, поми́луй мя, ви́дя не́мощь души́ моея́. Го́споди, посли́ благода́ть Твою́ в по́мощь мне, да просла́влю и́мя Твое́ свято́е. Го́споди Иису́се Христе́, напиши́ мя раба́ Твоего́ в кни́зе живо́тней и да́руй ми коне́ц благи́й. Го́споди, Бо́же мой, а́ще и ничто́же бла́го сотвори́х пред Тобо́ю, но даждь ми по благода́ти Твое́й положи́ти нача́ло благо́е. Го́споди, окропи́ в се́рдце мое́м ро́су благода́ти Твоея́. Го́споди небесе́ и земли́, помяни́ мя гре́шнаго раба́ Твоего́, сту́днаго и нечи́стаго, во Ца́рствии Твое́м. Ами́нь.
Го́споди, в покая́нии приими́ мя. Го́споди, не оста́ви мене́. Го́споди, не введи́ мене́ в напа́сть. Го́споди, даждь ми мысль бла́гу. Го́споди, даждь ми сле́зы и па́мять сме́ртную, и умиле́ние. Го́споди, даждь ми по́мысл испове́дания грехо́в мои́х. Го́споди, даждь ми смире́ние, целому́дрие и послуша́ние. Го́споди, даждь ми терпе́ние, великоду́шие и кро́тость. Го́споди, всели́ в мя ко́рень благи́х, страх Твой в се́рдце мое́. Го́споди, сподо́би мя люби́ти Тя от всея́ души́ моея́ и помышле́ния и твори́ти во всем во́лю Твою́. Го́споди, покры́й мя от челове́к не́которых, и бесо́в, и страсте́й, и от вся́кия ины́я неподо́бныя ве́щи. Го́споди, ве́си, я́ко твори́ши, я́коже Ты во́лиши, да бу́дет во́ля Твоя́ и во мне гре́шнем, я́ко благослове́н еси́ во ве́ки. Ами́нь.
Го́споди Иису́се Христе́, Сы́не Бо́жий, ра́ди честне́йшия Ма́тере Твоея́, и безпло́тных Твои́х А́нгел, Проро́ка же и Предте́чи и Крести́теля Твоего́, богоглаго́ливых же апо́стол, све́тлых и добропобе́дных му́ченик, преподо́бных и богоно́сных оте́ц, и всех святы́х моли́твами, изба́ви мя настоя́щаго обстоя́ния бесо́вскаго. Ей, Го́споди мой и Тво́рче, не хотя́й сме́рти гре́шнаго, но я́коже обрати́тися и жи́ву бы́ти ему́, даждь и мне обраще́ние окая́нному и недосто́йному; изми́ мя от уст па́губнаго зми́я, зия́ющаго пожре́ти мя и свести́ во ад жи́ва. Ей, Го́споди мой, утеше́ние мое́, И́же мене́ ра́ди окая́ннаго в тле́нную плоть оболки́йся, исто́ргни мя от окая́нства, и утеше́ние пода́ждь души́ мое́й окая́нней. Всади́ в се́рдце мое́ твори́ти Твоя́ повеле́ния, и оста́вити лука́вая дея́ния, и полу́чити блаже́нства Твоя́: на Тя бо, Го́споди, упова́х, спа́си мя.
К Тебе́ Пречи́стей Бо́жией Ма́тери аз окая́нный припа́дая молю́ся: ве́си, Цари́це, я́ко безпреста́ни согреша́ю и прогневля́ю Сы́на Твоего́ и Бо́га моего́, и мно́гажды а́ще ка́юся, лож пред Бо́гом обрета́юся, и ка́юся трепе́ща: неуже́ли Госпо́дь порази́т мя, и по часе́ па́ки та́яжде творю́; ве́дущи сия́, Влады́чице моя́ Госпоже́ Богоро́дице, молю́, да поми́луеши, да укрепи́ши, и блага́я твори́ти да пода́си ми. Ве́си бо, Влады́чице моя́ Богоро́дице, я́ко отню́д и́мам в не́нависти зла́я мо́я дела́, и все́ю мы́слию люблю́ зако́н Бо́га моего́; но не вем, Госпоже́ Пречи́стая, отку́ду я́же ненави́жду, та и люблю́, а блага́я преступа́ю. Не попуща́й, Пречи́стая, во́ли мое́й соверша́тися, не уго́дна бо есть, но да бу́дет во́ля Сы́на Твоего́ и Бо́га моего́: да мя спасе́т, и вразуми́т, и пода́ст благода́ть Свята́го Ду́ха, да бых аз отсе́ле преста́л скверноде́йства, и про́чее пожи́л бых в повеле́нии Сы́на Твоего́, Ему́же подоба́ет вся́кая сла́ва, честь и держа́ва, со Безнача́льным Его́ Отце́м, и Пресвяты́м и Благи́м и Животворя́щим Его Ду́хом, ны́не и при́сно, и во ве́ки веко́в. Ами́нь.
Блага́го Царя́ блага́я Ма́ти, Пречи́стая и Благослове́нная Богоро́дице Мари́е, ми́лость Сы́на Твоего́ и Бо́га на́шего изле́й на стра́стную мою́ ду́шу и Твои́ми моли́твами наста́ви мя на дея́ния блага́я, да про́чее вре́мя живота́ моего́ без поро́ка прейду́ и Тобо́ю рай да обря́щу, Богоро́дице Де́во, еди́на Чи́стая и Благослове́нная.
А́нгеле Христо́в, храни́телю мой святы́й и покрови́телю души́ и те́ла моего́, вся ми прости́, ели́ка согреши́х во дне́шний день, и от вся́каго лука́вствия проти́внаго ми врага́ изба́ви мя, да ни в ко́емже гресе́ прогне́ваю Бо́га моего́; но моли́ за мя гре́шнаго и недосто́йнаго раба́, я́ко да досто́йна мя пока́жеши бла́гости и ми́лости Всесвяты́я Тро́ицы и Ма́тере Го́спода моего́ Иису́са Христа́ и всех святы́х. Ами́нь.
Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти раби́ Твои́, Богоро́дице, / но я́ко иму́щая держа́ву непобеди́мую, / от вся́ких нас бед свободи́, да зове́м Ти; / ра́дуйся, Неве́сто Неневе́стная.
Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́ши на́ша.
Все упова́ние мое́ на Тя возлага́ю, Ма́ти Бо́жия, сохрани́ мя под кро́вом Твои́м.
Богоро́дице Де́во, не пре́зри мене́, гре́шнаго, тре́бующа Твоея́ по́мощи и Твоего́ заступле́ния, на Тя бо упова́ душа́ моя́, и поми́луй мя.
Упова́ние мое́ Оте́ц, прибе́жище мое́ Сын, покро́в мой Дух Святы́й: Тро́ице Свята́я, сла́ва Тебе́.
Таже: Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Сла́ва, и ны́не: Го́споди, поми́луй, трижды. Господи, благослови, и отпуст:
Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, спаси́ мя, гре́шнаго.
Осла́би, оста́ви, прости́, Бо́же, прегреше́ния на́ша, во́льная и нево́льная, я́же в сло́ве и в де́ле, я́же в ве́дении и не в ве́дении, я́же во дни и в нощи́, я́же во уме́ и в помышле́нии: вся нам прости́, я́ко Благ и Человеколю́бец.
Ненави́дящих и оби́дящих нас прости́, Го́споди Человеколю́бче. Благотворя́щим благосотвори́. Бра́тиям и сро́дником на́шим да́руй я́же ко спасе́нию проше́ния и жизнь ве́чную. В не́мощех су́щия посети́ и исцеле́ние да́руй. И́же на мо́ри упра́ви. Путеше́ствующим спутеше́ствуй. Служа́щим и ми́лующим нас грехо́в оставле́ние да́руй. Запове́давших нам недосто́йным моли́тися о них поми́луй по вели́цей Твое́й ми́лости. Помяни́, Го́споди, пре́жде усо́пших оте́ц и бра́тий на́ших и упоко́й их, иде́же присеща́ет свет лица́ Твоего́. Помяни́, Го́споди, бра́тий на́ших плене́нных и изба́ви я́ от вся́каго обстоя́ния. Помяни́, Го́споди, плодонося́щих и доброде́лающих во святы́х Твои́х це́рквах, и даждь им я́же ко спасе́нию проше́ния и жизнь ве́чную. Помяни́, Го́споди, и нас, смире́нных и гре́шных и недосто́йных раб Твои́х, и просвети́ наш ум све́том ра́зума Твоего́, и наста́ви нас на стезю́ за́поведей Твои́х, моли́твами Пречи́стыя Влады́чицы на́шея Богоро́дицы и Присноде́вы Мари́и и всех Твои́х святы́х: я́ко благослове́н еси́ во ве́ки веко́в. Ами́нь.
Испове́даю Тебе́ Го́споду Бо́гу моему́ и Творцу́, во Святе́й Тро́ице Еди́ному, сла́вимому и покланя́емому, Отцу́ и Сы́ну и Свято́му Ду́ху, вся моя́ грехи́, я́же соде́ях во вся дни живота́ моего́, и на вся́кий час, и в настоя́щее вре́мя, и в преше́дшия дни и но́щи, де́лом, сло́вом, помышле́нием, объяде́нием, пия́нством, тайнояде́нием, праздносло́вием, уны́нием, ле́ностию, прекосло́вием, непослуша́нием, оклевета́нием, осужде́нием, небреже́нием, самолю́бием, многостяжа́нием, хище́нием, неправдоглаго́ланием, скверноприбы́тчеством, мшелои́мством, ревнова́нием, за́вистию, гне́вом, памятозло́бием, не́навистию, лихои́мством и все́ми мои́ми чу́вствы: зре́нием, слу́хом, обоня́нием, вку́сом, осяза́нием и про́чими мои́ми грехи́, душе́вными вку́пе и теле́сными, и́миже Тебе́ Бо́га моего́ и Творца́ прогне́вах, и бли́жняго моего́ онепра́вдовах: о сих жале́я, ви́нна себе́ Тебе́ Бо́гу моему́ представля́ю, и име́ю во́лю ка́ятися: то́чию, Го́споди Бо́же мой, помози́ ми, со слеза́ми смире́нно молю́ Тя: преше́дшая же согреше́ния моя́ милосе́рдием Твои́м прости́ ми, и разреши́ от всех сих, я́же изглаго́лах пред Тобо́ю, я́ко Благ и Человеколю́бец.
Влады́ко Человеколю́бче, неуже́ли мне одр сей гроб бу́дет, или́ еще́ окая́нную мою́ ду́шу просвети́ши днем? Се ми гроб предлежи́т, се ми смерть предстои́т. Суда́ Твоего́, Го́споди, бою́ся и му́ки безконе́чныя, зло́е же творя́ не престаю́: Тебе́ Го́спода Бо́га моего́ всегда́ прогневля́ю, и Пречи́стую Твою́ Ма́терь, и вся Небе́сныя си́лы, и свята́го А́нгела храни́теля моего́. Вем убо, Го́споди, я́ко недосто́ин есмь человеколю́бия Твоего́, но досто́ин есмь вся́каго осужде́ния и му́ки. Но, Го́споди, или́ хощу́, или́ не хощу́, спаси́ мя. А́ще бо пра́ведника спасе́ши, ничто́же ве́лие; и а́ще чи́стаго поми́луеши, ничто́же ди́вно: досто́йни бо суть ми́лости Твоея́. Но на мне гре́шнем удиви́ ми́лость Твою́: о сем яви́ человеколю́бие Твое́, да не одоле́ет моя́ зло́ба Твое́й неизглаго́ланней бла́гости и милосе́рдию: и я́коже хо́щеши, устро́й о мне вещь.
Просвети́ о́чи мои́, Христе́ Бо́же, / да не когда́ усну́ в смерть, / да не когда́ рече́т враг мой: / укрепи́хся на него́.
Слава: Засту́пник души́ моея́ бу́ди, Бо́же, / я́ко посреде́ хожду́ сете́й мно́гих; / изба́ви мя от них / и спаси́ мя, Бла́же, яко Человеколю́бец.
И ныне, Богородичен: Пресла́вную Бо́жию Ма́терь, и святы́х А́нгел Святе́йшую, / немо́лчно воспои́м се́рдцем и усты́, / Богоро́дицу сию́ испове́дающе, / я́ко вои́стинну ро́ждшую нам Бо́га воплоще́нна, / и моля́щуюся непреста́нно о душа́х на́ших.
Таже целуй крест твой, и прекрести крестом место твое от главы до ног, такожде и от всех стран, глаголя:
Да воскре́снет Бог, и расточа́тся врази́ Его́, и да бежа́т от лица́ Его́ ненави́дящии Его́. Я́ко исчеза́ет дым, да исче́знут; я́ко та́ет воск от лица́ огня́, та́ко да поги́бнут бе́си от лица́ лю́бящих Бо́га и зна́менующихся кре́стным зна́мением, и в весе́лии глаго́лющих: ра́дуйся, Пречестны́й и Животворя́щий Кре́сте Госпо́день, прогоня́яй бе́сы си́лою на тебе́ пропя́таго Го́спода на́шего Иису́са Христа́, во ад сше́дшаго и попра́вшего си́лу диа́волю, и дарова́вшаго нам тебе́ Крест Свой Честны́й на прогна́ние вся́каго супоста́та. О, Пречестны́й и Животворя́щий Кре́сте Госпо́день! Помога́й ми со Свято́ю Госпоже́ю Де́вою Богоро́дицею и со все́ми святы́ми во ве́ки. Ами́нь.
Огради́ мя, Го́споди, си́лою Честна́го и Животворя́щаго Твоего́ Креста́, и сохрани́ мя от вся́каго зла.
В ру́це Твои́, Го́споди Иису́се Христе́, Бо́же мой, предаю́ дух мой: Ты же мя благослови́, Ты мя поми́луй и живо́т ве́чный да́руй ми. Ами́нь.
Аще иерей: Благословен Бог наш:
Аще же несвященный: Моли́твами свя́тых оте́ц на́ших, Го́споди Иису́се Христе́ Бо́же наш, поми́луй нас. Ами́нь.
Царю Небесный: Трисвятое. Пресвятая Троице: Слава, и ныне: Отче наш: Го́споди, поми́луй, 12. Слава, и ныне: Приидите, поклонимся: трижды.
Госпо́дь пасе́т мя, и ничто́же мя лиши́т. На ме́сте зла́чне, та́мо всели́ мя: на воде́ поко́йне воспита́ мя. Ду́шу мою́ обрати́, наста́ви мя на стези́ пра́вды, и́мене ра́ди Своего́. А́ще бо и пойду́ посреде́ се́ни сме́ртныя, не убою́ся зла, я́ко Ты со мно́ю еси́: жезл Твой и па́лица Твоя́, та мя уте́шиста. Угото́вал еси́ предо мно́ю трапе́зу, сопроти́в стужа́ющим мне: ума́стил еси́ еле́ом главу́ мою́, и ча́ша Твоя́ упоява́ющи мя я́ко держа́вна. И ми́лость Твоя́ пожене́т мя вся дни живота́ моего́, и е́же всели́ти ми ся в дом Госпо́день, в долготу́ дний.
Госпо́дня земля́, и исполне́ние ея́, вселе́нная, и вси живу́щии на ней. Той на моря́х основа́л ю́ есть, и на река́х угото́вал ю́ есть. Кто взы́дет на го́ру Госпо́дню; или́ кто ста́нет на ме́сте святе́м Его́; Непови́нен рука́ма, и чист се́рдцем, и́же не прия́т всу́е ду́шу свою́, и не кля́тся ле́стию и́скреннему своему́. Сей прии́мет благослове́ние от Го́спода, и ми́лостыню от Бо́га Спа́са своего́. Сей род и́щущих Го́спода, и́щущих лице́ Бо́га Иа́ковля. Возми́те врата́ кня́зи ва́ша, и возми́теся врата́ ве́чная: и вни́дет Царь сла́вы. Кто есть сей Царь сла́вы; Госпо́дь кре́пок и си́лен, Госпо́дь си́лен в бра́ни. Возми́те врата́ кня́зи ва́ша, и возми́теся врата́ ве́чная: и вни́дет Царь сла́вы. Кто есть сей Царь сла́вы; Госпо́дь сил, Той есть Царь сла́вы.
Ве́ровах, те́мже возглаго́лах: аз же смири́хся зело́. Аз же рех во изступле́нии мое́м: всяк челове́к ложь. Что возда́м Го́сподеви о всех, я́же воздаде́ ми? Ча́шу спасе́ния прииму́, и и́мя Госпо́дне призову́: моли́твы моя́ Го́сподеви возда́м пред все́ми людьми́ Его́. Честна́ пред Го́сподем смерть преподо́бных Его́. О Го́споди, аз раб Твой, аз раб Твой, и сын рабы́ни Твоея́: растерза́л еси́ у́зы моя́. Тебе́ пожру́ же́ртву хвалы́, и во и́мя Госпо́дне призову́. Моли́твы моя́ Го́сподеви возда́м пред все́ми людьми́ Его́. Во дво́рех до́му Госпо́дня, посреде́ Тебе́, Иерусали́ме.
Сла́ва, и ны́не: Аллилу́ия, трижды. Поклоны три.
Беззако́ния моя́ пре́зри, Го́споди, от Де́вы рожде́йся, / и се́рдце мое́ очи́сти, храм то творя́ Пречи́стому Твоему́ Те́лу и Кро́ви, / ниже́ отри́ни мене́ от Твоего́ лица́, / без числа́ име́яй ве́лию ми́лость.
Слава: Во прича́стие святы́нь Твои́х ка́ко дерзну́ недосто́йный? / А́ще бо дерзну́ к Тебе́ приступи́ти с досто́йными, / хито́н мя облича́ет, я́ко несть вече́рний, / и осужде́ние исхода́тайствую многогре́шной души́ мое́й. / Очи́сти, Го́споди, скве́рну души́ моея́, / и спаси́ мя, я́ко Человеколю́бец.
И ныне: Мно́гая мно́жества мои́х, Богоро́дице, прегреше́ний, / к Тебе́ прибего́х, Чи́стая, спасе́ния тре́буя: / посети́ немощству́ющую мою́ ду́шу, / и моли́ Сы́на Твоего́ и Бо́га на́шего, / да́ти ми оставле́ние, я́же соде́ях лю́тых, / Еди́на Благослове́нная.
Во святую же и великую Четыредесятницу рцы сие:
Егда́ сла́внии ученицы́ на умове́нии ве́чери просвеща́хуся, / тогда́ Иу́да злочести́вый сребролю́бием неду́говав омрача́шеся, / и беззако́нным судия́м Тебе́ пра́веднаго Судию́ предае́т. / Виждь, име́ний рачи́телю, сих ра́ди удавле́ние употреби́вша: / бежи́ несы́тыя души́, / Учи́телю такова́я дерзну́вшая. / И́же о всех благи́й Го́споди, сла́ва Тебе́.
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х; я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.
Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре, / и наста́вльшему лю́ди, / я́же изведе́ из рабо́ты еги́петския, / я́ко просла́вися.
Се́рдце чи́сто сози́жди во мне, Бо́же, и дух прав обнови́ во утро́бе мое́й.
Хлеб живота́ ве́чнующаго да бу́дет ми / Те́ло Твое́ Свято́е, благоутро́бне Го́споди, и честна́я Кровь, / и неду́г многообра́зных исцеле́ние.
Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
Оскверне́н де́лы безме́стными окая́нный, / Твоего́ Пречи́стаго Те́ла и Боже́ственныя Кро́ве недосто́ин есмь, Христе́, причаще́ния, / его́же мя сподо́би.
Пресвята́я Богоро́дице, спаси́ нас.
Земле́ блага́я, благослове́нная Богоневе́сто, / клас прозя́бшая неора́нный и спаси́тельный ми́ру, / сподо́би мя, сей яду́ща, спасти́ся.
Ирмос: На ка́мени мя ве́ры утверди́в, / разшири́л еси́ уста́ моя́ на враги́ моя́. / Возвесели́ бо ся дух мой, внегда́ пе́ти: / несть свят, я́коже Бог наш, / и несть пра́веден па́че Тебе́, Го́споди.
Се́рдце чи́сто сози́жди во мне, Бо́же, и дух прав обнови́ во утро́бе мое́й.
Сле́зныя ми пода́ждь, Христе́, ка́пли, / скве́рну се́рдца моего́ очища́ющия: / я́ко да благо́ю со́вестию очище́н, / ве́рою прихожду́ и стра́хом, Влады́ко, / ко причаще́нию Боже́ственных даро́в Твои́х.
Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
Во оставле́ние да бу́дет ми прегреше́ний / пречи́стое Те́ло Твое́, и Боже́ственная Кровь, / Ду́ха же Свята́го обще́ние, / и в жизнь ве́чную, Человеколю́бче, / и страсте́й и скорбе́й отчужде́ние.
Пресвята́я Богоро́дице, спаси́ нас.
Хле́ба живо́тнаго Трапе́за Пресвята́я, / свы́ше ми́лости ра́ди сше́дшаго, / и ми́рови но́вый живо́т даю́щаго, / и мене́ ны́не сподо́би, недосто́йнаго, / со стра́хом вкуси́ти сего́, и жи́ву бы́ти.
Ирмос: Прише́л еси́ от Де́вы, не хода́тай, ни А́нгел, / но Сам, Го́споди, вопло́щся, / и спасл еси́ всего́ мя человеќа. / Тем зову́ Ти: / сла́ва си́ле Твое́й, Го́споди.
Се́рдце чи́сто сози́жди во мне, Бо́же, и дух прав обнови́ во утро́бе мое́й.
Восхоте́л еси́, нас ра́ди вопло́щся, Многоми́лостиве, / закла́н бы́ти я́ко овча́, грех ра́ди челове́ческих; / те́мже молю́ Тя: / и моя́ очи́сти согреше́ния.
Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
Исцели́ души́ моея́ я́звы, Го́споди, и всего́ освяти́, / и сподо́би, Влады́ко, / я́ко да причащу́ся та́йныя Твоея́ Боже́ственныя ве́чери, окая́нный.
Пресвята́я Богоро́дице, спаси́ нас.
Уми́лостиви и мне Су́щаго от утро́бы Твоея́, Влады́чице, / и соблюди́ мя нескве́рна раба́ Твоего́ и непоро́чна, / я́ко да прие́м у́мнаго би́сера, освящу́ся.
Ирмос: Све́та пода́телю и веко́в Тво́рче, Го́споди, / во све́те Твои́х повеле́ний наста́ви нас: / ра́зве бо Тебе́ ино́го бо́га не зна́ем.
Се́рдце чи́сто сози́жди во мне, Бо́же, и дух прав обнови́ во утро́бе мое́й.
Я́коже предре́кл еси́, Христе́, / да бу́дет у́бо худо́му рабу́ Твоему́, / и во мне пребу́ди, я́коже обеща́лся еси́: / се бо Те́ло Твое́ ям Боже́ственное и пию́ Кровь Твою́.
Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
Сло́ве Бо́жий и Бо́же, / угль Те́ла Твоего́ да бу́дет мне, помраче́нному, в просвеще́ние / и очище́ние оскверне́нной души́ мое́й Кровь Твоя́.
Пресвята́я Богоро́дице, спаси́ нас.
Мари́е, Ма́ти Бо́жия, благоуха́ния честно́е селе́ние, / Твои́ми моли́твами сосу́д мя избра́нный соде́лай, / я́ко да освяще́ний причащу́ся Сы́на Твоего́.
Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.
Се́рдце чи́сто сози́жди во мне, Бо́же, и дух прав обнови́ во утро́бе мое́й.
Ум, ду́шу и се́рдце освяти́, Спа́се, и те́ло мое́, / и сподо́би неосужде́нно, Влады́ко, / к стра́шным Та́йнам приступи́ти.
Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
Да бых устрани́лся от страсте́й, / и Твоея́ благода́ти име́л бы приложе́ние, / живота́ же утвержде́ние, / причаще́нием Святы́х, Христе́, Та́ин Твои́х.
Пресвята́я Богоро́дице, спаси́ нас.
Бо́жие, Бо́же, Сло́во Свято́е, всего́ мя освяти́, / ны́не приходя́щаго к Боже́ственным Твои́м Та́йнам, / Святы́я Ма́тере Твоея́ мольба́ми.
Хлеб, Христе́, взя́ти не пре́зри мя, / Те́ло Твое́, и Боже́ственную Твою́ ны́не Кровь, / пречи́стых, Влады́ко, и стра́шных Твои́х Та́ин причасти́тися окая́ннаго, / да не бу́дет ми в суд, / да бу́дет же ми в живо́т ве́чный и безсме́ртный.
Ирмос: Те́лу злато́му прему́дрыя де́ти не послужи́ша, / и в пла́мень са́ми поидо́ша, и бо́ги их обруга́ша, / среди́ пла́мене возопи́ша, и ороси́ я́ А́нгел: / услы́шася уже́ уст ва́ших моли́тва.
Се́рдце чи́сто сози́жди во мне, Бо́же, и дух прав обнови́ во утро́бе мое́й.
Исто́чник благи́х, причаще́ние, Христе́, / безсме́ртных Твои́х ны́не Та́инств / да бу́дет ми свет, и живо́т, и безстра́стие, / и к преспея́нию же и умноже́нию доброде́тели Боже́ственнейшия хода́тайственно, / еди́не Бла́же, я́ко да сла́влю Тя.
Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
Да изба́влюся от страсте́й, и враго́в, и ну́жды, и вся́кия ско́рби, / тре́петом и любо́вию со благогове́нием, Человеколю́бче, / приступа́яй ны́не к Твои́м безсме́ртным и Боже́ственным Та́йнам, / и пе́ти Тебе́ сподо́би: / благослове́н еси́, Го́споди, Бо́же оте́ц на́ших.
Пресвята́я Богоро́дице, спаси́ нас.
Спа́са Христа́ ро́ждшая па́че ума́, Богоблагода́тная, / молю́ Тя ны́не, раб Твой, Чи́стую нечи́стый: / хотя́щаго мя ны́не к пречи́стым Та́йнам приступи́ти, / очи́сти всего́ от скве́рны пло́ти и Ду́ха.
Ирмос: В пещь о́гненную ко отроко́м евре́йским снизше́дшаго, / и пла́мень в ро́су прело́жшаго Бо́га, / по́йте дела́ я́ко Го́спода, / и превозноси́те во вся ве́ки.
Се́рдце чи́сто сози́жди во мне, Бо́же, и дух прав обнови́ во утро́бе мое́й.
Небе́сных, и стра́шных, и Святы́х Твои́х, Христе́, ны́не Та́ин, / и Боже́ственныя Твоея́ и та́йныя ве́чери о́бщника бы́ти / и мене́ сподо́би, отча́яннаго, Бо́же Спа́се мой.
Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
Под Твое́ прибе́г благоутро́бие, Бла́же, со стра́хом зо́ву Ти: / во мне пребу́ди, Спа́се, и аз, я́коже рекл еси́, в Тебе́; / се бо дерза́я на ми́лость Твою́, / ям Те́ло Твое́, и пию́ Кровь Твою́.
Пресвята́я Тро́ице, Бо́же наш, сла́ва Тебе́.
Трепе́щу, прие́мля огнь, / да не опалю́ся я́ко воск и я́ко трава́. / О́ле стра́шнаго та́инства! / О́ле благоутро́бия Бо́жия! / Ка́ко Боже́ственнаго Те́ла и Кро́ве, бре́ние, / причаща́юся и нетле́нен сотворя́юся?
Ирмос: Безнача́льна Роди́теля Сын, Бог и Госпо́дь, / вопло́щся от Де́вы нам яви́ся, / омраче́нная просвети́ти, собра́ти расточе́нная: / тем всепе́тую Богоро́дицу велича́ем.
Се́рдце чи́сто сози́жди во мне, Бо́же, и дух прав обнови́ во утро́бе мое́й.
Христо́с есть, вкуси́те и ви́дите: / Госпо́дь нас ра́ди, по нам бо дре́вле бы́вый, / еди́ною Себе́ прине́с, я́ко приноше́ние Отцу́ Своему́, / при́сно закала́ется, освяща́яй причаща́ющияся.
Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.
Душе́ю и те́лом да освящу́ся, Влады́ко, да просвещу́ся, да спасу́ся, / да бу́ду дом Твой причаще́нием Свяще́нных Та́ин, / живу́щаго Тя име́я в себе́ со Отце́м и Ду́хом, / Благоде́телю Многоми́лостиве.
Возда́ждь ми ра́дость спасе́ния Твоего́ и Ду́хом Влады́чним утверди́ мя.
Я́коже огнь да бу́дет ми и я́ко свет, / Те́ло Твое́ и Кровь, Спа́се мой, пречестна́я, / опаля́я грехо́вное вещество́, сжига́я же страсте́й те́рние, / и всего́ мя просвеща́я, покланя́тися Бо́жеству Твоему́.
Пресвята́я Богоро́дице, спаси́ нас.
Бог воплоти́ся от чи́стых крове́й Твои́х; / те́мже вся́кий род пое́т Тя, Влады́чице, / у́мная же мно́жества сла́вят, / я́ко Тобо́ю я́ве узре́ша все́ми Влады́чествующаго, / осуществова́вшагося челове́чеством.
И абие: Достойно есть: Трисвятое. Пресвятая Троице: По Отче наш: Тропарь дне, аще есть праздник Христова Рождества, или иный.
Поми́луй нас, Го́споди, поми́луй нас; / вся́каго бо отве́та недоуме́юще, / сию́ Ти моли́тву / я́ко Влады́це, гре́шнии прино́сим: поми́луй нас.
Слава: Го́споди, поми́луй нас, / на Тя бо упова́хом; / не прогне́вайся на ны зело́, / ниже́ помяни́ беззако́ний на́ших, / но при́зри и ны́не я́ко Благоутро́бен, / и изба́ви ны от враг на́ших; / Ты бо еси́ Бог наш, / и мы лю́дие Твои́, / вси дела́ руку́ Твое́ю, / и и́мя Твое́ призыва́ем.
И ныне: Милосе́рдия две́ри отве́рзи нам, / благослове́нная Богоро́дице, / наде́ющиися на Тя да не поги́бнем, / но да изба́вимся Тобо́ю от бед: / Ты бо еси́ спасе́ние ро́да христиа́нскаго.
Таже: Го́споди, поми́луй, 40. И поклоны, елико хощеши.
Хотя́ я́сти, челове́че, Те́ло Влады́чне,
Стра́хом приступи́, да не опали́шися: огнь бо есть.
Боже́ственную же пия́ Кровь ко обще́нию,
Пе́рвее примири́ся тя опеча́лившим.
Та́же дерза́я, та́инственное бра́шно яждь.
Пре́жде прича́стия стра́шныя же́ртвы,
Животворя́щаго Те́ла Влады́чня,
Сим помоли́ся о́бразом со тре́петом:
Влады́ко Го́споди Иису́се Христе́, Бо́же наш, Исто́чниче жи́зни и безсме́ртия, всея́ тва́ри ви́димыя и неви́димыя Соде́телю, Безнача́льнаго Отца́ Соприсносу́щный Сы́не и Собезнача́льный, премно́гия ра́ди бла́гости в после́дния дни в плоть оболки́йся, и распны́йся, и погребы́йся за ны, неблагода́рныя и злонра́вныя, и Твое́ю Кро́вию обнови́вый растле́вшее грехо́м естество́ на́ше, Сам, безсме́ртный Царю́, приими́ и мое́ гре́шнаго покая́ние, и приклони́ у́хо Твое́ мне, и услы́ши глаго́лы моя́. Согреши́х бо, Го́споди, согреши́х на не́бо и пред Тобо́ю, и несмь досто́ин воззре́ти на высоту́ сла́вы Твоея́: прогне́вах бо Твою́ бла́гость, Твоя́ за́поведи преступи́в, и не послу́шав Твои́х повеле́ний. Но Ты, Го́споди, незло́бив сый, долготерпели́в же и многоми́лостив, не пре́дал еси́ мя поги́бнути со беззако́ньми мои́ми, моего́ вся́чески ожида́я обраще́ния. Ты бо рекл еси́, Человеколю́бче, проро́ком Твои́м: я́ко хоте́нием не хощу́ сме́рти гре́шника, но е́же обрати́тися и жи́ву бы́ти ему́. Не хо́щеши бо, Влады́ко, созда́ния Твое́ю руку́ погуби́ти, ниже́ благоволи́ши о поги́бели челове́честей, но хо́щеши всем спасти́ся, и в ра́зум и́стины приити́. Те́мже и аз, а́ще и недосто́ин есмь небесе́ и земли́, и сея́ привре́менныя жи́зни, всего́ себе́ повину́в греху́, и сласте́м порабо́тив, и Твой оскверни́в о́браз; но творе́ние и созда́ние Твое́ быв, не отчаява́ю своего́ спасе́ния, окая́нный, на Твое́ же безме́рное благоутро́бие дерза́я, прихожду́. Приими́ у́бо и мене́, Человеколю́бче Го́споди, я́коже блудни́цу, я́ко разбо́йника, я́ко мытаря́ и я́ко блу́днаго, и возми́ мое́ тя́жкое бре́мя грехо́в, грех взе́мляй ми́ра, и не́мощи челове́ческия исцеля́яй, тружда́ющияся и обремене́нныя к Себе́ призыва́яй и упокоева́яй, не прише́дый призва́ти пра́ведныя, но гре́шныя на покая́ние. И очи́сти мя от вся́кия скве́рны пло́ти и ду́ха, и научи́ мя соверша́ти святы́ню во стра́се Твое́м: я́ко да чи́стым све́дением со́вести моея́, святы́нь Твои́х часть прие́мля, соединю́ся свято́му Те́лу Твоему́ и Кро́ви, и име́ю Тебе́ во мне живу́ща и пребыва́юща, со Отце́м, и Святы́м Твои́м Ду́хом. Ей, Го́споди Иису́се Христе́, Бо́же мой, и да не в суд ми бу́дет прича́стие Пречи́стых и Животворя́щих Та́ин Твои́х, ниже́ да не́мощен бу́ду душе́ю же и те́лом, от е́же недосто́йне тем причаща́тися, но даждь ми, да́же до коне́чнаго моего́ издыха́ния, неосужде́нно восприима́ти часть Святы́нь Твои́х, в Ду́ха Свята́го обще́ние, в напу́тие живота́ ве́чнаго, и во благоприя́тен ответ на Стра́шнем Суди́щи Твое́м: я́ко да и аз со все́ми избра́нными Твои́ми о́бщник бу́ду нетле́нных Твои́х благ, я́же угото́вал еси́ лю́бящим Тя, Го́споди, в ни́хже препросла́влен еси́ во ве́ки. Ами́нь.
Го́споди Бо́же мой, вем, я́ко несмь досто́ин, ниже́ дово́лен, да под кров вни́деши хра́ма души́ моея́, зане́же весь пуст и па́лся есть, и не и́маши во мне ме́ста досто́йна е́же главу́ подклони́ти; но я́коже с высоты́ нас ра́ди смири́л еси́ Себе́, смири́ся и ны́не смире́нию моему́, и я́коже восприя́л еси́ в верте́пе и в я́слех безслове́сных возлещи́, си́це восприими́ и в я́слех безслове́сныя моея́ души́, и во оскверне́нное мое́ те́ло вни́ти. И я́коже не неудосто́ил еси́ вни́ти и свечеря́ти со гре́шники в дому́ Си́мона прокаже́ннаго, та́ко изво́ли вни́ти и в дом смире́нныя моея́ души́, прокаже́нныя и гре́шныя. И я́коже не отри́нул еси́ подо́бную мне блудни́цу и гре́шную, прише́дшую и прикосну́вшуюся Тебе́, си́це умилосе́рдися и о мне, гре́шнем, приходя́щем и прикаса́ющем Ти ся. И я́коже не возгнуша́лся еси́ скве́рных ея́ уст и нечи́стых, целу́ющих Тя, ниже́ мои́х возгнуша́йся скве́рнших о́ныя уст и нечи́стших, ниже́ ме́рзких мои́х и нечи́стых усте́н, и скве́рнаго и нечи́стейшаго моего́ язы́ка. Но да бу́дет ми угль пресвята́го Твоего́ Те́ла, и честны́я Твоея́ Кро́ве, во освяще́ние и просвеще́ние и здра́вие смире́нней мое́й души́ и те́лу, во облегче́ние тя́жестей мно́гих мои́х согреше́ний, в соблюде́ние от вся́каго диа́вольскаго де́йства, во отгна́ние и возбране́ние зла́го моего́ и лука́ваго обы́чая, во умерщвле́ние страсте́й, в снабде́ние за́поведей Твои́х, в приложе́ние Боже́ственныя Твоея́ благода́ти и Твоего́ Ца́рствия присвое́ние. Не бо я́ко презира́яй прихожду́ к Тебе́, Христе́ Бо́же, но я́ко дерза́я на неизрече́нную Твою́ бла́гость, и да не на мно́зе удаля́яйся обще́ния Твоего́, от мы́сленнаго во́лка звероуловле́н бу́ду. Те́мже молю́ся Тебе́: я́ко Еди́н сый Свят, Влады́ко, освяти́ мою́ ду́шу и те́ло, ум и се́рдце, чревеса́ и утро́бы, и всего́ мя обнови́, и вкорени́ страх Твой во удесе́х мои́х, и освяще́ние Твое́ неотъе́млемо от мене́ сотвори́; и бу́ди ми помо́щник и засту́пник, окормля́я в ми́ре живо́т мой, сподобля́я мя и одесну́ю Тебе́ предстоя́ния со святы́ми Твои́ми, моли́твами и моле́ньми Пречи́стыя Твоея́ Ма́тере, невеще́ственных Твои́х служи́телей и пречи́стых Сил, и всех святы́х, от ве́ка Тебе́ благоугоди́вших. Ами́нь.
Еди́не чи́стый и нетле́нный Го́споди, за неизрече́нную ми́лость человеколю́бия на́ше все восприе́мый смеше́ние, от чи́стых и де́вственных крове́й па́че естества́ Ро́ждшия Тя, Ду́ха Боже́ственнаго наше́ствием и благоволе́нием Отца́ присносу́щнаго, Христе́ Иису́се, прему́дросте Бо́жия, и ми́ре, и си́ло; Твои́м восприя́тием животворя́щая и спаси́тельная страда́ния восприе́мый, крест, гво́здия, копие́, смерть, умертви́ моя́ душетле́нная стра́сти теле́сныя. Погребе́нием Твои́м а́дова плени́вый ца́рствия, погреби́ моя́ благи́ми по́мыслы лука́вая сове́тования и лука́вствия ду́хи разори́. Тридне́вным Твои́м и живоно́сным воскресе́нием па́дшаго пра́отца возста́вивый, возста́ви мя, грехо́м попо́лзшагося, о́бразы мне покая́ния предлага́я. Пресла́вным Твои́м вознесе́нием плотско́е обожи́вый восприя́тие и сие́ десны́м Отца́ седе́нием почты́й, сподо́би мя прича́стием Святы́х Твои́х Та́ин десну́ю часть спаса́емых получи́ти. Сни́тием Уте́шителя Твоего́ Ду́ха сосу́ды че́стны свяще́нныя Твоя́ ученики́ соде́лавый, прия́телище и мене́ покажи́ Того́ прише́ствия. Хотя́й па́ки приити́ суди́ти вселе́нней пра́вдою, благоволи́ и мне усре́сти Тя на о́блацех, Судию́ и Созда́теля моего́, со все́ми святы́ми Твои́ми: да безконе́чно славосло́влю и воспева́ю Тя, со Безнача́льным Твои́м Отце́м и Пресвяты́м и Благи́м и Животворя́щим Твои́м Духом, ны́не и при́сно и во ве́ки веко́в. Ами́нь.
Я́ко на Стра́шнем Твое́м и нелицеприе́мнем предстоя́й Суди́лищи, Христе́ Бо́же, и осужде́ния подъе́мля, и сло́во творя́ о соде́янных мно́ю злых; си́це днесь, пре́жде да́же не приити́ дне́ви осужде́ния моего́, у свята́го Твоего́ Же́ртвенника предстоя́ пред Тобо́ю и пред стра́шными и святы́ми А́нгелы Твои́ми, преклоне́н от своея́ со́вести, приношу́ лука́вая моя́ и беззако́нная дея́ния, явля́яй сия́ и облича́яй. Виждь, Го́споди, смире́ние мое́, и оста́ви вся грехи́ моя́; виждь, я́ко умно́жишася па́че влас главы́ моея́ беззако́ния моя́. Ко́е у́бо не соде́ях зло? Кий грех не сотвори́х? Ко́е зло не вообрази́х в души́ мое́й? Уже́ бо и де́лы соде́ях: блуд, прелюбоде́йство, го́рдость, киче́ние, укоре́ние, хулу́, праздносло́вие, смех неподо́бный, пия́нство, гортанобе́сие, объяде́ние, не́нависть, за́висть, сребролю́бие, любостяжа́ние, лихои́мство, самолю́бие, славолю́бие, хище́ние, непра́вду, злоприобре́тение, ре́вность, оклевета́ние, беззако́ние; вся́кое мое́ чу́вство и вся́кий уд оскверни́х, растли́х, непотре́бен сотвори́х, де́лателище быв вся́чески диа́воле. И ве́м, Го́споди, я́ко беззако́ния моя́ превзыдо́ша главу́ мою́; но безме́рно есть мно́жество щедро́т Твои́х, и ми́лость неизрече́нна незло́бивыя Твоея́ бла́гости, и несть грех побежда́ющ человеколю́бие Твое́. Те́мже, пречу́дный Царю́, незло́биве Го́споди, удиви́ и на мне, гре́шнем, ми́лости Твоя́, покажи́ бла́гости Твоея́ си́лу и яви́ кре́пость благоутро́бнаго милосе́рдия Твоего́, и обраща́ющася приими́ мя гре́шнаго. Приими́ мя, я́коже прия́л еси́ блу́днаго, разбо́йника, блудни́цу. Приими́ мя, пребезме́рне и сло́вом, и де́лом, и по́хотию безме́стною, и помышле́нием безслове́сным согреши́вша Тебе́. И я́коже во единонадеся́тый час прише́дших прия́л еси́, ничто́же досто́йно соде́лавших, та́ко приими́ и мене́, гре́шнаго: мно́го бо согреши́х и оскверни́хся, и опеча́лих Ду́ха Твоего́ Свята́го, и огорчи́х человеколю́бную утро́бу Твою́ и де́лом, и сло́вом, и помышле́нием, в нощи́ и во дни, явле́нне же и неявле́нне, во́лею же и нево́лею. И вем, я́ко предста́виши грехи́ моя́ пре́до мно́ю таковы́, яковы́ же мно́ю соде́яшася, и истя́жеши сло́во со мно́ю о и́хже ра́зумом непроще́нно согреши́х. Но Го́споди, Го́споди, да не пра́ведным судо́м Твои́м, ниже́ я́ростию Твое́ю обличи́ши мя, ниже́ гне́вом Твои́м нака́жеши мя; поми́луй мя, Го́споди, я́ко не то́кмо не́мощен е́смь, но и Твое́ есмь созда́ние. Ты у́бо, Го́споди, утверди́л еси́ на мне страх Твой, аз же лука́вое пред Тобо́ю сотвори́х. Тебе́ у́бо еди́ному согреши́х, но молю́ Тя, не вни́ди в суд с рабо́м Твои́м. А́ще бо беззако́ния на́зриши, Го́споди, Го́споди, кто постои́т? Аз бо есмь пучи́на греха́, и несмь досто́ин, ниже́ дово́лен воззре́ти и ви́дети высоту́ небе́сную, от мно́жества грехо́в мои́х, и́хже несть числа́: вся́кое бо злодея́ние и кова́рство, и ухищре́ние сатанино́, и растле́ния, злопомне́ния, сове́тования ко греху́ и ины́е тьмочи́сленныя стра́сти не оскуде́ша от мене́. Ки́ими бо не растли́хся грехи́? Ки́ими не содержа́хся злы́ми? Всяк грех соде́ях, вся́кую нечистоту́ вложи́х в ду́шу мою́, непотре́бен бых Тебе́, Бо́гу моему́, и челове́ком. Кто возста́вит мя, в сицева́я зла́я и толи́ка па́дшаго согреше́ния? Го́споди Бо́же мой, на Тя упова́х; а́ще есть ми спасе́ния упова́ние, а́ще побежда́ет человеколю́бие Твое́ мно́жества беззако́ний мои́х, бу́ди ми Спаси́тель, и по щедро́там Твои́м и ми́лостем Твои́м, осла́би, оста́ви, прости́, ми вся, ели́ка Ти согреши́х, я́ко мно́гих зол испо́лнися душа́ моя́, и несть во мне спасе́ния наде́жды. Поми́луй мя, Бо́же, по вели́цей ми́лости Твое́й и не возда́ждь ми по дело́м мои́м, и не осуди́ мя по дея́нием мои́м, но обрати́, заступи́, изба́ви ду́шу мою́ от совозраста́ющих ей зол и лю́тых восприя́тий. Спаси́ мя ра́ди ми́лости Твоея́, да иде́же умно́жится грех, преизоби́лует благода́ть Твоя́; и восхвалю́ и просла́влю Тя всегда́, вся дни живота́ моего́. Ты бо еси́ Бог ка́ющихся и Спас согреша́ющих; и Тебе́ славу возсыла́ем со Безнача́льным Твои́м Отце́м и Пресвяты́м и Благи́м, и Животворя́щим Твои́м Ду́хом ны́не и при́сно, и во ве́ки веко́в. Ами́нь.
Влады́ко Го́споди Иису́се Христе́ Бо́же наш, еди́не име́яй власть челове́ком оставля́ти грехи́, я́ко благ и Человеколю́бец пре́зри моя́ вся в ве́дении и не в ве́дении прегреше́ния, и сподо́би мя неосужде́нно причасти́тися Боже́ственных, и пресла́вных, и пречи́стых, и животворя́щих Твои́х Та́ин, не в тя́жесть, ни в му́ку, ни в приложе́ние грехо́в, но во очище́ние, и освяще́ние, и обруче́ние бу́дущаго живота́ и Ца́рствия, в сте́ну и по́мощь, и в возраже́ние сопроти́вных, во истребле́ние мно́гих мои́х согреше́ний. Ты бо еси́ Бог ми́лости, и щедро́т, и человеколю́бия, и Тебе́ сла́ву возсыла́ем, со Отце́м и Святы́м Ду́хом, ны́не и при́сно и во ве́ки веко́в. Ами́нь.
Вем, Го́споди, я́ко недосто́йне причаща́юся пречи́стаго Твоего́ Те́ла и честны́я Твоея́ Кро́ве, и пови́нен есмь, и суд себе́ ям и пию́, не разсужда́я Те́ла и Кро́ве Тебе́, Христа́ и Бо́га моего́, но на щедро́ты Твоя́ дерза́я, прихожду́ к Тебе́, ре́кшему: яды́й Мою́ Плоть и пия́й Мою́ Кровь, во Мне пребыва́ет, и Аз в нем. Умилосе́рдися у́бо, Го́споди, и не обличи́ мя, гре́шнаго, но сотвори́ со мно́ю по ми́лости Твое́й; и да бу́дут ми свята́я сия́ во исцеле́ние, и очище́ние, и просвеще́ние, и сохране́ние, и спасе́ние, и во освяще́ние души́ и те́ла; во отгна́ние вся́каго мечта́ния, и лука́ваго дея́ния, и де́йства диа́вольскаго, мы́сленне во удесе́х мои́х де́йствуемаго, в дерзнове́ние и любо́вь, я́же к Тебе́; во исправле́ние жития́ и утвержде́ние, в возраще́ние доброде́тели и соверше́нства, во исполне́ние за́поведей, в Ду́ха Свята́го обще́ние, в напу́тие живота́ ве́чнаго, во отве́т благоприя́тен на Стра́шнем Суди́щи Твое́м: не в суд или́ во осужде́ние.
От скве́рных усте́н, от ме́рзкаго се́рдца, от нечи́стаго язы́ка, от души́ оскве́рнены, приими́ моле́ние, Христе́ мой, и не пре́зри мои́х ни слове́с, ниже́ образо́в, ниже́ безсту́дия. Даждь ми дерзнове́нно глаго́лати, я́же хощу́, Христе́ мой, па́че же и научи́ мя, что ми подоба́ет твори́ти и глаго́лати. Согреши́х па́че блудни́цы, я́же уве́де, где обита́еши, ми́ро купи́вши, прии́де де́рзостне пома́зати Твои́ но́зе, Бо́га моего́, Влады́ки и Христа́ моего́. Я́коже о́ну не отри́нул еси́ прише́дшую от се́рдца, ниже́ мене́ возгнуша́йся, Сло́ве: Твои́ же ми пода́ждь но́зе, и держа́ти и целова́ти, и струя́ми сле́зными, я́ко многоце́нным ми́ром, сия́ де́рзостно пома́зати. Омы́й мя слеза́ми мои́ми, очи́сти мя и́ми, Сло́ве. Оста́ви и прегреше́ния моя́, и проще́ние ми пода́ждь. Ве́си зол мно́жество, ве́си и стру́пы моя́, и я́звы зри́ши моя́, но и ве́ру ве́си, и произволе́ние зри́ши, и воздыха́ние слы́шиши. Не таи́тся Тебе́, Бо́же мой, Тво́рче мой, Изба́вителю мой, ниже́ ка́пля сле́зная, ниже́ ка́пли часть не́кая. Несоде́ланное мое́ ви́десте о́чи Твои́, в кни́зе же Твое́й и еще́ несоде́янная напи́сана Тебе́ суть. Виждь смире́ние мое́, виждь труд мой ели́к, и грехи́ вся оста́ви ми, Бо́же вся́ческих: да чи́стым се́рдцем, притре́петною мы́слию и душе́ю сокруше́нною нескве́рных Твои́х причащу́ся и пресвяты́х Та́ин, и́миже оживля́ется и обожа́ется всяк яды́й же и пия́й чи́стым се́рдцем. Ты бо рекл еси́, Влады́ко мой: всяк яды́й Мою́ Плоть и пия́й Мою́ Кровь, во Мне у́бо сей пребыва́ет, в не́мже и Аз есмь. И́стинно сло́во вся́ко Влады́ки и Бо́га моего́: Боже́ственных бо причаща́яйся и боготворя́щих благода́тей, не у́бо есмь еди́н, но с Тобо́ю, Христе́ мой, Све́том трисо́лнечным, просвеща́ющим мир. Да у́бо не еди́н пребу́ду кроме́ Тебе́, Живода́вца, дыха́ния моего́, живота́ моего́, ра́дования моего́, спасе́ния ми́ру. Сего́ ра́ди к Тебе́ приступи́х, я́коже зри́ши, со слеза́ми, и душе́ю сокруше́нною, избавле́ния мои́х прегреше́ний прошу́ прия́ти ми и Твои́х живода́тельных и непоро́чных Та́инств причасти́тися неосужде́нно, да пребу́деши, я́коже рекл еси́, со мно́ю треокая́нным: да не кроме́ обре́т мя Твоея́ благода́ти, преле́стник восхи́тит мя льсти́вне, и прельсти́в отведе́т боготворя́щих Твои́х слове́с. Сего́ ра́ди к Тебе́ припа́даю и те́пле вопию́ Ти: я́коже блу́днаго прия́л еси́ и блудни́цу прише́дшую, та́ко приими́ мя, блу́днаго и скве́рнаго, Ще́дре. Душе́ю сокруше́нною ны́не бо к Тебе́ приходя́, вем, Спа́се, я́ко ины́й, я́коже аз, не прегреши́ Тебе́, ниже́ соде́я дея́ния, я́же аз соде́ях. Но сие́ па́ки вем, я́ко не вели́чество прегреше́ний, ни грехо́в мно́жество превосхо́дит Бо́га моего́ мно́гое долготерпе́ние и человеколю́бие кра́йнее; но ми́лостию состра́стия те́пле ка́ющияся и чи́стиши, и све́тлиши, и све́та твори́ши прича́стники, о́бщники Божества́ Твоего́ соде́ловаяй незави́стно, и стра́нное и А́нгелом, и челове́ческим мы́слем, бесе́дуеши им мно́гажды, я́коже друго́м Твои́м и́стинным. Сия́ де́рзостна творя́т мя, сия́ вперя́ют мя, Христе́ мой. И дерза́я Твои́м бога́тым к нам благодея́нием, ра́дуяся вку́пе и трепе́ща, огне́ви причаща́юся трава́ сый, и стра́нно чу́до, ороша́емь неопа́льно, я́коже у́бо купина́ дре́вле неопа́льне горя́щи. Ны́не благода́рною мы́слию, благода́рным же се́рдцем, благода́рными удесы́ мои́ми, души́ и те́ла моего́, покланя́юся и велича́ю, и славосло́влю Тя, Бо́же мой, я́ко благослове́нна су́ща, ны́не же и во ве́ки.
Бо́же, осла́би, оста́ви, прости́ ми согреше́ния моя́, ели́ка Ти согреши́х, а́ще сло́вом, а́ще де́лом, а́ще помышле́нием, во́лею или нево́лею, ра́зумом или неразу́мием, вся ми прости́ я́ко благ и Человеколю́бец, и моли́твами Пречи́стыя Твоея́ Ма́тере, у́мных Твои́х служи́телей и святы́х сил, и всех святы́х, от ве́ка Тебе́ благоугоди́вших, неосужде́нно благоволи́ прия́ти ми свято́е и Пречи́стое Твое́ Те́ло и Честну́ю Кровь, во исцеле́ние души́ же и те́ла, и во очище́ние лука́вых мои́х помышле́ний. Я́ко Твое́ есть Ца́рство и си́ла и сла́ва, со Отце́м и Святы́м Ду́хом, ны́не и при́сно и во ве́ки веко́в. Ами́нь.
Несмь дово́лен, Влады́ко Го́споди, да вни́деши под кров души́ моея́; но поне́же хо́щеши Ты я́ко Человеколю́бец, жи́ти во мне, дерза́я приступа́ю; повелева́еши, да отве́рзу две́ри, я́же Ты еди́н создал еси́, и вни́деши со человеколю́бием я́коже еси́; вни́деши и просвеща́еши помраче́нный мой по́мысл. Ве́рую, я́ко сие́ сотвори́ши: не бо блудни́цу, со слеза́ми прише́дшую к Тебе́, отгна́л еси́; ниже́ мытаря́ отве́ргл еси́ пока́явшася; ниже́ разбо́йника, позна́вша Ца́рство Твое́, отгна́л еси́; ниже́ гони́теля пока́явшася оста́вил еси́, е́же бе: но от покая́ния Тебе́ прише́дшия вся, в ли́це Твои́х друго́в вчини́л еси́, Еди́н сый благослове́нный всегда́, ны́не и в безконе́чныя ве́ки. Ами́нь.
Го́споди Иису́се Христе́, Бо́же мой, осла́би, оста́ви, очи́сти и прости́ ми, гре́шному, и непотре́бному, и недосто́йному рабу́ Твоему́, прегреше́ния, и согреше́ния и грехопаде́ния моя́, ели́ка Ти от ю́ности моея́, да́же до настоя́щаго дне и часа́ согреши́х: а́ще в ра́зуме и в неразу́мии, а́ще в словесе́х или́ де́лех, или́ помышле́ниих и мы́слех, и начина́ниих, и всех мои́х чу́вствах. И моли́твами безсе́менно ро́ждшия Тя, Пречи́стыя и Присноде́вы Мари́и, Ма́тере Твоея́, еди́ныя непосты́дныя наде́жды и предста́тельства и спасе́ния моего́, сподо́би мя неосужде́нно причасти́тися пречи́стых, безсме́ртных, животворя́щих и стра́шных Твои́х Та́инств, во оставле́ние грехо́в и в жизнь ве́чную: во освяще́ние и просвеще́ние, кре́пость, исцеле́ние, и здра́вие души́ же и те́ла, и в потребле́ние и всесоверше́нное погубле́ние лука́вых мои́х помысло́в, и помышле́ний, и предприя́тий, и нощны́х мечта́ний, те́мных и лука́вых духо́в; я́ко Твое́ есть Ца́рство, и си́ла, и сла́ва, и честь, и поклоне́ние, со Отце́м и Святы́м Твои́м Ду́хом, ны́не и при́сно и во ве́ки веко́в. Ами́нь.
Пред две́рьми хра́ма Твоего́ предстою́ и лю́тых помышле́ний не отступа́ю; но Ты, Христе́ Бо́же, мытаря́ оправди́вый, и ханане́ю поми́ловавый, и разбо́йнику рая́ две́ри отве́рзый, отве́рзи ми утро́бы человеколю́бия Твоего́ и приими́ мя, приходя́ща и прикаса́ющася Тебе́, я́ко блудни́цу и кровоточи́вую: о́ва у́бо кра́я ри́зы Твоея́ косну́вшися, удо́бь исцеле́ние прия́т, о́ва же пречи́стеи Твои́ но́зе удержа́вши, разреше́ние грехо́в понесе́. Аз же, окая́нный, все Твое́ Те́ло дерза́я восприя́ти, да не опале́н бу́ду; но приими́ мя, я́коже о́ныя, и просвети́ моя́ душе́вныя чу́вства, попаля́я моя́ грехо́вныя вины́, моли́твами безсе́менно Ро́ждшия Тя и небе́сных сил; я́ко благослове́н еси́ во ве́ки веко́в. Ами́нь.
Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.
Приходяй же причаститися, глаголи в себе настоящия стихи Метафраста:
Се приступа́ю к Боже́ственному Причаще́нию.
Соде́телю, да не опали́ши мя приобще́нием:
Огнь бо еси́, недосто́йныя попаля́яй.
Но у́бо очи́сти мя от вся́кия скве́рны.
Ве́чери Твоея́ та́йныя днесь, Сы́не Бо́жий, / прича́стника мя приими́; / не бо враго́м Твои́м та́йну пове́м, ни лобза́ния Ти дам, я́ко Иу́да, / но я́ко разбо́йник испове́даю Тя: / помяни́ мя, Го́споди, во Ца́рствии Твое́м.
Боготворя́щую Кровь ужасни́ся челове́че, зря,
Огнь бо есть, недосто́йныя попаля́яй.
Боже́ственное Те́ло и обожа́ет мя и пита́ет:
Обожа́ет дух, ум же пита́ет стра́нно.
Услади́л мя еси́ любо́вию, Христе́, / и измени́л мя еси́ Боже́ственным Твои́м раче́нием; / но попали́ огне́м невеще́ственным грехи́ моя́, / и насы́титися е́же в Тебе́ наслажде́ния сподо́би: / да лику́я возвелича́ю, Бла́же, два прише́ствия Твоя́.
Во све́тлостех Святы́х Твои́х ка́ко вни́ду, недосто́йный? / А́ще бо дерзну́ совни́ти в черто́г, оде́жда мя облича́ет, я́ко несть бра́чна, / и свя́зан изве́ржен бу́ду от А́нгелов. / Очи́сти, Го́споди, скве́рну души́ моея́, / и спаси́ мя, я́ко Человеколю́бец.
Влады́ко Человеколю́бче, Го́споди Иису́се Христе́ Бо́же мой, да не в суд ми бу́дут Свята́я сия, за е́же недосто́йну ми бы́ти: но во очище́ние и освяще́ние души́ же и те́ла, и во обруче́ние бу́дущия жи́зни и Ца́рствия. Мне же, еже прилепля́тися Бо́гу, бла́го есть, полага́ти во Го́споде упова́ние спасе́ния моего́.
И паки: Ве́чери Твоея́ та́йныя днесь, Сы́не Бо́жий, / прича́стника мя приими́; / не бо враго́м Твои́м та́йну пове́м, / ни лобза́ния Ти дам, я́ко Иу́да, / но я́ко разбо́йник испове́даю Тя: / помяни́ мя, Го́споди, во Ца́рствии Твое́м.
Егда же получиши добраго причащения,
Животворящих таинственных дарований,
Воспой абие, благодари вельми,
И сия тепле от души Богу глаголи:
Сла́ва Тебе́, Бо́же. Сла́ва Тебе́, Бо́же. Сла́ва Тебе́, Бо́же.
Благодарю́ Тя, Го́споди Бо́же мой, яко не отри́нул мя еси́ гре́шнаго, но о́бщника мя бы́ти святы́нь Твои́х сподо́бил еси́. Благодарю́ Тя, я́ко мене́ недосто́йнаго, причасти́тися пречи́стых Твои́х и небе́сных Даро́в сподо́бил еси́. Но Влады́ко Человеколю́бче, нас ра́ди уме́рый же и воскресы́й, и дарова́вый нам стра́шная сия́ и животворя́щая Та́инства, во благодея́ние и освяще́ние душ и теле́с на́ших, даждь бы́ти сим и мне во исцеле́ние души́ же и те́ла, во отгна́ние вся́каго сопроти́внаго, в просвеще́ние о́чию се́рдца моего́, в мир душе́вных мои́х сил, в ве́ру непосты́дну, в любо́вь нелицеме́рну, во исполне́ние прему́дрости, в соблюде́ние за́поведей Твои́х, в приложе́ние Боже́ственныя Твоея́ благода́ти, и Твоего́ Ца́рствия присвое́ние, да во святы́ни Твое́й те́ми сохраня́емь, Твою́ благода́ть помина́ю всегда́, и не ктому́ себе́ живу́, но Тебе́, на́шему Влады́це и Благоде́телю; и та́ко сего́ жития́ изше́д о наде́жди живота́ ве́чнаго, в присносу́щный дости́гну поко́й, иде́же пра́зднующих глас непреста́нный, и безконе́чная сла́дость зря́щих Твоего́ лица́ добро́ту неизрече́нную. Ты бо еси́ и́стинное жела́ние, и неизрече́нное весе́лие лю́бящих Тя, Христе́ Бо́же наш, и Тя пое́т вся тварь во ве́ки. Ами́нь.
Влады́ко Христе́ Бо́же, Царю́ веко́в и Соде́телю всех, благодарю́ Тя о всех, я́же ми еси́ по́дал благи́х, и о причаще́нии пречи́стых и животворя́щих Твои́х Та́инств. Молю́ у́бо Тя, Бла́же и Человеколю́бче: сохрани́ мя под кро́вом Твои́м, и в се́ни крилу́ Твое́ю. И да́руй ми чи́стою со́вестию, да́же до после́дняго моего́ издыха́ния, досто́йно причаща́тися Святы́нь Твои́х, во оставле́ние грехо́в и в жизнь ве́чную. Ты бо еси́ Хлеб живо́тный, исто́чник святы́ни, пода́тель благи́х, и Тебе́ сла́ву возсыла́ем, со Отце́м и Святы́м Ду́хом, ны́не и при́сно, и во ве́ки веко́в. Ами́нь.
Да́вый пи́щу мне плоть Твою́ во́лею, огнь сый и опаля́яй недосто́йныя, да не опали́ши мене́, Соде́телю мой; па́че же пройди́ во у́ды моя́, во вся соста́вы, во утро́бу, в се́рдце. Попали́ те́рние всех мои́х прегреше́ний. Ду́шу очи́сти, освяти́ помышле́ния. Соста́вы утверди́ с костьми́ вку́пе. Чувств просвети́ просту́ю пятери́цу. Всего́ мя спригвозди́ стра́ху Твоему́. При́сно покры́й, соблюди́ же, и сохрани́ мя от вся́каго де́ла и сло́ва душетле́ннаго. Очи́сти, и омы́й, и украси́ мя: удобри́, вразуми́, и просвети́ мя. Покажи́ мя Твое́ селе́ние еди́наго Ду́ха, и не ктому́ селе́ние греха́. Да я́ко Твоего́ до́му вхо́дом причаще́ния, я́ко огня́ мене́ бежи́т всяк злоде́й, вся́ка страсть. Моли́твенники Тебе́ приношу́ вся святы́я, чинонача́лия же безпло́тных, Предте́чу Твоего́, прему́дрыя апо́столы, к сим же Твою́ нескве́рную, чи́стую Ма́терь, и́хже мольбы́, Благоутро́бне, приими́, Христе́ мой, и сы́ном све́та соде́лай Твоего́ служи́теля. Ты бо еси́ освяще́ние, и Еди́ный на́ших, Бла́же, душ и све́тлость, и Тебе́ лепоподо́бно я́ко Бо́гу и Влады́це сла́ву вси возсыла́ем на всяк день.
Те́ло Твое́ Свято́е, Го́споди Иису́се Христе́ Бо́же наш, да бу́дет ми в живо́т ве́чный, и Кровь Твоя́ Честна́я во оставле́ние грехо́в: бу́ди же ми благодаре́ние сие́ в ра́дость, здра́вие и весе́лие; в стра́шное же и второ́е прише́ствие Твое́ сподо́би мя, гре́шнаго, ста́ти одесну́ю сла́вы Твоея́, моли́твами Пречи́стыя Твоея́ Ма́тери, и всех святы́х.
Пресвята́я Влады́чице Богоро́дице, све́те помраче́нныя моея́ души́, наде́ждо, покро́ве, прибе́жище, утеше́ние, ра́дование мое́, благодарю́ Тя, я́ко сподо́била мя еси́ недосто́йнаго, прича́стника бы́ти Пречи́стаго Те́ла, и Честны́я Кро́ве Сы́на Твоего́. Но ро́ждшая и́стинный Свет, просвети́ моя́ у́мныя о́чи се́рдца; Я́же исто́чник безсме́ртия ро́ждшая, оживотвори́ мя умерщвле́ннаго грехо́м; Я́же ми́лостиваго Бо́га любоблагоутро́бная Ма́ти, поми́луй мя, и даждь ми умиле́ние, и сокруше́ние в се́рдце мое́м, и смире́ние в мы́слех мои́х, и воззва́ние в плене́ниих помышле́ний мои́х; и сподо́би мя до после́дняго издыха́ния, неосужде́нно приима́ти Пречи́стых Та́ин освяще́ние во исцеле́ние души́ же и те́ла. И пода́ждь ми сле́зы покая́ния и испове́дания, во е́же пе́ти и сла́вити Тя во вся дни живота́ моего́, я́ко благослове́нна и препросла́вленна еси́ во ве́ки. Ами́нь.
Таже: Ны́не отпуща́еши раба́ Твоего́, Влады́ко, / по глаго́лу Твоему́ с ми́ром, / я́ко ви́деста о́чи мои́ спасе́ние Твое́, / е́же еси́ угото́вал пред лице́м всех люде́й, / свет во открове́ние язы́ков / и сла́ву люде́й Твои́х Изра́иля.
Трисвятое. И по Отче наш:
Уст твои́х, я́коже све́тлость огня́, / возсия́вши благода́ть, вселе́нную просвети́; / не сребролю́бия ми́рови сокро́вища сниска́, / высоту́ нам смиренному́дрия показа́, / но твои́ми словесы́ наказу́я, о́тче Иоа́нне Златоу́сте, / моли́ Сло́ва Христа́ Бо́га спасти́ся душа́м на́шим.
От небе́с прия́л еси́ Боже́ственную благода́ть, / и твои́ми устна́ми вся учи́ши / покланя́тися в Тро́ице Еди́ному Бо́гу, / Иоа́нне Златоу́сте всеблаже́нне, преподо́бне, досто́йно хва́лим тя: / еси́ бо наста́вник, я́ко Боже́ственная явля́я.
Предста́тельство христиа́н непосты́дное, / хода́тайство ко Творцу́ непрело́жное, / не пре́зри гре́шных моле́ний гла́сы, / но предвари́, я́ко Блага́я, на по́мощь нас, ве́рно зову́щих Ти: / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.
Или Взбра́нной воево́де: или О Тебе́ ра́дуется: или кондак храма, аще есть Богородицы, или праздника настоящаго, аще будет Господский или Богородичен.
Во всю зе́млю изы́де веща́ние твое́, / я́ко прие́мшую сло́во твое́, / и́мже боголе́пно научи́л еси́, / естество́ су́щих уясни́л еси́, / челове́ческия обы́чаи украси́л еси́, / ца́рское свяще́ние, о́тче преподо́бне, / моли́ Христа́ Бо́га, / спасти́ся душа́м на́шим.
Яви́лся еси́ основа́ние непоколеби́мое Це́ркве, / подая́ всем некра́домое госпо́дство челове́ком, / запечатле́я твои́ми веле́ньми, / небоявле́нне Васи́лие преподо́бне.
И́же от Бо́га свы́ше Боже́ственную благода́ть восприе́м, сла́вне Григо́рие, / и Того́ си́лою укрепля́емь, ева́нгельски ше́ствовати изво́лил еси́. / Отону́дуже у Христа́ возме́здие трудо́в прия́л еси́, всеблаже́нне: / Его́же моли́, да спасе́т ду́ши на́ша.
Подобонача́льник показа́лся еси́ Нача́льника па́стырем Христа́, / и́ноков чреды́, о́тче Григо́рие, / ко огра́де небе́сней наставля́я, / и отту́ду научи́л еси́ ста́до Христо́во за́поведем Его́: / ны́не же с ни́ми ра́дуешися, / и лику́еши в небе́сных кро́вех.
И ныне, якоже прежде положися. Го́споди, поми́луй, 12. Слава и ныне:
Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу Тя велича́ем. И отпуст.
По служении же да хранит себе иерей в трезвении и воздержании, и немногоглаголании, дабы в той день честно соблюл в себе Христа приятаго.
Ирмос: Я́ко по су́ху пешеше́ствовав Изра́иль, / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь / пои́м, вопия́ше.
Поми́луй мя, Бо́же, поми́луй мя.
Ны́не приступи́х аз гре́шный и обремене́нный / к Тебе́, Влады́це и Бо́гу моему́; / не сме́ю же взира́ти на не́бо, / то́кмо молю́ся, глаго́ля: / даждь ми, Го́споди, ум, / да пла́чуся дел мои́х го́рько.
Поми́луй мя, Бо́же, поми́луй мя.
О, го́ре мне гре́шному! / Па́че всех челове́к окая́нен есмь, / покая́ния несть во мне; / даждь ми, Го́споди, сле́зы, / да пла́чуся дел мои́х го́рько.
Слава: Безу́мне, окая́нне челове́че, / в ле́ности вре́мя губи́ши; / помы́сли житие́ твое́, / и обрати́ся ко Го́споду Бо́гу, / и пла́чися о де́лех твои́х го́рько.
И ныне: Ма́ти Бо́жия Пречи́стая, / воззри́ на мя гре́шного, / и от се́ти диа́воли изба́ви мя, / и на путь покая́ния наста́ви мя, / да пла́чуся дел мои́х го́рько.
Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.
Поми́луй мя, Бо́же, поми́луй мя.
Внегда́ поста́влени бу́дут престо́ли на Суди́щи Стра́шнем, / тогда́ всех челове́к дела́ облича́тся; /го́ре та́мо бу́дет гре́шным, в му́ку отсыла́емым; / и то ве́дущи, душе́ моя́, / пока́йся от злых дел твои́х.
Поми́луй мя, Бо́же, поми́луй мя.
Пра́ведницы возра́дуются, а гре́шнии воспла́чутся, / тогда́ никто́же возмо́жет помощи́ нам, / но дела́ на́ша осу́дят нас, / те́мже пре́жде конца́ / пока́йся от злых дел твои́х.
Слава: Увы́ мне великогре́шному, / и́же де́лы и мы́сльми оскверни́вся, / ни ка́пли слез име́ю от жестосе́рдия; / ны́не возни́кни от земли́, душе́ моя́, / и пока́йся от злых дел твои́х.
И ныне: Се, взыва́ет, Госпоже́, Сын Твой, / и поуча́ет нас на до́брое, / аз же гре́шный добра́ всегда́ бе́гаю; / но Ты, Ми́лостивая, поми́луй мя, / да пока́юся от злых мои́х дел.
Помышля́ю день стра́шный / и пла́чуся дея́ний мои́х лука́вых: / ка́ко отвеща́ю Безсме́ртному Царю́, / или́ ко́им дерзнове́нием воззрю́ на Судию́, блу́дный аз? / Благоутро́бный О́тче, Сы́не Единоро́дный / и Ду́ше Святы́й, поми́луй мя.
Слава, и ныне, Богородичен: Свя́зан мно́гими ны́не плени́цами грехо́в / и содержи́мь лю́тыми страстьми́ и беда́ми, / к Тебе́ прибега́ю, моему́ спасе́нию, и вопию́: / помози́ ми, Де́во, Ма́ти Бо́жия.
Ирмос: Христо́с моя́ си́ла, / Бог и Госпо́дь, честна́я Це́рковь / боголе́пно пое́т, взыва́ющи / от смы́сла чи́ста, о Го́споде пра́зднующи.
Поми́луй мя, Бо́же, поми́луй мя.
Широ́к путь зде и уго́дный сла́сти твори́ти, / но го́рько бу́дет в после́дний день, / егда́ душа́ от те́ла разлуча́тися бу́дет: / блюди́ся от сих, челове́че, / Ца́рствия ра́ди Бо́жия.
Поми́луй мя, Бо́же, поми́луй мя.
Почто́ убо́гаго оби́диши, / мзду нае́мничу уде́ржуеши, / бра́та твоего́ не лю́биши, / блуд и го́рдость го́ниши? / Оста́ви у́бо сия́, душе́ моя́, / и пока́йся Ца́рствия ра́ди Бо́жия.
Слава: О, безу́мный челове́че, / доко́ле углеба́еши, я́ко пчела́, собира́ющи бога́тство твое́? / Вско́ре бо поги́бнет, я́ко прах и пе́пел: / но бо́лее взыщи́ Ца́рствия Бо́жия.
И ныне: Госпоже́ Богоро́дице, поми́луй мя гре́шного, / и в доброде́тели укрепи́, и соблюди́ мя, / да на́глая смерть не похи́тит мя негото́ваго, / и доведи́ мя, Де́во, Ца́рствия Бо́жия.
Ирмос: Бо́жиим / све́том Твои́м, Бла́же, / у́тренюющих Ти ду́ши / любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.
Поми́луй мя, Бо́же, поми́луй мя.
Воспомяни́, окая́нный челове́че, / ка́ко лжам, клевета́м, разбо́ю, не́мощем, лю́тым звере́м, / грехо́в ра́ди порабоще́н еси́; / душе́ моя́ гре́шная, того́ ли восхоте́ла еси́?
Поми́луй мя, Бо́же, поми́луй мя.
Трепе́щут ми у́ди, все́ми бо сотвори́х вину́: / очи́ма взира́яй, уши́ма слы́шай, язы́ком зла́я глаго́ляй, / всего́ себе́ гее́не предая́й; / душе́ моя́ гре́шная, сего́ ли восхоте́ла еси́?
Слава: Блудника́ и разбо́йника ка́ющася прия́л еси́, Спа́се, / аз же еди́н ле́ностию грехо́вною отягчи́хся / и злым дело́м порабо́тихся, / душе́ моя́ гре́шная, сего́ ли восхоте́ла еси́?
И ныне: Ди́вная и ско́рая помо́щнице всем челове́ком, Ма́ти Бо́жия, / помози́ мне недосто́йному, / душа́ бо моя́ гре́шная того́ восхоте́.
Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.
Поми́луй мя, Бо́же, поми́луй мя.
Житие́ на земли́ блу́дно пожи́х / и ду́шу во тьму преда́х, / ны́не у́бо молю́ Тя, Ми́лостивый Влады́ко: / свободи́ мя от рабо́ты сея́ вра́жия, / и даждь ми ра́зум твори́ти во́лю Твою́.
Поми́луй мя, Бо́же, поми́луй мя.
Кто твори́т такова́я, я́коже аз? / Я́коже бо свиния́ лежи́т в калу́, / та́ко и аз греху́ слу́жу. / Но Ты, Го́споди, исто́ргни мя от гну́са сего́ / и даждь ми се́рдце твори́ти за́поведи Твоя́.
Слава: Воспряни́, окая́нный челове́че, к Бо́гу, / воспомяну́в своя́ согреше́ния, / припа́дая ко Творцу́, слезя́ и стеня́; / Той же, я́ко милосе́рд, / даст ти ум зна́ти во́лю Свою́.
И ныне: Богоро́дице Де́во, / от ви́димаго и неви́димаго зла сохрани́ мя, Пречи́стая, / и приими́ моли́твы моя́, / и донеси́ я́ Сы́ну Твоему́, / да даст ми ум твори́ти во́лю Его́.
Душе́ моя́, / почто́ греха́ми богате́еши, / почто́ во́лю диа́волю твори́ши, / в чесо́м наде́жду полага́еши? / Преста́ни от сих / и обрати́ся к Бо́гу с пла́чем, зову́щи: / милосе́рде Го́споди, поми́луй мя гре́шнаго.
Икос: Помы́сли, душе́ моя́, го́рький час сме́рти / и стра́шный суд Творца́ твоего́ и Бо́га: / А́нгели бо гро́знии по́ймут тя, душе́, / и в ве́чный огнь введу́т: / у́бо пре́жде сме́рти пока́йся, вопию́щи: / Го́споди, поми́луй мя гре́шнаго.
Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие, / мучи́теля увеща́ вопи́ти: / благослове́н еси́, Бо́же оте́ц на́ших.
Поми́луй мя, Бо́же, поми́луй мя.
Не наде́йся, душе́ моя́, / на тле́нное бога́тство и на непра́ведное собра́ние, / вся бо сия́ не ве́си кому́ оста́виши, но возопи́й: / поми́луй мя, Христе́ Бо́же, недосто́йнаго.
Поми́луй мя, Бо́же, поми́луй мя.
Не упова́й, душе́ моя́, на теле́сное здра́вие / и на скоромимоходя́щую красоту́, / ви́диши бо, я́ко си́льнии и млади́и умира́ют; но возопи́й: / поми́луй мя, Христе́ Бо́же, недосто́йнаго.
Слава: Воспомяни́, душе́ моя́, ве́чное житие́, / Ца́рство Небе́сное, угото́ванное святы́м, / и тьму кроме́шную и гнев Бо́жий злым, и возопи́й: / поми́луй мя, Христе́ Бо́же, недосто́йнаго.
И ныне: Припади́, душе́ моя́, к Бо́жией Ма́тери и помоли́ся Той, / есть бо ско́рая помо́щница ка́ющимся, / умо́лит Сы́на Христа́ Бо́га, / и поми́лует мя недосто́йнаго.
Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.
Поми́луй мя, Бо́же, поми́луй мя.
Ка́ко не и́мам пла́катися, егда́ помышля́ю смерть, / ви́дех бо во гро́бе лежа́ща бра́та моего́, безсла́вна и безобра́зна? / Что у́бо ча́ю, и на что наде́юся? / То́кмо даждь ми, Го́споди, / пре́жде конца́ покая́ние. Дважды.
Слава: Ве́рую, я́ко прии́деши суди́ти живы́х и ме́ртвых, / и вси во свое́м чи́ну ста́нут, / ста́рии и млади́и, влады́ки и кня́зи, де́вы и свяще́нницы; где обря́щуся аз? / Сего́ ра́ди вопию́: / да́ждь ми, Го́споди, пре́жде конца́ покая́ние.
И ныне: Пречи́стая Богоро́дице, / приими́ недосто́йную моли́тву мою́ / и сохрани́ мя от на́глыя сме́рти, / и да́руй ми пре́жде конца́ покая́ние.
Ирмос: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во Воплоще́нно, / Его́же велича́юще, / с небе́сными во́и Тя ублажа́ем.
Поми́луй мя, Бо́же, поми́луй мя.
Ны́не к вам прибега́ю, / А́нгели, Арха́нгели и вся небе́сныя си́лы, / у Престо́ла Бо́жия стоя́щии, / моли́теся ко Творцу́ Своему́, / да изба́вит ду́шу мою́ от му́ки ве́чныя.
Поми́луй мя, Бо́же, поми́луй мя.
Ны́не пла́чуся к вам, / святи́и патриа́рси, ца́рие и проро́цы, / апо́столи и святи́телие и вси избра́ннии Христо́вы: / помози́те ми на суде́, / да спасе́т ду́шу мою́ от си́лы вра́жия.
Слава: Ны́не к вам воздежу́ ру́це, / святи́и му́ченицы, пусты́нницы, де́вственницы, пра́ведницы / и вси святи́и, моля́щиися ко Го́споду за весь мир, / да поми́лует мя в час сме́рти моея́.
И ныне: Ма́ти Бо́жия, помози́ ми, / на Тя си́льне наде́ющемуся, / умоли́ Сы́на Своего́, / да поста́вит мя недосто́йнаго одесну́ю Себе́, / егда́ ся́дет судя́й живы́х и ме́ртвых. Ами́нь.
Влады́ко Христе́ Бо́же, И́же страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне, мно́го Тебе́ прегреши́вшему, сле́зы умиле́ния; сраствори́ моему́ те́лу от обоня́ния Животворя́щего Те́ла Твоего́, и наслади́ ду́шу мою́ Твое́ю Честно́ю Кро́вию от го́рести, е́юже мя сопроти́вник напои́; возвы́си мой ум к Тебе́, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умиле́ния, не и́мам слезы́ уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми, я́же к Тебе́ любве́. Но, Влады́ко Го́споди Иису́се Христе́, сокро́вище благи́х, да́руй мне покая́ние всеце́лое и се́рдце люботру́дное во взыска́ние Твое́, да́руй мне благода́ть Твою́ и обнови́ во мне зра́ки Твоего́ о́браза. Оста́вих Тя, не оста́ви мене́; изы́ди на взыска́ние мое́, возведи́ к па́жити Твое́й и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Боже́ственных Твои́х Та́инств, моли́твами Пречи́стыя Твоея́ Ма́тере и всех святы́х Твои́х. Ами́нь.
Ирмос: Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть: / препросла́вленный Госпо́дь, / сла́вно бо просла́вися.
Иису́се Сладча́йший, спаси́ мя.
Иису́се Сладча́йший Христе́, / Иису́се долготерпели́ве, / души́ моея́ я́звы исцели́, Иису́се, / и услади́ се́рдце мое́, Многоми́лостиве, / молю́ся, Иису́се Спа́се мой, / да велича́ю Тя, спаса́емый.
Иису́се Сладча́йший, спаси́ мя.
Иису́се Сладча́йший Христе́, / Иису́се, отве́рзи покая́ния ми дверь, / человеколю́бче Иису́се, и приими́ мя, / Тебе́ припа́дающа и те́пле прося́ща, / Иису́се Спа́се мой, согре́шений проще́ния.
Слава: Иису́се Сладча́йший Христе́, / Иису́се, исхити́ мя / из руки́ льсти́ваго велиа́ра, Иису́се, / и сотвори́ десна́го предстоя́теля сла́вы Твоея́, / Иису́се Спа́се мой, / ча́сти шу́ия мя избавля́яй.
И ныне, Богородичен: Иису́са ро́ждшая Бо́га, Влады́чице, / моли́ о непотре́бных рабе́х, Пречи́стая, / я́ко да му́ки моли́твами Твои́ми изба́вимся, Нескве́рная, оскверне́ннии, / сла́вы присносу́щныя наслажда́ющеся.
Ирмос: На ка́мени мя ве́ры утверди́в, / разшири́л еси́ уста́ моя́ на враги́ моя́. / Возвесели́ бо ся дух мой, внегда́ пе́ти: / несть свят, я́коже Бог наш, / и несть пра́веден па́че Тебе́, Го́споди.
Иису́се Сладча́йший, спаси́ мя.
Услы́ши, человеколю́бче Иису́се мой, раба́ Твоего́, / вопию́ща во умиле́нии, / и изба́ви мя, Иису́се, осужде́ния и му́ки, / еди́не долготерпели́ве, / Иису́се Сладча́йший многоми́лостиве.
Иису́се Сладча́йший, спаси́ мя.
Подыми́ раба́ Твоего́, Иису́се мой, / припа́дающа со слеза́ми, Иису́се мой, / и спаси́, Иису́се мой, ка́ющагося мя / и гее́нны, Влады́ко, изба́ви, / Иису́се Сладча́йший многоми́лостиве.
Слава: Вре́мя, Иису́се мой, е́же дал ми еси́, / во стра́сти ижди́х, Иису́се мой. / Те́мже, Иису́се мой, не отве́ржи мя, / но воззови́, молю́ся, / Влады́ко Иису́се Сладча́йший, и спаси́.
И ныне, Богородичен: Де́во, ро́ждшая Иису́са моего́, / моли́ изба́вити мя гее́нны, / еди́но предста́тельство оскорбля́емых, Богоблагода́тная, / и сподо́би мя жи́зни, Всенепоро́чная, нестаре́ющияся.
Спа́се мой Иису́се, блу́днаго спасы́й, / Спа́се мой Иису́се, прие́мый блудни́цу, / и мене́ ны́не поми́луй, Иису́се многоми́лостиве, / спаси́, уще́дри, о Иису́се благоде́телю, / я́коже, Благоутро́бне, Манасси́ю, / Иису́се мой, я́ко Еди́н Человеколю́бец.
Ирмос: Прише́л еси́ от Де́вы, не хода́тай, ни А́нгел, / но Сам, Го́споди, вопло́щся, / и спасл еси́ всего́ мя челове́ка. / Тем зову́ Ти: / сла́ва си́ле Твое́й, Го́споди.
Иису́се Сладча́йший, спаси́ мя.
Исцели́, Иису́се мой, души́ моея́ я́звы, / Иису́се мой, молю́ся, / и руки́ мя исхити́, Иису́се мой благоутро́бне, / душетле́ннаго велиа́ра, и спаси́.
Иису́се Сладча́йший, спаси́ мя.
Согреши́х, Иису́се мой Сладча́йший, благоутро́бне; / Иису́се мой, спаси́ мя, прибега́ющаго к покро́ву Твоему́, / Иису́се долготерпели́ве, / и Ца́рствия Твоего́ мя сподо́би.
Слава: Никто́же согреши́, Иису́се мой, я́коже согреши́х аз, окая́нный, / но припа́даю моля́ся, Иису́се мой, спаси́ мя / и жи́зни, Иису́се мой, насле́дие ми да́руй.
И ныне, Богородичен: Всепе́тая, Иису́са ро́ждшая Го́спода, / Того́ моли́ изба́вити му́ки вся, пою́щия Тя, / и Богоро́дицу вои́стинну имену́ющия.
Ирмос: Просвеще́ние во тме лежа́щих, / спасе́ние отча́янных, Христе́ Спа́се мой, / к Тебе́ у́тренюю, Царю́ ми́ра, / просвети́ мя сия́нием Твои́м: / ино́го бо ра́зве Тебе́ бо́га не зна́ю.
Иису́се Сладча́йший, спаси́ мя.
Ты просвеще́ние, Иису́се мой, ума́ моего́, / Ты спасе́ние отчая́нныя души́ моея́, Спа́се, / Ты, Иису́се мой, му́ки изба́ви и гее́нны мя, зову́ща: / спаси́, Иису́се мой Христе́, мя окая́ннаго.
Иису́се Сладча́йший, спаси́ мя.
Всеконе́чно, Иису́се мой, ко стра́сти безче́стия низве́ржен ны́не зову́: / Ты, Иису́се мой, по́мощи ми ру́ку низпосла́в, / исто́ргни зову́ща: / спаси́, Иису́се мой Христе́, мя окая́ннаго.
Слава: Оскверне́н ум, Иису́се мой, обнося́, взыва́ю Ти: / очи́сти мя от скве́рны прегреше́ний / и изба́ви мя во глубины́ зло́бы от неве́дения низпопо́лзшагося, / Спа́се Иису́се мой, / и спаси́ мя, молю́ся.
И ныне, Богородичен: Иису́са ро́ждшая, Отрокови́це Богороди́тельнице, / Того́ умоли́ спасти́ вся правосла́вныя, мона́хи и мирски́я, / и гее́нны изба́вити зову́щия: / ра́зве Тебе́ предста́тельства тве́рдаго не зна́ем.
Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.
Иису́се Сладча́йший, спаси́ мя.
Иису́се мой Христе́ многоми́лостиве, / испове́дающася приими́ мя, Влады́ко, / о Иису́се, и спаси́ мя, / и от тли, Иису́се, мя исхити́.
Иису́се Сладча́йший, спаси́ мя.
Иису́се мой, никто́же бысть ин блудни́к, я́коже аз, стра́стный, / о Иису́се человеколю́бче: / но Ты, Иису́се, мя спаси́.
Слава: Иису́се мой, блудни́цу и блу́днаго, / и Манасси́ю и мытаря́ преидо́х, о Иису́се мой, страстьми́, / и разбо́йника, Иису́се, и ниневи́тяны.
И ныне, Богородичен: Иису́са Христа́ моего́ ро́ждшая, Пречи́стая Де́во, / еди́на нескве́рная, / оскверне́на су́ща мя моли́тв Твои́х иссо́пом ны́не очи́сти.
Возбра́нный Воево́до и Го́споди, а́да победи́телю, / я́ко изба́влься от ве́чныя сме́рти, / похва́льная воспису́ю Ти, созда́ние и раб Твой; / но, я́ко име́яй милосе́рдие неизрече́нное, / от вся́ких мя бед свободи́, зову́ща: / Иису́се, Сы́не Бо́жий, поми́луй мя.
А́нгелов Тво́рче и Го́споди Сил, / отве́рзи ми недоуме́нный ум и язы́к на похвалу́ пречи́стаго Твоего́ и́мене, / я́коже глухо́му и гугни́вому дре́вле слух и язы́к отве́рзл еси́, / и, глаго́лаше, зовы́й такова́я: / Иису́се пречу́дный, А́нгелов удивле́ние; / Иису́се преси́льный, прароди́телей избавле́ние. / Иису́се пресла́дкий, патриа́рхов велича́ние; / Иису́се пресла́вный, царе́й укрепле́ние. / Иису́се прелюби́мый, проро́ков исполне́ние; / Иису́се преди́вный, му́чеников кре́посте. / Иису́се прети́хий, мона́хов ра́досте; / Иису́се преми́лостивый, пресви́теров сла́досте. / Иису́се премилосе́рдый, по́стников воздержа́ние; / Иису́се пресла́достный, преподо́бных ра́дование. / Иису́се пречестны́й, де́вственных целому́дрие; / Иису́се предве́чный, гре́шников спасе́ние. / Иису́се, Сы́не Бо́жий, поми́луй мя.
Ви́дя вдови́цу зе́льне пла́чущу, Го́споди, / я́коже бо тогда́ умилосе́рдився, сы́на ея́ на погребе́ние несо́ма воскреси́л еси́; / си́це и о мне умилосе́рдися, Человеколю́бче, / и грехми́ умерщвле́нную мою́ ду́шу воскреси́, зову́щую: / Аллилу́ия.
Ра́зум неуразуме́нный разуме́ти Фили́пп ищя́, / Го́споди, покажи́ нам Отца́, глаго́лаше. / Ты же к нему́: толи́кое вре́мя сый со Мно́ю, / не позна́л ли еси́, я́ко Оте́ц во Мне, и Аз во Отце́ есмь? / Те́мже, Неизсле́дованне, со стра́хом зову́ Ти: / Иису́се, Бо́же предве́чный; Иису́се, Царю́ преси́льный. Иису́се, Влады́ко долготерпели́вый; / Иису́се, Спа́се преми́лостивый. / Иису́се, храни́телю мой преблаги́й; / Иису́се, очи́сти грехи́ моя́. / Иису́се, отыми́ беззако́ния моя́; / Иису́се, отпусти́ непра́вды моя́. / Иису́се, надеждо́ моя́, не оста́ви мене́; / Иису́се, помо́щниче мой, не отри́ни мене́. / Иису́се, Созда́телю мой, не забу́ди мене́; / Иису́се, Па́стырю мой, не погуби́ мене́. / Иису́се, Сы́не Бо́жий, поми́луй мя.
Си́лою свы́ше апо́столы облеки́й, Иису́се, / во Иерусали́ме седя́щия, / облецы́ и мене́, обнаже́ннаго от вся́каго благотворе́ния, / теплото́ю Ду́ха Свята́го Твоего́ / и даждь ми с любо́вию пе́ти Тебе́: / Аллилу́ия.
Име́яй бога́тство милосе́рдия, / мытари́ и гре́шники, и неве́рныя призва́л еси́, Иису́се; / не пре́зри и мене́ ны́не, подо́бнаго им, но, я́ко многоце́нное ми́ро, приими́ песнь сию́: / Иису́се, си́ло непобеди́мая; / Иису́се, ми́лосте безконе́чная. / Иису́се, красото́ пресве́тлая; / Иису́се, любы́ неизрече́нная. / Иису́се, Сы́не Бо́га Жива́го; / Иису́се, поми́луй мя гре́шнаго. / Иису́се, услы́ши мя в беззако́ниих зача́таго; / Иису́се, очи́сти мя во гресе́х рожде́ннаго. / Иису́се, научи́ мя непотре́бнаго; / Иису́се, освети́ мя те́мнаго. / Иису́се, очи́сти мя скве́рнаго; / Иису́се, возведи́ мя блу́днаго. / Иису́се, Сы́не Бо́жий, поми́луй мя.
Бу́рю внутрь име́яй помышле́ний сумни́тельных, Петр утопа́ше; / узре́в же во пло́ти Тя су́ща, Иису́се, и по вода́м ходя́ща, / позна́ Тя Бо́га и́стиннаго / и, ру́ку спасе́ния получи́в, рече́: / Аллилу́ия.
Слы́ша слепы́й мимоходя́ща Тя, Го́споди, путе́м, вопия́ше: / Иису́се, Сы́не Дави́дов, поми́луй мя! / И, призва́в, отве́рзл еси́ о́чи его́. / Просвети́ у́бо ми́лостию Твое́ю / о́чи мы́сленныя се́рдца и мене́, вопию́ща Ти и глаго́люща: / Иису́се, вы́шних Созда́телю; / Иису́се, ни́жних Искупи́телю. / Иису́се, преиспо́дних потреби́телю; / Иису́се, всея́ тва́ри украси́телю. / Иису́се, души́ моея́ уте́шителю; / Иису́се, ума́ моего́ просвети́телю. / Иису́се, се́рдца моего́ весе́лие; / Иису́се, тела́ моего́ здра́вие. / Иису́се, Спа́се мой, спаси́ мя; / Иису́се, све́те мой, просвети́ мя. / Иису́се, му́ки вся́кия изба́ви мя; / Иису́се, спаси́ мя, недосто́йнаго. / Иису́се, Сы́не Бо́жий, поми́луй мя.
Богото́чною Кро́вию я́коже искупи́л еси́ нас дре́вле от зако́нныя кля́твы, Иису́се, / си́це изми́ нас от се́ти, е́юже змий запя́т ны / страстьми́ плотски́ми и блу́дным наважде́нием, и злым уны́нием, / вопию́щия Ти: Аллилу́ия.
Ви́девше о́троцы евре́йстии / во о́бразе челове́честем Созда́вшаго руко́ю челове́ка / и Влады́ку разуме́вше Его́, потща́шася ве́твьми угоди́ти Ему́, оса́нна вопию́ще. / Мы же песнь прино́сим Ти, глаго́люще: / Иису́се, Бо́же и́стинный; / Иису́се, Сы́не Дави́дов. / Иису́се, Царю́ пресла́вный; / Иису́се, А́гнче непоро́чный. / Иису́се, Па́стырю преди́вный; / Иису́се, храни́телю во мла́дости мое́й. / Иису́се, корми́телю во ю́ности мое́й; / Иису́се, похвало́ в ста́рости мое́й. / Иису́се, наде́ждо в сме́рти мое́й; / Иису́се, живо́те по сме́рти мое́й. / Иису́се, утеше́ние мое́ на суде́ Твое́м; / Иису́се, жела́ние мое́, не посрами́ мене́ тогда́. / Иису́се, Сы́не Бо́жий, поми́луй мя.
Пропове́дник богоно́сных веща́ние и глаго́лы исполня́я, Иису́се, / на земли́ я́влься и с челове́ки Невмести́мый пожи́л еси́, / и боле́зни на́ша подъя́л еси́; / отню́дуже ра́нами Твои́ми мы исцеле́вше, / пе́ти навыко́хом: Аллилу́ия.
Возсия́ вселе́нней просвеще́ние и́стины Твоея́, / и отгна́ся лесть бесо́вская: / и́доли бо, Спа́се наш, не терпя́ще Твоея́ кре́пости, падо́ша. / Мы же, спасе́ние получи́вше, вопие́м Ти: / Иису́се, и́стино, лесть отгоня́щая; / Иису́се, све́те, превы́шший всех све́тлостей. / Иису́се, Царю́, премога́яй всех кре́пости; / Иису́се, Бо́же, пребыва́яй в ми́лости. / Иису́се, Хле́бе живо́тный, насы́ти мя а́лчущаго; / Иису́се, исто́чниче ра́зума, напо́й мя жа́ждущаго. / Иису́се, оде́ждо весе́лия, оде́й мя тле́ннаго; / Иису́се, покро́ве ра́дости, покры́й мя, недосто́йнаго. / Иису́се, пода́телю прося́щим, / даждь ми плач за грехи́ моя́; / Иису́се, обре́тение и́щущим, / обря́щи ду́шу мою́. / Иису́се, отве́рзителю толку́щим, / отве́рзи се́рдце мое́ окая́нное; / Иису́се, Искупи́телю гре́шных, / очи́сти беззако́ния моя́. / Иису́се, Сы́не Бо́жий, поми́луй мя.
Хотя́ сокрове́нную та́йну от ве́ка откры́ти, / я́ко овча́ на заколе́ние веде́н был еси́, Иису́се, / и я́ко а́гнец пря́мо стригу́щаго его́ безгла́сен, / и я́ко Бог из ме́ртвых воскре́сл еси́ / и со сла́вою на небеса́ возне́слся еси́, / и нас совоздви́гл еси́, зову́щих: / Аллилу́ия.
Ди́вную показа́ тварь, явле́йся Творе́ц нам: / без се́мене от Де́вы воплоти́ся; / из гро́ба, печа́ти не руши́в, воскре́се; / и ко апо́столом, две́рем затворе́нным, с пло́тию вни́де. / Те́мже чудя́щеся, воспои́м: / Иису́се, Сло́ве необыме́нный; / Иису́се, Сло́ве несогляда́емый. / Иису́се, си́ло непостижи́мая; / Иису́се, му́дросте недомы́слимая. / Иису́се, Божество́ неопи́санное; / Иису́се, госпо́дство неисче́тное. / Иису́се, ца́рство непобеди́мое; / Иису́се, влады́чество безконе́чное. / Иису́се, кре́посте высоча́йшая; / Иису́се, вла́сте ве́чная. / Иису́се, Тво́рче мой, уще́дри мя; / Иису́се, Спа́се мой, спаси́ мя. / Иису́се, Сы́не Бо́жий, поми́луй мя.
Стра́нно Бо́га вочелове́чшася ви́дяще, / устрани́мся су́етнаго ми́ра и ум на Боже́ственная возложи́м. / Сего́ бо ра́ди Бог на зе́млю сни́де, / да нас на небеса́ возведе́т, / вопию́щих Ему́: Аллилу́ия.
Весь бе в ни́жних, / и вы́шних ника́коже отступи́ Неисче́тный, / егда́ во́лею нас ра́ди пострада́ / и сме́ртию Свое́ю на́шу смерть умертви́, / и Воскресе́нием живо́т дарова́ пою́щим: / Иису́се, сла́досте серде́чная; / Иису́се, кре́посте теле́сная. / Иису́се, све́тлосте душе́вная; / Иису́се, быстрото́ у́мная. / Иису́се, ра́досте со́вестная; / Иису́се, наде́ждо изве́стная. / Иису́се, па́мяте предве́чная; / Иису́се, похвало́ высо́кая. / Иису́се, сла́во моя́ превознесе́нная; / Иису́се, жела́ние мое́, не отри́ни мене́. / Иису́се, Па́стырю мой, взыщи́ мене́; / Иису́се, Спа́се мой, спаси́ мене́. / Иису́се, Сы́не Бо́жий, поми́луй мя.
Все естество́ а́нгельское / безпреста́ни сла́вит пресвято́е и́мя Твое́, Иису́се, на небеси́: / Свят, Свят, Свят, вопию́ще; / мы же, гре́шнии, на земли́ бре́нными устна́ми вопие́м: / Аллилу́ия.
Вети́я многовеща́нныя, я́коже ры́бы безгла́сныя / ви́дим о Тебе́, Иису́се, Спа́се наш: / недоуме́ют бо глаго́лати, / ка́ко Бог непрело́жный и челове́к соверше́нный пребыва́еши? / Мы же, та́инству дивя́щеся, вопие́м ве́рно: / Иису́се, Бо́же предве́чный; / Иису́се, Царю́ ца́рствующих. / Иису́се, Влады́ко владе́ющих; / Иису́се, Судие́ живы́х и ме́ртвых. / Иису́се, наде́ждо ненаде́жных; / Иису́се, утеше́ние пла́чущих. / Иису́се, сла́во ни́щих; / Иису́се, не осуди́ мя по дело́м мои́м. / Иису́се, очи́сти мя по ми́лости Твое́й; / Иису́се, отжени́ от мене́ уны́ние. / Иису́се, просвети́ моя́ мы́сли серде́чныя; / Иису́се, даждь ми па́мять сме́ртную. / Иису́се, Сы́не Бо́жий, поми́луй мя.
Спасти́ хотя́ мир, Восто́че восто́ком, / к те́мному за́паду естеству́ на́шему прише́д, / смири́лся еси́ до сме́рти; / те́мже превознесе́ся и́мя Твое́ па́че вся́каго и́мене, / и от всех коле́н небе́сных и земны́х слы́шиши: / Аллилу́ия.
Царю́ Предве́чный, Уте́шителю, Христе́ и́стинный, / очи́сти ны от вся́кия скве́рны, / я́коже очи́стил еси́ де́сять прокаже́нных, / и исцели́ ны, я́коже исцели́л еси́ сребролюби́вую ду́шу Закхе́а мытаря́, / да вопие́м Ти, во умиле́нии зову́ще: / Иису́се, сокро́вище нетле́нное; / Иису́се, бога́тство неистощи́мое. / Иису́се, пи́ще кре́пкая; / Иису́се, питие́ неисчерпа́емое. / Иису́се, ни́щих оде́яние; / Иису́се, вдов заступле́ние. / Иису́се, си́рых защи́тниче; / Иису́се, тружда́ющихся по́моще. / Иису́се, стра́нных наста́вниче; / Иису́се, пла́вающих ко́рмчий. / Иису́се, бу́рных оти́шие; / Иису́се, Бо́же, воздви́гни мя па́дшаго. / Иису́се, Сы́не Бо́жий, поми́луй мя.
Пе́ние всеумиле́нное приношу́ Ти, недосто́йный, / вопию́ Ти я́ко ханане́а: / Иису́се, поми́луй мя; / не дщерь бо, но плоть и́мам / страстьми́ лю́те беся́щуюся и я́ростию пали́мую, / и исцеле́ние даждь вопию́щу Ти: / Аллилу́ия.
Светопода́тельна свети́льника су́щим во тьме неразу́мия, / пре́жде гоня́й Тя Па́вел, / богоразу́мнаго гла́са си́лу внуши́ и душе́вную быстроту́ уясни́; / си́це и мене́ те́мныя зе́ницы душе́вныя просвети́, зову́ща: / Иису́се, Царю́ мой прекре́пкий; / Иису́се, Бо́же мой преси́льный. / Иису́се, Го́споди мой пребезсме́ртный; / Иису́се, Созда́телю мой пресла́вный. / Иису́се, Наста́вниче мой предо́брый; / Иису́се, Па́стырю мой преще́дрый. / Иису́се, Влады́ко мой преми́лостивый; / Иису́се, Спа́се мой премилосе́рдый. / Иису́се, просвети́ моя́ чу́вствия, потемне́нныя страстьми́; / Иису́се, исцели́ мое́ те́ло, острупле́нное грехми́. / Иису́се, очи́сти мой ум от по́мыслов су́етных; / Иису́се, сохрани́ се́рдце мое́ от по́хотей лука́вых. / Иису́се, Сы́не Бо́жий, поми́луй мя.
Благода́ть пода́ждь ми, всех долго́в реши́телю, Иису́се, / и приими́ мя ка́ющася, я́коже прия́л еси́ Петра́, отве́ргшагося Тебе́, / и призови́ мя, уныва́ющаго, я́коже дре́вле Па́вла, гоня́ща Тя, / и услы́ши мя, вопию́ща Ти: / Аллилу́ия.
Пою́ще Твое́ вочелове́чение, восхваля́ем Тя вси / и ве́руем со Фомо́ю, я́ко Госпо́дь и Бог еси́, / седя́й со Отце́м и хотя́й суди́ти живы́м и ме́ртвым. / Тогда́ у́бо сподо́би мя десна́го стоя́ния, вопию́щаго: / Иису́се, Царю́ предве́чный, поми́луй мя; / Иису́се, цве́те благово́нный, облагоуха́й мя. / Иису́се, теплото́ люби́мая, огре́й мя; / Иису́се, хра́ме предве́чный, покры́й мя. / Иису́се, оде́ждо све́тлая, украси́ мя; / Иису́се, би́сере честны́й, осия́й мя. / Иису́се, ка́меню драги́й, просвети́ мя; / Иису́се, со́лнце пра́вды, освети́ мя. / Иису́се, све́те святы́й, облиста́й мя; / Иису́се, боле́зни душе́вныя и теле́сныя изба́ви мя. / Иису́се, из руки́ сопроти́вныя изми́ мя; / Иису́се, огня́ неугаси́маго и про́чих ве́чных мук свободи́ мя. / Иису́се, Сы́не Бо́жий, поми́луй мя.
О, Пресла́дкий и Всеще́дрый Иису́се! / Приими́ ны́не ма́лое моле́ние сие́ на́ше, / я́коже прия́л еси́ вдови́цы две ле́пте, / и сохрани́ достоя́ние Твое́ от враг ви́димых и неви́димых, / от наше́ствия иноплеме́нник, от неду́га и гла́да, / от вся́кия ско́рби и смертоно́сныя ра́ны, / и гряду́щия изми́ му́ки всех, вопию́щих Ти: / Аллилу́ия. Сей кондак глаголи трижды.
И паки чтется 1-й икос: А́нгелов Тво́рче и Го́споди Сил, / отве́рзи ми недоуме́нный ум и язы́к на похвалу́ пречи́стаго Твоего́ и́мене, / я́коже глухо́му и гугни́вому дре́вле слух и язы́к отве́рзл еси́, / и, глаго́лаше, зовы́й такова́я:
И паки 1-й кондак: Возбра́нный Воево́до и Го́споди, а́да победи́телю, / я́ко изба́влься от ве́чныя сме́рти, / похва́льная воспису́ю Ти, созда́ние и раб Твой; / но, я́ко име́яй милосе́рдие неизрече́нное, / от вся́ких мя бед свободи́, зову́ща: / Иису́се, Сы́не Бо́жий, поми́луй мя.
Ирмос: О́бразу злато́му на по́ле Деи́ре служи́му, / трие́ Твои́ о́троцы небрего́ша безбо́жнаго веле́ния, / посреде́ же огня́ вве́ржени, ороша́еми поя́ху: / благослове́н еси́, Бо́же оте́ц на́ших.
Иису́се Сладча́йший, спаси́ мя.
Христе́ Иису́се, / никто́же согреши́ на земли́ от ве́ка, о Иису́се мой, / я́коже согреши́х аз, окая́нный и блу́дный. / Те́мже, Иису́се мой, вопию́ Ти: / пою́ща мя уще́дри, / благослове́н еси́, Бо́же оте́ц на́ших.
Иису́се Сладча́йший, спаси́ мя.
Христе́ Иису́се, / ко стра́ху Твоему́, вопию́, пригвозди́ мя, о Иису́се мой, / и окорми́ ны́не ко приста́нищу благооти́шному, / я́ко да, Иису́се мой ще́дре, пою́ Ти спаса́емый: / благослове́н еси́, Бо́же оте́ц на́ших.
Слава: Христе́ Иису́се, / тма́ми обеща́х Тебе́, стра́стный, о Иису́се мой, покая́ние, / но солга́х окая́нный. / Те́мже, Иису́се мой, вопию́ Ти: / нечу́вственне пребыва́ющую ду́шу мою́ просвети́, Христе́, / отце́в Бо́же благослове́н еси́.
И ныне, Богородичен: Христа́ Иису́са ро́ждшая стра́нно и па́че естества́, / Того́ моли́, Всенепоро́чная, / я́же чрез естество́ моя́ прегреше́ния вся прости́ти ми, Отрокови́це, / да зову́ спаса́емь: / благослове́на еси́, Бо́га пло́тию ро́ждшая.
Ирмос: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га, / по́йте, дела́, я́ко Го́спода, / и превозноси́те во вся ве́ки.
Иису́се Сладча́йший, спаси́ мя.
Тя, Иису́се мой, молю́: / я́коже блудни́цу, Иису́се мой, / изба́вил еси́ мно́гих согреше́ний, / та́ко и мене́, Иису́се Христе́ мой, изба́ви, / и очи́сти оскверне́нную ду́шу мою́, Иису́се мой.
Иису́се Сладча́йший, спаси́ мя.
Преклони́вся, Иису́се, безслове́сными сластьми́, / безслове́сен яви́хся и ското́м вои́стинну, Иису́се мой, / стра́стно окая́нный уподо́бихся; / те́мже, Иису́се, безслове́сия мя изба́ви.
Слава: Впад, о Иису́се, в душетле́нныя разбо́йники, / обнажи́хся оде́жды, Иису́се мой, боготка́нныя ны́не, / и лежу́ ра́нами уя́звен; / еле́й, Христе́ мой, возле́й на мя и вино́.
И ныне, Богородичен: Иису́са моего́ и Бо́га носи́вшая Христа́ несказа́нно, / Богоро́дице Мари́е, / Того́ моли́ при́сно от бед спасти́ся рабо́м Твои́м, и певце́м Твои́м, / Неискусому́жная Де́во.
Ирмос: От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, / я́дию в тле́ние па́дшаго лю́те, / от Святы́я Де́вы неизрече́нно воплоти́вшагося нас ра́ди, / ве́рнии единому́дренно пе́сньми велича́ем.
Иису́се Сладча́йший, спаси́ мя.
Манасси́ю, Иису́се мой, / мытаря́, блудни́цу, блу́днаго, ще́дре Иису́се, / и разбо́йника преидо́х, Иису́се мой, / в де́лех сту́дных и безме́стных, Иису́се; / но Ты, Иису́се мой, предвари́в, мя спаси́.
Иису́се Сладча́йший, спаси́ мя.
От Ада́ма, Иису́се мой, согреши́вшия вся, / пре́жде зако́на и в зако́не, Иису́се, / и по зако́не, окая́нный, и благода́ти, Иису́се мой, / победи́х страстьми́ окая́нно; / но Ты, Иису́се мой, / судьба́ми Твои́ми спаси́ мя.
Слава: Да не отлуче́н бу́ду, Иису́се мой, неизрече́нныя Твоея́ сла́вы, / да не улучу́ ча́сти, Иису́се, шу́ия, Сладча́йший Иису́се; / но Ты мя десны́м овца́м Твои́м, / Христе́ Иису́се мой, сочета́в / упоко́й, я́ко благоутро́бен.
И ныне, Богородичен: Иису́са, Богоро́дице, Его́же носи́ла еси́, / еди́на неискусому́жная Де́во Мари́е, / Того́, Чи́стая, уми́лостиви, / я́ко Сы́на Твоего́ и Зижди́теля, / изба́вити притека́ющия к Тебе́ / искуше́ний и бед, и огня́ бу́дущаго.
Иису́се, прему́дрости и смы́сла Пода́телю, / ни́щим Корми́телю, си́рым Засту́пниче, боля́щим Врачу́, / исцели́ и просвети́ мое́ се́рдце, Иису́се, / стру́пы грехо́вными и страсте́й тле́ю покрове́нное, / Иису́се, и спаси́ мя.
Богородичен: Сия́нием, Де́во, из Тебе́ возсия́вшаго Све́та, / ум мой озари́, се́рдце просвети́, / тьму грехо́вную отгоня́ющи, / и мглу ле́ности моея́ потребля́ющи.
Влады́ко Го́споди Иису́се Христе́ Бо́же наш, И́же неизрече́ннаго ра́ди Твоего́ человеколю́бия на коне́ц веко́в в плоть оболки́йся от Присноде́вы Мари́и, сла́вим о нас Твое́ спаси́тельное промышле́ние раби́ Твои́, Влады́ко; песносло́вим Тя, я́ко Тебе́ ра́ди Отца́ позна́хом; благослови́м Тя, Его́же ра́ди и Дух Святы́й в мир прии́де, поклоня́емся Твое́й по пло́ти Пречи́стей Ма́тери, такове́й стра́шней та́йне послужи́вшей; восхваля́ем Твоя́ А́нгельская ликостоя́ния, я́ко воспева́тели и служи́тели Твоего́ вели́чествия; ублажа́ем Предте́чу Иоа́нна, Тебе́ крести́вшаго, Го́споди; почита́ем и провозвести́вшия Тя проро́ки, прославля́ем апо́столы Твоя́ святы́я; торжеству́ем же и му́ченики, свяще́нники же Твоя́ сла́вим; покланя́емся преподо́бным Твои́м, и вся Твоя́ пра́ведники пе́стунствуем. Такова́го и толи́каго мно́гаго и неизрече́ннаго ли́ка Боже́ственнаго в моли́тву приво́дим Тебе́, всеще́дрому Бо́гу, раби́ Твои́, и сего́ ра́ди про́сим на́шим согреше́нием проще́ние, е́же да́руй нам всех Твои́х ра́ди святы́х, изря́днее же святы́х Твои́х щедро́т, я́ко благослове́н еси́ во ве́ки. Ами́нь.
Тебе́, Го́споди, еди́ному Благо́му и Непамятозло́бному, испове́даю грехи́ моя́, Тебе́ припа́даю вопия́, недосто́йный: согреши́х, Го́споди, согреши́х и несмь досто́ин воззре́ти на высоту́ небе́сную от мно́жества непра́вд мои́х. Но, Го́споди мой, Го́споди, да́руй ми сле́зы умиле́ния, еди́ный Бла́же и Ми́лостивый, я́ко да и́ми Тя умолю́, очи́ститися пре́жде ко́нца от вся́каго греха́: стра́шно бо и гро́зно ме́сто и́мам проити́, те́ла разлучи́вся, и мно́жество мя мра́чное и безчелове́чное де́монов сря́щет, и никто́же в по́мощь спу́тствуяй или́ избавля́яй. Тем припа́даю Твое́й бла́гости, не преда́ждь оби́дящым мя, ниже́ да похва́лятся о мне врази́ мои́, Благи́й Го́споди, ниже́ да реку́т: в ру́ки на́ша прише́л еси́, и нам пре́дан еси́. Ни, Го́споди, не забу́ди щедро́т Твои́х и не возда́ждь ми по беззако́нием мои́м, и не отврати́ лица́ Твоего́ от мене́: но Ты, Го́споди, накажи́ мя, оба́че ми́лостию и щедро́тами. Враг же мой да не возра́дуется о мне, но угаси́ eго́ на мя преще́ния и все упраздни́ eго́ де́йство, и даждь ми к Тебе́ путь неуко́рный, Благи́й Го́споди: зане́же и согреши́в, не прибего́х ко ино́му врачу́, и не простро́х руки́ моея́ к бо́гу чужде́му, не отри́ни у́бо моле́ния моего́, но услы́ши мя Твое́ю благо́стию и утверди́ мое́ се́рдце стра́хом Твои́м, и да бу́дет благода́ть Твоя́ на мне, Го́споди, я́ко огнь попаля́яй нечи́стыя во мне по́мыслы. Ты бо еси́, Го́споди, свет, па́че вся́каго све́та; ра́дость, па́че вся́кия ра́дости; упокое́ние, па́че вся́каго упокое́ния; жизнь и́стинная и спасе́ние, пребыва́ющее во ве́ки веко́в, ами́нь.
К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы. Дважды.
Слава, и ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.
Таже псалом 50: Поми́луй мя, Бо́же:
Ирмос: Во́ду проше́д я́ко су́шу, / и еги́петскаго зла избежáв, / изрáильтянин вопия́ше: / избáвителю и Бо́гу на́шему пои́м.
Пресвята́я Богоро́дице, спаси́ нас.
Мно́гими содержи́мь напáстьми, / к Тебе́ прибега́ю, спасе́ния иски́й: / о, Мáти Сло́ва и Де́во, / от тя́жких и лю́тых мя спаси́.
Пресвята́я Богоро́дице, спаси́ нас.
Страсте́й мя смущáют прило́зи, / мно́гаго уны́ния испо́лнити мою́ ду́шу; / умири́, Отрокови́це, / тишино́ю Сы́на и Бо́га Твоего́, Всенепоро́чная.
Слава: Спáса ро́ждшую Тя и Бо́га, / молю́, Де́во, избáвитися ми лю́тых: / к Тебе́ бо ны́не прибегáя, / простирáю и ду́шу и помышле́ние.
И ныне: Неду́гующа те́лом и душе́ю, / посеще́ния Боже́ственнаго и промышле́ния от Тебе́ сподо́би, еди́на Богомáти, / я́ко блага́я, Благáго же Роди́тельница.
Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты ме́не утверди́ в любви́ Твое́й, / желáний крáю, ве́рных утвержде́ние, / еди́не Человеколю́бче.
Пресвята́я Богоро́дице, спаси́ нас.
Предстáтельство и покро́в жи́зни моея́ / полагáю Тя, Богороди́тельнице Де́во: / Ты мя окорми́ ко пристáнищу Твоему́, благи́х вино́вна; / ве́рных утвержде́ние, еди́на Всепе́тая.
Пресвята́я Богоро́дице, спаси́ нас.
Молю́, Де́во, душе́вное смуще́ние и печа́ли моея́ бу́рю разори́ти: / Ты бо, Богоневе́стная, / нача́льника тишины́ Христа́ родилá еси́, еди́на Пречи́стая.
Слава: Благоде́теля ро́ждши до́брых вино́внаго, / благодея́ния бога́тство всем источи́, / вся бо мо́жеши, / я́ко си́льнаго в кре́пости Христа́ ро́ждши, Богоблаже́нная.
И ныне: Лю́тыми неду́ги и боле́зненными страстьми́ истязáему, Де́во, Ты ми помози́: / исцеле́ний бо неоску́дное Тя зна́ю сокро́вище, Пренепоро́чная, неиждивáемое.
Спаси́ от бед рабы́ Твоя́, Богоро́дице, / я́ко вси по Бо́зе к Тебе́ прибегáем, / я́ко неруши́мей стене́ и предстáтельству.
При́зри благосе́рдием, всепе́тая Богоро́дице, / на мое́ лю́тое телесе́ озлобле́ние, / и исцели́ души́ моея́ боле́знь.
Моле́ние те́плое и стенá необори́мая, / ми́лости исто́чниче, ми́рови прибе́жище, / приле́жно вопие́м Ти: / Богоро́дице Влады́чице, предвари́, / и от бед избáви нас, / еди́на вско́ре предстáтельствующая.
Ирмос: Услы́шах, Го́споди, / смотре́ния Твоего́ тáинство, / разуме́х дела́ Твоя́ / и прослáвих Твое́ Божество́.
Пресвята́я Богоро́дице, спаси́ нас.
Страсте́й мои́х смуще́ние, / ко́рмчию ро́ждшая Го́спода, / и бу́рю утиши́ мои́х прегреше́ний, Богоневе́стная.
Пресвята́я Богоро́дице, спаси́ нас.
Милосе́рдия Твоего́ бе́здну призывáющу подáждь ми, / я́же Благосе́рдаго ро́ждшая и Спáса всех пою́щих Тя.
Пресвята́я Богоро́дице, спаси́ нас.
Наслаждáющеся, Пречи́стая, Твои́х даровáний, / благодáрственное воспевáем пе́ние, / ве́дуще Тя Богомáтерь.
Слава: На одре́ боле́зни моея́ и не́мощи низлежáщу ми, / я́ко благолюби́ва, помози́, Богоро́дице, / еди́на Присноде́во.
И ныне: Наде́жду и утвержде́ние и спасе́ния сте́ну недви́жиму иму́ще Тя, Всепе́тая, / неудо́бства вся́каго избавля́емся.
Ирмос: Просвети́ нас повеле́нии Твои́ми, Го́споди, / и мы́шцею Твое́ю высо́кою / Твой мир подáждь нам, Человеколю́бче.
Пресвята́я Богоро́дице, спаси́ нас.
Испо́лни, Чи́стая, весе́лия се́рдце мое́, / Твою́ нетле́нную даю́щи ра́дость, / весе́лия ро́ждшая Вино́внаго.
Пресвята́я Богоро́дице, спаси́ нас.
Избáви нас от бед, Богоро́дице Чи́стая, / ве́чное ро́ждши избавле́ние, / и мир, всяк ум преиму́щий.
Слава: Разреши́ мглу прегреше́ний мои́х, Богоневе́сто, / просвеще́нием Твоея́ све́тлости, / Свет ро́ждшая Боже́ственный и преве́чный.
И ныне: Исцели́, Чи́стая, души́ моея́ неможе́ние, / посеще́ния Твоего́ сподо́бльшая, / и здрáвие моли́твами Твои́ми подáждь ми.
Ирмос: Моли́тву пролию́ ко Го́споду, / и Тому́ возвещу́ печа́ли моя́, / я́ко зол душа́ моя́ испо́лнися, / и живо́т мой а́ду прибли́жися, / и молю́ся я́ко Ио́на: / от тли, Бо́же, возведи́ мя.
Пресвята́я Богоро́дице, спаси́ нас.
Сме́рти и тли я́ко спасл есть, / Сам Ся издáв сме́рти, / тле́нием и сме́ртию мое́ естество́, я́то бы́вшее, Де́во, / моли́ Го́спода и Сы́на Твоего́, / враго́в злоде́йствия мя избáвити.
Пресвята́я Богоро́дице, спаси́ нас.
Предстáтельницу Тя живота́ вем и храни́тельницу тве́рду, Де́во, / и напáстей решáщу молвы́, и нало́ги бесо́в отгоня́ющу; / и молю́ся всегда́, от тли страсте́й мои́х избáвити мя.
Слава: Я́ко сте́ну прибе́жища стяжáхом, / и душ всесоверше́нное спасе́ние, / и прострáнство в ско́рбех, Отрокови́це, / и просвеще́нием Твои́м при́сно рáдуемся: / о, Влады́чице, и ны́не нас от страсте́й и бед спаси́.
И ныне: На одре́ ны́не немощству́яй лежу́, / и несть исцеле́ния пло́ти мое́й: / но, Бо́га и Спáса ми́ру и Избáвителя неду́гов ро́ждшая, / Тебе́ молю́ся, Благо́й: / от тли неду́г возстáви мя.
Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.
Не и́мамы ины́я по́мощи, / не и́мамы ины́я наде́жды, / ра́зве Тебе́, Пречи́стая Де́во. / Ты нам помози́, / на Тебе́ наде́емся, и Тобо́ю хвáлимся, / Твои́ бо есмы́ рабы́, да не постыди́мся.
Не вве́ри мя челове́ческому предстáтельству, / Пресвята́я Влады́чице, / но приими́ моле́ние раба́ Твоего́: / скорбь бо обдержи́т мя, / терпе́ти не могу́ де́монскаго стреля́ния, / покро́ва не и́мам, / ниже́ где прибе́гну, окая́нный, / всегда́ побеждáемь, / и утеше́ния не и́мам, ра́зве Тебе́, Влады́чице ми́ра, / уповáние и предстáтельство ве́рных, / не пре́зри моле́ние мое́, поле́зно сотвори́.
Ирмос: От Иуде́и доше́дше о́троцы, / в Вавило́не иногдá, / ве́рою Тро́ическою плáмень пе́щный попрáша, пою́ще: / отце́в Бо́же, благослове́н еси́.
Пресвята́я Богоро́дице, спаси́ нас.
На́ше спасе́ние я́коже восхоте́л еси́, Спáсе, устро́ити, / во утро́бу Де́выя всели́лся еси́, / Ю́же ми́ру предстáтельницу показа́л еси́: / оте́ц на́ших Бо́же, благослове́н еси́.
Пресвята́я Богоро́дице, спаси́ нас.
Воли́теля ми́лости, Его́же родилá еси́, Мáти чи́стая, / умоли́ избáвитися от прегреше́ний и душе́вных скверн ве́рою зову́щим: / оте́ц на́ших Бо́же, благослове́н еси́.
Слава: Сокро́вище спасе́ния и Исто́чник нетле́ния, Тя Ро́ждшую, / и столп утвержде́ния, и дверь покая́ния, зову́щим показа́л еси́: / оте́ц на́ших Бо́же, благослове́н еси́.
И ныне: Теле́сныя сла́бости и душе́вныя неду́ги, Богороди́тельнице, / любо́вию приступáющих к кро́ву Твоему́, Де́во, исцели́ти сподо́би, / Спáса Христа́ нам ро́ждшая.
Ирмос: Царя́ Небе́снаго, / Его́же пою́т во́и А́нгельстии, / хвали́те и превозноси́те во вся ве́ки.
Пресвята́я Богоро́дице, спаси́ нас.
По́мощи я́же от Тебе́ тре́бующия не пре́зри, Де́во, / пою́щия и превознося́щия Тя во ве́ки.
Пресвята́я Богоро́дице, спаси́ нас.
Неможе́ние души́ моея́ исцеля́еши и теле́сныя боле́зни, Де́во, / да Тя прослáвлю, Чи́стая, во ве́ки.
Слава: Исцеле́ний бога́тство изливáеши ве́рно пою́щим Тя, Де́во, / и превознося́щим неизрече́нное Твое́ рождество́.
И ныне: Напáстей Ты прило́ги отгоня́еши и страсте́й нахо́ды, Де́во: / те́мже Тя пое́м во вся ве́ки.
Ирмос: Вои́стинну Богоро́дицу / Тя испове́дуем, / спасе́ннии Тобо́ю, Де́во чи́стая, / с безпло́тными ли́ки Тя величáюще.
Пресвята́я Богоро́дице, спаси́ нас.
То́ка слез мои́х не отврати́ся, / Я́же от вся́каго лица́ вся́ку сле́зу отъе́мшаго, / Де́во, Христа́ ро́ждшая.
Пресвята́я Богоро́дице, спаси́ нас.
Ра́дости мое́ се́рдце испо́лни, Де́во, / Я́же ра́дости прие́мшая исполне́ние, / грехо́вную печа́ль потребля́ющи.
Пресвята́я Богоро́дице, спаси́ нас.
Пристáнище и предстáтельство к Тебе́ прибегáющих / бу́ди, Де́во, и стена́ неруши́мая, / прибе́жище же и покро́в и весе́лие.
Слава: Све́та Твоего́ заря́ми просвети́, Де́во, / мрак неве́дения отгоня́ющи, / благове́рно Богоро́дицу Тя испове́дающих.
И ныне: На ме́сте озлобле́ния не́мощи смири́вшагося, Де́во, исцели́, / из нездрáвия во здрáвие претворя́ющи.
И абие: Досто́йно есть:
И кадит священник жертвенник и люди, и мы поем настоящия Богородичны:
Вы́шшую небе́с, / и чи́стшую све́тлостей со́лнечных, / изба́вльшую нас от кля́твы, / Влады́чицу ми́ра / пе́сньми почти́м.
От мно́гих мои́х грехо́в / немощству́ет те́ло, / немощству́ет и душа́ моя́: / к Тебе́ прибега́ю Благода́тней, / наде́жде ненаде́жных, / Ты ми помози́.
Влады́чице и Ма́ти Изба́вителя, / приими́ моле́ние / недосто́йных раб Твои́х, / да хода́тайствуеши к Ро́ждшемуся от Тебе́. / О Влады́чице ми́ра, бу́ди Хода́таица!
Пое́м приле́жно Тебе́ песнь ны́не / всепе́той Богоро́дице ра́достно, / со Предте́чею, и все́ми святы́ми, / моли́ Богоро́дице, / е́же уще́дрити ны.
(Не́мы устне́ нечести́вых, / не покланя́ющихся о́бразу Твоему́ честно́му, / и́же напи́сан бысть от Апо́стола Луки́ свяще́ннейша, / Одиги́трии.)
Вся А́нгелов во́инства, / Предте́че Госпо́день, / апо́столов двоенадеся́тице, святи́и вси / с Богоро́дицею, сотвори́те моли́тву, / во е́же спасти́ся нам.
Таже: Трисвятое: Пресвята́я Тро́ице: по О́тче наш:
Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.
К кому́ возопию́, Влады́чице? К кому́ прибе́гну в го́рести мое́й, áще не к Тебе́, Цари́це Небе́сная? Кто плач мой и воздыха́ние мое прии́мет, áще не Ты, Пренепоро́чная, наде́ждо христиа́н и прибе́жище нам, гре́шным? Кто пáче Тебе́ в напáстех защити́т? Услы́ши у́бо стена́ние мое́, и приклони́ у́хо Твое́ ко мне, Влады́чице Мáти Бо́га моего́, и не пре́зри мене́, тре́бующаго Твоея́ по́мощи, и не отри́ни мене́, гре́шнаго. Вразуми́ и научи́ мя, Цари́це Небе́сная; не отступи́ от мене́, раба́ Твоего́, Влады́чице, за ропта́ние мое́, но бу́ди мне Мáти и засту́пница. Вручáю себе́ ми́лостивому покро́ву Твоему́: приведи́ мя, гре́шнаго, к ти́хой и безмяте́жной жи́зни, да плáчуся о гресе́х мои́х. К кому́ бо прибе́гну пови́нный аз, áще не к Тебе́, упова́нию и прибе́жищу гре́шных, наде́ждою на неизрече́нную ми́лость Твою́ и щедро́ты Твоя́ окриля́емь? О, Влады́чице Цари́це Небе́сная! Ты мне уповáние и прибе́жище, покро́в и заступле́ние и по́мощь. Цари́це моя́ преблага́я и ско́рая засту́пнице! Покры́й Твои́м хода́тайством моя́ прегреше́ния, защити́ мене́ от враг ви́димых и неви́димых; умягчи́ сердца́ злых челове́к, возстаю́щих на мя. О, Мáти Го́спода моего́ Творцá! Ты еси́ ко́рень де́вства и неувяда́емый цвет чистоты́. О, Богороди́тельнице! Ты подáждь ми по́мощь немощству́ющему плотски́ми страстьми́ и боле́знующему се́рдцем, еди́но бо Твое́ и с Тобо́ю Твоего́ Сы́на и Бо́га на́шего и́мам заступле́ние; и Твои́м пречу́дным заступле́нием да избáвлюся от вся́кия беды́ и напа́сти, о Пренепоро́чная и Пресла́вная Бо́жия Мáти Мари́е. Те́мже со упова́нием глаго́лю и вопию́: ра́дуйся, благода́тная, ра́дуйся, обра́дованная; ра́дуйся, преблагослове́нная, Госпо́дь с Тобо́ю.
Повеле́нное та́йно прие́м в ра́зуме, / в кро́ве Ио́сифове тща́нием предста́ безпло́тный, / глаго́ля Неискусобра́чней: / Приклони́вый схожде́нием небеса́, вмеща́ется неизме́нно весь в Тя. / Его́же и ви́дя в ложесна́х Твои́х / прие́мша ра́бий зрак, / ужаса́юся зва́ти Тебе́: / ра́дуйся Неве́сто Неневе́стная.
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Пресвята́я Богоро́дице, спаси́ нас.
Христо́ву кни́гу одушевле́нную, запечатле́нную Тя Ду́хом, / вели́кий Арха́нгел, Чи́стая, зря возглаша́ше Ти: / ра́дуйся, ра́дости прия́телище, / Е́юже прама́терняя кля́тва разреши́тся.
Пресвята́я Богоро́дице, спаси́ нас.
Ада́мово исправле́ние, ра́дуйся / Де́во Богоневе́сто, а́дово умерщвле́ние. / Ра́дуйся Всенепоро́чная, пала́то всех Царя́: / ра́дуйся, престо́ле о́гненный Вседержи́теля.
Слава: Цве́те неувяда́емый, ра́дуйся / еди́на прозя́бшая я́блоко благово́нное. / Ра́дуйся ро́ждшая благоуха́ние еди́наго Царя́. / Ра́дуйся Неискуобра́чная, ми́рови спасе́ние.
И ныне: Чистоты́ сокро́вище, ра́дуйся, / Е́юже от паде́ния на́шего воста́хом. / Ра́дуйся, сладкоуха́нный кри́не Влады́чице, / ве́рных благоуха́яй, кади́ло благово́нное, / и ми́ро многоце́нное.
Ирмос: Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Пресвята́я Богоро́дице, спаси́ нас.
Клас прозя́бшая Боже́ственный, я́ко ни́ва неора́нная яве, / ра́дуйся одушевле́нная трапе́зо, хлеб живо́тный вме́щшая. / Ра́дуйся, живо́тныя воды́ исто́чниче неистоща́емый, Влады́чице.
Пресвята́я Богоро́дице, спаси́ нас.
Ю́нице Юнца́ ро́ждшая непоро́чнаго, ра́дуйся ве́рным. / Ра́дуйся А́гнице, ро́ждшая Бо́жияго А́гнца, / взе́млющаго ми́ра всего́ прегреше́ния. / Ра́дуйся те́плое очисти́лище.
Слава: У́тро светле́йшее, ра́дуйся / еди́на Со́лнца нося́щая Христа́, све́та жили́ще. / Ра́дуйся, тьму разруши́вшая, / и мра́чныя бе́сы отню́д отгна́вшая.
И ныне: Ра́дуйся, две́ре еди́на, / Е́юже Сло́во про́йде еди́но, / вереи́ и врата́ а́дова, Влады́чице, Рождество́м Твои́м сокруши́вшая. / Ра́дуйся, Боже́ственный вхо́де спаса́емых, Богоневе́сто.
Ирмос: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.
Пресвята́я Богоро́дице, спаси́ нас.
Во гла́сех пе́ний, Де́во / Тебе́ вопие́м Всепе́тая: / ра́дуйся, ту́чная горо́ и усыре́нная Ду́хом. / Ра́дуйся све́щниче, и ста́мно ма́нну нося́щая, / услажда́ющая всех благочести́вых чу́вства.
Пресвята́я Богоро́дице, спаси́ нас.
Очисти́лище ми́ру, ра́дуйся, Пречи́стая Влады́чице. / Ра́дуйся ле́ствице, от земли́ всех возвы́сившая благода́тию. / Ра́дуйся мо́сте, вои́стинну преводя́й всех / от сме́рти к животу́ пою́щих Тя.
Пресвята́я Богоро́дице, спаси́ нас.
Небе́с превы́шшая, ра́дуйся, земли́ основа́ние / в Твои́х ложесна́х Пречи́стая, нетру́дно носи́вшая. / Ра́дуйся червлени́це, багряни́цу Боже́ственную омочи́вшая, / от крове́й Твои́х, Царе́ви си́лам.
Слава: Законода́вца ро́ждшая и́стиннаго, ра́дуйся Влады́чице, / беззако́ния всех ту́не очища́ющаго. / Недове́домая глубино́, высото́ неизрече́нная, браконеиску́сная, / Е́юже мы обожи́хомся.
И ныне: Тя испле́тшую ми́рови нерукоплете́нный вене́ц песносло́вим, / ра́дуйся, Тебе́ Де́во зову́ще: / храни́лище всех и огражде́ние, и утвержде́ние, / и свяще́нное прибе́жище.
Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Пресвята́я Богоро́дице, спаси́ нас.
Путь ро́ждшая жи́зни, ра́дуйся Пренепоро́чная, / от пото́па грехо́внаго мир спа́сшая: / ра́дуйся Богоневе́сто, слы́шание и глаго́лание стра́шное: / ра́дуйся пребыва́ние Влады́ки тва́ри.
Пресвята́я Богоро́дице, спаси́ нас.
Кре́пость и утвержде́ние челове́ков, ра́дуйся Пречи́стая, / ме́сто освяще́ния сла́вы, умерщвле́ние а́дово, черто́же всесве́тлый. / Ра́дуйся а́нгелов ра́досте: / ра́дуйся по́моще ве́рно моля́щихся Тебе́.
Пресвята́я Богоро́дице, спаси́ нас.
Огнеобра́зная колесни́це Сло́ва, ра́дуйся Влады́чице, / одушевле́нный раю́, дре́во посреде́ иму́щи жи́зни Го́спода, / Его́же сла́дость оживотворя́ет ве́рою причаща́ющихся, и тли подклони́вшихся.
Слава: Укрепля́еми си́лою Твое́ю, ве́рно вопие́м Ти: / ра́дуйся, гра́де всех Царя́, / пресла́вная и достослы́шанная о Не́йже глаго́лана бы́ша я́ве, горо́ несеко́мая: / ра́дуйся глубино́ неизме́римая.
И ныне: Простра́нное селе́ние Сло́ва, ра́дуйся Пречи́стая, / сосу́де, Боже́ственный би́сер произве́дшая. / Ра́дуйся, всечу́дное всех к Бо́гу примире́ние, / блажа́щих Тя Богоро́дице всегда́.
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.
Пресвята́я Богоро́дице, спаси́ нас.
Черто́же Сло́ва нескве́рный, вина́ всех обоже́ния, / ра́дуйся Пречи́стая, проро́ков оглаше́ние: / ра́дуйся, апо́столов удобре́ние.
Пресвята́я Богоро́дице, спаси́ нас.
От Тебе́ роса́ ука́ну, пла́мень многобо́жия угаси́вшая. / Тем вопие́м Ти: / ра́дуйся, руно́ одушевле́нное, е́же Гедео́н, Де́во, предви́де.
Слава: Се Тебе́ [Де́во] ра́дуйся, зове́м: / приста́нище нам бу́ди вла́ющимся, / и оти́шие в пучи́не скорбе́й, / и собла́знов всех бори́теля.
И ныне: Ра́дости вина́, облагодати́ наш по́мысл, е́же зва́ти Тебе́: / ра́дуйся неопали́мая купино́, о́блаче всесве́тлый, / ве́рныя непреста́нно осеня́ющий.
Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти раби́ Твои́, Богоро́дице, / но я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.
А́нгел предста́тель с небесе́ по́слан бысть рещи́ Богоро́дице: ра́дуйся, / и со безпло́тным гла́сом воплоща́ема Тя зря, Го́споди, ужаса́шеся / и стоя́ше, зовы́й к Ней такова́я: / Ра́дуйся, Е́юже рáдocть возсия́ет; / ра́дуйся, Е́юже кля́тва изче́знет. / Ра́дуйся, па́дшаго Ада́ма воззва́ние; / ра́дуйся, слез Е́виных избавле́ние. / Ра́дуйся, высото́ неудобовосходи́мая челове́ческими по́мыслы; / ра́дуйся, глубино́ неудобозри́мая и а́нгельскима очи́ма. / Ра́дуйся, я́ко еси́ Царе́во седа́лище; / ра́дуйся, я́ко но́сиши Нося́щаго вся. / Ра́дуйся, звездо́, явля́ющая Со́лнце; / ра́дуйся, утро́бо Боже́ственнаго воплоще́ния. / Ра́дуйся, Е́юже обновля́ется тварь; / ра́дуйся, Е́юже покланя́емся Творцу́. / Ра́дуйся, Неве́сто Неневе́стная.
Ви́дящи Свята́я Себе́ в чистоте́, / глаго́лет Гаврии́лу де́рзостно: / пресла́вное твоего́ гла́са неудобоприя́тельно души́ Мое́й явля́ется: / безсе́меннаго бо зача́тия рождество́ ка́ко глаго́леши, зовы́й: / Аллилу́ия.
Ра́зум недоразумева́емый разуме́ти Де́ва и́щущи, / возопи́ к служа́щему: / из боку́ чи́сту, Сы́ну ка́ко есть роди́тися мо́щно, рцы Ми? / К Не́йже он рече́ со стра́хом, оба́че зовы́й си́це: / Ра́дуйся, сове́та неизрече́ннаго таи́ннице; / ра́дуйся, молча́ния прося́щих ве́ро. / Ра́дуйся, чуде́с Христо́вых нача́ло; / ра́дуйся, веле́ний Его́ глави́зно. / Ра́дуйся, ле́ствице небе́сная, Е́юже сни́де Бог; / ра́дуйся, мо́сте, преводя́й су́щих от земли́ на не́бо. / Ра́дуйся, А́нгелов многослову́щее чу́до; / ра́дуйся, бесо́в многоплаче́вное пораже́ние. / Ра́дуйся, Свет неизрече́нно роди́вшая; / ра́дуйся, е́же ка́ко, ни еди́наго же научи́вшая. / Ра́дуйся, прему́дрых превосходя́щая ра́зум; / ра́дуйся, ве́рных озаря́ющая смы́слы. / Ра́дуйся, Неве́сто Неневе́стная.
Си́ла Вы́шняго осени́ тогда́ к зача́тию Браконеиску́сную, / и благопло́дная Тоя́ ложесна́, я́ко село́ показа́ сла́дкое, / всем хотя́щим жа́ти спасе́ние, всегда́ пе́ти си́це: / Аллилу́ия.
Иму́щи Богоприя́тную Де́ва утро́бу, востече́ ко Елисаве́ти; / младе́нец же о́ноя а́бие позна́в Сея́ целова́ние, ра́довашеся, / и игра́ньми я́ко пе́сньми вопия́ше к Богоро́дице: / Ра́дуйся, о́трасли неувяда́емыя розго́; / ра́дуйся, Плода́ безсме́ртнаго стяжа́ние. / Ра́дуйся, Де́лателя де́лающая человеколю́бца; / ра́дуйся, Сади́теля жи́зни на́шея ро́ждшая. / Ра́дуйся, ни́во, растя́щая гобзова́ние щедро́т; / ра́дуйся, трапе́зо, нося́щая оби́лие очище́ний. / Ра́дуйся, я́ко рай пи́щный процвета́еши; / ра́дуйся, я́ко приста́нище душа́м гото́виши. / Ра́дуйся, прия́тное моли́твы кади́ло; / ра́дуйся, всего́ ми́ра очище́ние. / Ра́дуйся, Бо́жие к сме́ртным благоволе́ние; / ра́дуйся, сме́ртных к Бо́гу дерзнове́ние. / Ра́дуйся, Неве́сто Неневе́стная.
Бу́рю внутрь име́я помышле́ний сумни́тельных, / целому́дренный Ио́сиф смяте́ся, к Тебе́ зря небра́чней, / и бракоокра́дованную помышля́я, Непоро́чная; / уве́дев же Твое́ зача́тие от Ду́ха Свя́та, рече́: / Аллилу́ия.
Слы́шаша па́стырие А́нгелов пою́щих плотско́е Христо́во прише́ствие, / и те́кше я́ко к Па́стырю ви́дят Сего́ я́ко а́гнца непоро́чна, / во чре́ве Мари́ине упа́сшася, Ю́же пою́ще ре́ша: / Ра́дуйся, А́гнца и Па́стыря Ма́ти; / ра́дуйся, дво́ре слове́сных ове́ц. / Ра́дуйся, неви́димых враго́в муче́ние; / ра́дуйся, ра́йских двере́й отверзе́ние. / Ра́дуйся, я́ко небе́сная сра́дуются земны́м; / ра́дуйся, я́ко земна́я сликовству́ют небе́сным. / Ра́дуйся, апо́столов немо́лчная уста́; / ра́дуйся, страстоте́рпцев непобеди́мая де́рзосте. / Ра́дуйся, тве́рдое ве́ры утвержде́ние; / ра́дуйся, све́тлое благода́ти позна́ние. / Ра́дуйся, Е́юже обнажи́ся ад; / ра́дуйся, Е́юже облеко́хомся сла́вою. / Ра́дуйся, Неве́сто Неневе́стная.
Боготе́чную звезду́ узре́вше волсви́, тоя́ после́доваша зари́, / и я́ко свети́льник держа́ще ю́, то́ю испыта́ху кре́пкаго Царя́, / и дости́гше Непостижи́маго, возра́довашася, Ему́ вопию́ще: / Аллилу́ия.
Ви́деша о́троцы халде́йстии на руку́ Деви́чу Созда́вшаго рука́ми челове́ки, / и Влады́ку разумева́юще Его́, а́ще и ра́бий прия́т зрак, / потща́шася дарми́ послужи́ти Ему́, и возопи́ти Благослове́нней: / Ра́дуйся, звезды́ незаходи́мыя Ма́ти; / ра́дуйся, заре́ та́инственнаго дне. / Ра́дуйся, пре́лести пещь угаси́вшая; / ра́дуйся, Тро́ицы таи́нники просвеща́ющая. / Ра́дуйся, мучи́теля безчелове́чнаго измета́ющая от нача́льства; / ра́дуйся, Го́спода человеколю́бца показа́вшая Христа́. / Ра́дуйся, ва́рварскаго избавля́ющая служе́ния; / ра́дуйся, тиме́ния изыма́ющая дел. / Ра́дуйся, огня́ поклоне́ние угаси́вшая; / ра́дуйся, пла́мене страсте́й изменя́ющая. / Ра́дуйся, ве́рных наста́внице целому́дрия; / ра́дуйся, всех родо́в весе́лие. / Ра́дуйся, Неве́сто Неневе́стная.
Пропове́дницы богоно́снии, бы́вше волсви́, / возврати́шася в Вавило́н, сконча́вше Твое́ проро́чество, / и пропове́давше Тя Христа́ всем, / оста́виша И́рода я́ко буесло́вяща, не ве́дуща пе́ти: / Аллилу́ия.
Возсия́вый во Еги́пте просвеще́ние и́стины, отгна́л еси́ лжи тьму: / и́доли бо его́, Спа́се, не терпя́ще Твоея́ кре́пости, падо́ша, / сих же изба́вльшиися вопия́ху к Богоро́дице: / Ра́дуйся, исправле́ние челове́ков; / ра́дуйся, низпаде́ние бесо́в. / Ра́дуйся, пре́лести держа́ву попра́вшая; / ра́дуйся, и́дольскую лесть обличи́вшая. / Ра́дуйся, мо́ре, потопи́вшее фарао́на мы́сленнаго; / ра́дуйся, ка́меню, напои́вший жа́ждущия жи́зни. / Ра́дуйся, о́гненный сто́лпе, наставля́яй су́щия во тьме; / ра́дуйся, покро́ве ми́ру, ши́рший о́блака. / Ра́дуйся, пи́ще, ма́нны прие́мнице; / ра́дуйся, сла́дости святы́я служи́тельнице. / Ра́дуйся, земле́ обетова́ния; / ра́дуйся, из нея́же тече́т мед и млеко́. / Ра́дуйся, Неве́сто Неневе́стная.
Хотя́щу Симео́ну от ны́нешняго ве́ка преста́витися преле́стнаго, / вда́лся еси́ я́ко младе́нец тому́, / но позна́лся еси́ ему́ и Бог соверше́нный. / Те́мже удиви́ся Твое́й неизрече́нней прему́дрости, зовы́й: / Аллилу́ия.
Но́вую показа́ тварь, / я́влься Зижди́тель нам от Него́ бы́вшим, / из безсе́менныя прозя́б утро́бы, / и сохрани́в Ю, я́коже бе, нетле́нну, / да чу́до ви́дяще, воспое́м Ю, вопию́ще: / Ра́дуйся, цве́те нетле́ния; / ра́дуйся, ве́нче воздержа́ния. / Ра́дуйся, воскресе́ния о́браз облиста́ющая; / ра́дуйся, а́нгельское житие́ явля́ющая. / Ра́дуйся, дре́во светлоплодови́тое, от него́же пита́ются ве́рнии; / ра́дуйся, дре́во благосенноли́ственное, и́мже покрыва́ются мно́зи. / Ра́дуйся, во чре́ве нося́щая Изба́вителя плене́нным; / ра́дуйся, ро́ждшая Наста́вника заблу́ждшим. / Ра́дуйся, Судии́ пра́веднаго умоле́ние; / ра́дуйся, мно́гих согреше́ний проще́ние. / Ра́дуйся, оде́ждо наги́х дерзнове́ния; / ра́дуйся, любы́, вся́кое жела́ние побежда́ющая. / Ра́дуйся, Неве́сто Неневе́стная.
Стра́нное рождество́ ви́девше, / устрани́мся ми́ра, ум на небеса́ прело́жше: / сего́ бо ра́ди высо́кий Бог на земли́ яви́ся смире́нный челове́к, / хотя́й привлещи́ к высоте́ Тому́ вопию́щия: / Аллилу́ия.
Весь бе в ни́жних / и вы́шних ника́коже отступи́ неопи́санное Сло́во: / снизхожде́ние бо Боже́ственное, / не прехожде́ние же ме́стное бысть, / и рождество́ от Де́вы Богоприя́тныя, слы́шащия сия́: / Ра́дуйся, Бо́га невмести́маго вмести́лище; / ра́дуйся, честна́го та́инства две́ри. / Ра́дуйся, неве́рных сумни́тельное слы́шание; / ра́дуйся, ве́рных изве́стная похвало́. / Ра́дуйся, колесни́це пресвята́я Су́щаго на Херуви́мех; / ра́дуйся, селе́ние пресла́вное Су́щаго на Серафи́мех. / Ра́дуйся, проти́вная в то́жде собра́вшая; / ра́дуйся, де́вство и рождество́ сочета́вшая. / Ра́дуйся, Е́юже разреши́ся преступле́ние; / ра́дуйся, Е́юже отве́рзеся рай. / Ра́дуйся, ключу́ Ца́рствия Христо́ва; / ра́дуйся, наде́ждо благ ве́чных. / Ра́дуйся, Неве́сто Неневе́стная.
Вся́кое естество́ а́нгельское удиви́ся вели́кому Твоего́ вочелове́чения де́лу; / непристу́пнаго бо я́ко Бо́га, зря́ще всем присту́пнаго Челове́ка, / нам у́бо спребыва́юща, слы́шаща же от всех: / Аллилу́ия.
Вети́я многовеща́нныя, я́ко ры́бы безгла́сныя ви́дим о Тебе́, Богоро́дице, / недоумева́ют бо глаго́лати, / е́же ка́ко и Де́ва пребыва́еши, и роди́ти возмогла́ еси́. / Мы же, та́инству дивя́щеся, ве́рно вопие́м: / Ра́дуйся, прему́дрости Бо́жия прия́телище; / ра́дуйся, промышле́ния Его́ сокро́вище. / Ра́дуйся, любому́дрыя нему́дрыя явля́ющая; / ра́дуйся, хитрослове́сныя безслове́сныя облича́ющая. / Ра́дуйся, я́ко обуя́ша лю́тии взыска́теле; / ра́дуйся, я́ко увядо́ша баснотво́рцы. / Ра́дуйся, афине́йская плете́ния растерза́ющая; / ра́дуйся, ры́барския мре́жи исполня́ющая. / Ра́дуйся, из глубины́ неве́дения извлача́ющая; / ра́дуйся, мно́ги в ра́зуме просвеща́ющая. / Ра́дуйся, кораблю́ хотя́щих спасти́ся; / ра́дуйся, приста́нище жите́йских пла́ваний. / Ра́дуйся, Неве́сто Неневе́стная.
Спасти́ хотя́ мир, И́же всех Украси́тель, / к сему́ самообетова́н прии́де, и Па́стырь сый, я́ко Бог, / нас ра́ди яви́ся по нам челове́к: / подо́бным бо подо́бное призва́в, я́ко Бог слы́шит: / Аллилу́ия.
Стена́ еси́ де́вам, Богоро́дице Де́во, и всем к Тебе́ прибега́ющим: / и́бо небесе́ и земли́ Творе́ц устро́и Тя, Пречи́стая, все́лься во утро́бе Твое́й, / и вся приглаша́ти Тебе́ научи́: / Ра́дуйся, сто́лпе де́вства; / ра́дуйся, дверь спасе́ния. / Ра́дуйся, нача́льнице мы́сленнаго назда́ния; / ра́дуйся, пода́тельнице Боже́ственныя бла́гости. / Ра́дуйся, Ты бо обнови́ла еси́ зача́тыя сту́дно; / ра́дуйся, Ты бо наказа́ла еси́ окра́денныя умо́м. / Ра́дуйся, тли́теля смы́слов упраждня́ющая; / ра́дуйся, Се́ятеля чистоты́ ро́ждшая. / Ра́дуйся, черто́же безсе́меннаго уневе́щения; / ра́дуйся, ве́рных Го́сподеви сочета́вшая. / Ра́дуйся, до́брая младопита́тельнице де́вам; / ра́дуйся, невестокраси́тельнице душ святы́х. / Ра́дуйся, Неве́сто Неневе́стная.
Пе́ние вся́кое побежда́ется, / спростре́тися тща́щееся ко мно́жеству мно́гих щедро́т Твои́х: / равночи́сленныя бо песка́ пе́сни а́ще прино́сим Ти, Царю́ святы́й, / ничто́же соверша́ем досто́йно, / я́же дал еси́ нам, Тебе́ вопию́щим: / Аллилу́ия.
Светоприе́мную свещу́, су́щим во тьме я́вльшуюся, зрим святу́ю Де́ву, / невеще́ственный бо вжига́ющи огнь, / наставля́ет к ра́зуму Боже́ственному вся, / заре́ю ум просвеща́ющая, зва́нием же почита́емая, си́ми: / Ра́дуйся, луче́ у́мнаго Со́лнца; / ра́дуйся, свети́ло незаходи́маго Све́та. / Ра́дуйся, мо́лние, ду́ши просвеща́ющая; / ра́дуйся, яко́ гром, враги́ устраша́ющая. / Ра́дуйся, я́ко многосве́тлое возсиява́еши просвеще́ние; / ра́дуйся, я́ко многотеку́щую источа́еши реку́. / Ра́дуйся, купе́ли живопису́ющая о́браз; / ра́дуйся, грехо́вную отъе́млющая скве́рну. / Ра́дуйся, ба́не, омыва́ющая со́весть; / ра́дуйся, ча́ше, че́рплющая рáдocть. / Ра́дуйся, обоня́ние Христо́ва благоуха́ния; / ра́дуйся, животе́ та́йнаго весе́лия. / Ра́дуйся, Неве́сто Неневе́стная.
Благода́ть да́ти восхоте́в, долго́в дре́вних, / всех долго́в Реши́тель челове́ком, / прии́де Собо́ю ко отше́дшим Того́ благода́ти, и раздра́в рукописа́ние, / слы́шит от всех си́це: / Аллилу́ия.
Пою́ще Твое́ Рождество́, хва́лим Тя вси, / я́ко одушевле́нный храм, Богоро́дице: / во Твое́й бо всели́вся утро́бе содержа́й вся руко́ю Госпо́дь, / освяти́, просла́ви и научи́ вопи́ти Тебе́ всех: / Ра́дуйся, селе́ние Бо́га и Сло́ва; / ра́дуйся, свята́я святы́х бо́льшая. / Ра́дуйся, ковче́же, позлаще́нный Ду́хом; / ра́дуйся, сокро́вище живота́ неистощи́мое. / Ра́дуйся, че́стный ве́нче царе́й благочести́вых; / ра́дуйся, честна́я похвало́ иере́ев благогове́йных. / Ра́дуйся, Це́ркве непоколеби́мый сто́лпе; / ра́дуйся, Ца́рствия неруши́мая стено́. / Ра́дуйся, Е́юже воздви́жутся побе́ды; / ра́дуйся, Е́юже низпа́дают врази́. / Ра́дуйся, те́ла моего́ врачева́ние; / ра́дуйся, души́ моея́ спасе́ние. / Ра́дуйся, Неве́сто Неневе́стная.
О, Всепе́тая Ма́ти, ро́ждшая всех святы́х Святе́йшее Сло́во! / Ны́нешнее прие́мши приноше́ние, от вся́кия изба́ви напа́сти всех, / и бу́дущия изми́ му́ки, о Тебе́ вопию́щих: / Аллилу́ия.
Сей кондак глаголи трижды. И паки чтется 1-й икос: А́нгел предста́тель: и паки 1-й кондак: Взбра́нной Воево́де:
Ирмос: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси.
Пресвята́я Богоро́дице, спаси́ нас.
Воспева́ем Тя вопию́ще: / ра́дуйся, колесни́це со́лнца у́мнаго, / лозо́ и́стинная, грозд зре́лый возде́лавшая, вино́ источа́ющий, / ду́ши веселя́щее ве́рою Тя сла́вящих.
Пресвята́я Богоро́дице, спаси́ нас.
Врача́ всех челове́к ро́ждшая, ра́дуйся Богоневе́сто, / же́зле та́йный, цвет неувяда́емый процве́тший, / ра́дуйся Влады́чице, Е́юже ра́дости наполня́емся, и жизнь насле́дствуем.
Пресвята́я Богоро́дице, спаси́ нас.
Вети́йствующий не мо́жет язы́к, Влады́чице, песносло́вити Тя, / па́че бо серафи́мов возвы́силася еси́, ро́ждши Царя́ Христа́. / Его́же моли́ гра́ду сему́ изба́витися от мно́гих искуше́ний.
Слава: Хва́лят Тя блажа́ще концы́, и любо́вию зову́т Тебе́: / ра́дуйся сви́тче, в не́мже пе́рстом О́тчим написа́ся Сло́во, Чи́стая. / Его́же моли́, в кни́зе живо́тней / рабо́м Твои́м написа́тися Богоро́дице.
И ныне: Мо́лим, раби́ Твои́, и приклоня́ем коле́но се́рдца на́шего: / приклони́ у́хо Твое́, Чи́стая, / и спаси́ скорбьми́ погружа́емыя при́сно, / и соблюди́ от вся́каго вра́жия плене́ния Твой град, Богоро́дице.
Ирмос: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.
Пресвята́я Богоро́дице, спаси́ нас.
Ложесны́ Сло́во прия́ла еси́, / вся нося́щаго носи́ла еси́, / млеко́м пита́ла еси́, / ма́нием пита́ющаго вселе́нную всю, Чи́стая, Ему́же пое́м: / Го́спода по́йте дела́, и превозноси́те во вся ве́ки.
Пресвята́я Богоро́дице, спаси́ нас.
Моисе́й уразуме́ в купине́ вели́кое та́инство Рождества́ Твоего́: / о́троцы же прообрази́ша сие́ я́вственнее / посреде́ огня́ стоя́ще, и не опаля́еми, нетле́нная свята́я Де́во. / Тем Тя почита́ем во вся ве́ки.
Пресвята́я Богоро́дице, спаси́ нас.
Пре́жде пре́лестию обнажи́вшиися / в ри́зу нетле́ния облеко́хомся Рождество́м Твои́м: / и седя́щии во тьме прегреше́ний, свет ви́дехом, / све́та жили́ще, Отрокови́це. / Тем Тя пое́м во вся ве́ки.
Слава: Ме́ртвии Тобо́ю оживля́ются, / Жизнь бо ипоста́сную родила́ еси́, / неми́и пре́жде, благоглаго́ливи быва́ют, / прокаже́ннии очища́ются, неду́зи отгоня́ются, / духо́в возду́шных мно́жества побежда́ются, / Де́во, челове́ков спасе́ние.
И ныне: Ми́ру ро́ждшая спасе́ние, / и́мже от земли́ на высоту́ взя́ти бы́хом, / ра́дуйся всеблагослове́нная, покро́ве и держа́во, / стено́ и утвержде́ние пою́щим, Чи́стая: / Го́спода по́йте дела́, и превозноси́те во вся ве́ки.
Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.
Пресвята́я Богоро́дице, спаси́ нас.
Да Тебе́, ве́рнии, ра́дуйся зове́м, / Тобо́ю ра́дости прича́стницы бы́вше присносу́щныя, / изба́ви нас напа́стей, ва́рварскаго плене́ния, и вся́кия ины́я ра́ны, / за мно́жество, Отрокови́це, прегреше́ний, / находя́щия челове́ком согреша́ющим.
Пресвята́я Богоро́дице, спаси́ нас.
Яви́лася еси́ просвеще́ние на́ше и утвержде́ние. / Те́мже вопие́м Ти: / ра́дуйся звездо́ незаходи́мая, вводя́щая в мир вели́кое Со́лнце. / Ра́дуйся, Еде́м отве́рзшая заключе́нный, Чи́стая. / Ра́дуйся сосу́де, ми́ро неистощи́мое на Тя излия́нное прие́мший.
Пресвята́я Богоро́дице, спаси́ нас.
Ста́нем благогове́йно в дому́ Бо́га на́шего, и возопии́м: / ра́дуйся, ми́ру Влады́чице. / Ра́дуйся Мари́е, Госпоже́ всех нас. / Ра́дуйся, еди́на непоро́чная в жена́х и до́брая. / Ра́дуйся, сто́лпе о́гненный, вводя́щий в вы́шнюю жизнь челове́чество.
Слава: Голуби́це Ми́лостиваго ро́ждшая, ра́дуйся Присноде́во: / преподо́бных всех, ра́дуйся похвало́, страда́льцев венча́ние. / Ра́дуйся всех пра́ведных Боже́ственное удобре́ние, / и нам ве́рным спасе́ние.
И ныне: Пощади́, Бо́же, насле́дие Твое́, / грехи́ на́ша вся презре́в ны́не, / на сие́ име́я моля́щую Тя, / на земли́ безсе́менно Тебе́ Ро́ждшую, / вели́кия ра́ди ми́лости восхоте́вшаго / вообрази́тися, Христе́, в челове́чество.
Игра́йте ликовству́юще, с весе́лием воспо́йте, / Гаврии́л Де́ве ра́дость принося́й предста́, / в Назаре́те ны́не гра́де ра́дость благове́щения: / ра́дуйся, чи́стая и непоро́чная, ми́ра предста́тельство: / ра́дуйся, небе́сный престо́ле.
Приими́, всеблагомо́щная, пречи́стая госпоже́ Влады́чице Богороди́тельнице, сия́ честны́я да́ры, Тебе́ еди́ней прикла́дныя, от нас недосто́йных рабо́в Твои́х, от всех родо́в избра́нная, всех тва́рей небе́сных и земны́х вы́шшая я́вльшаяся. Поне́же бо Тебе́ ра́ди бысть Госпо́дь сил с на́ми, и Тобо́ю Сы́на Бо́жия позна́хом, и сподо́бихомся свята́го Те́ла Его́, и пречи́стыя Кро́ве Его́. Те́мже блаже́нна еси́ в ро́дех родо́в, богоблаже́нная, херуви́мов светле́йши, и серафи́мов честне́йши су́щая. И ны́не, всепе́тая Пресвята́я Богоро́дице, не преста́й моля́щися о нас недосто́йных рабе́х Твои́х, е́же изба́витися нам от вся́каго сове́та лука́ваго, и от вся́каго обстоя́ния: и сохрани́тися нам неврежде́нным от вся́каго ядови́таго прило́га диа́вольскаго. Но да́же до конца́ моли́твами Твои́ми неосужде́нных нас соблюди́: я́ко да Твои́м заступле́нием и по́мощию спаса́еми, сла́ву, хвалу́, благодаре́ние и поклоне́ние за вся, в Тро́ице еди́ному Бо́гу и всех Созда́телю возсыла́ем, ны́не и при́сно, и во ве́ки веко́в. Ами́нь.
О, Пресвята́я Госпоже́ Влады́чице Богоро́дице, вы́шши еси́ всех А́нгел и Арха́нгел, и всея́ тва́ри честне́йши, помо́щнице еси́ обиди́мых, ненаде́ющихся наде́яние, убо́гих засту́пнице, печа́льных утеше́ние, а́лчущих корми́тельнице, наги́х одея́ние, больны́х исцеле́ние, гре́шных спасе́ние, христиа́н всех поможе́ние и заступле́ние. О, Всеми́лостивая Госпоже́, Де́во Богоро́дице Влады́чице, ми́лостию Твое́ю спаси́ и поми́луй святе́йшия патриа́рхи правосла́вныя, преосвяще́нныя митрополи́ты, архиепи́скопы и епи́скопы и весь свяще́ннический и и́ноческий чин, и вся правосла́вныя христиа́ны ри́зою Твое́ю честно́ю защити́; и умоли́, Госпоже́, из Тебе́ без се́мене воплоти́вшагося Христа́ Бо́га на́шего, да препоя́шет нас си́лою Свое́ю свы́ше, на неви́димыя и ви́димыя враги́ на́ша. О, Всеми́лостивая Госпоже́ Влады́чице Богоро́дице! Воздви́гни нас из глубины́ грехо́вныя и изба́ви нас от гла́да, губи́тельства, от тру́са и пото́па, от огня́ и меча́, от нахожде́ния иноплеме́нных и междоусо́бныя бра́ни, и от напра́сныя сме́рти, и от нападе́ния вра́жия, и от тлетво́рных ветр, и от смертоно́сныя я́звы, и от вся́каго зла. Пода́ждь, Госпоже́, мир и здра́вие рабо́м Твои́м, всем правосла́вным христиа́ном, и просвети́ им ум, и о́чи серде́чныя, е́же ко спасе́нию; и сподо́би ны, гре́шныя рабы́ Твоя́, Ца́рствия Сы́на Твоего́, Христа́ Бо́га на́шего; я́ко держа́ва Его́ благослове́на и препросла́влена, со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Моли́твами свя́тых оте́ц на́ших, Го́споди Иису́се Христе́ Бо́же наш, поми́луй нас. Ами́нь.
Царю́ Небе́сный: Трисвятое. Пресвята́я Тро́ице: Сла́ва, и ны́не: Отче наш: Го́споди, поми́луй (12). Сла́ва, и ны́не: Прииди́те, поклони́мся: (3) Псалом 50.
Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.
Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Святи́телю о́тче Нико́лае, моли́ Бо́га о нас.
Па́стырю до́брый Христо́ва ста́да, ра́дуйся, Нико́лае, / я́ко ми́ряном оте́ц че́стен и учи́тель был еси́, / и мне пода́ждь, ра́дуйся тебе́ приноси́ти.
Святи́телю о́тче Нико́лае, моли́ Бо́га о нас.
Ро́ди земни́и стеце́мся, / ра́дуйся приноси́ти святи́телю, / ра́дость бо прино́сит вселе́нней неоску́дно.
Слава: Изба́вльшему три воево́ды от убие́ния непра́веднаго вопие́м ти: / ра́дуйся, Нико́лае, засту́пниче прибега́ющим под кров твой.
И ныне: Богоро́дице Де́во, ра́дуйся, / ра́дость от А́нгела прие́мшая, / и спаси́ Тебе́ велича́ющих.
Ирмос: Твоя́ песносло́вцы, Богоро́дице, / живы́й и незави́стный исто́чниче, / лик Себе́ совоку́пльшия духо́вно, утверди́, / в Боже́ственней Твое́й сла́ве / венце́в сла́вы сподо́би.
Святи́телю о́тче Нико́лае, моли́ Бо́га о нас.
Никто́же прибега́яй под кров наде́жды твоея́, о́тче, тощь от тебе́ исхо́дит, / но ра́дуйся принося́ ти, по́мощь прие́млет, Нико́лае, / ю́же и мне пода́ждь, всеблаже́нне.
Святи́телю о́тче Нико́лае, моли́ Бо́га о нас.
А́нгели дивя́тся твоему́, преподо́бне, те́плому заступле́нию, / челове́цы же ра́дуются, прие́млюще моли́твами твои́ми избавле́ние от напа́стей бесовских, / те́мже ра́дуйся, прино́сим ти, Нико́лае прехва́льне.
Слава: Шлем, и ору́жие непобеди́мое на диа́вола ты еси́, / христиа́ном же утвержде́ние, и иера́рхом удобре́ние, Нико́лае чу́дне; / ра́дуйся, чудотво́рче вели́кий, обурева́емым ти́хое приста́нище.
И ныне: Заче́нши Зижди́теля Своего́, Богоро́дице, / родила́ еси́ Творца́ всех и Го́спода, / Того́ моли́ изба́вити нас от напа́стей; / ели́ка бо хо́щеши, вся мо́жеши, / я́ко блага́я Блага́го же Роди́тельница.
Ирмос: Седя́й в сла́ве на Престо́ле Божества́, / во о́блаце ле́гце, / прии́де Иису́с Пребоже́ственный, / нетле́нною дла́нию, и спасе́ зову́щия: / сла́ва, Христе́, си́ле Твое́й.
Святи́телю о́тче Нико́лае, моли́ Бо́га о нас.
Апо́столом равнопресто́льне, ра́дуйся, Нико́лае, / я́ко А́риеву е́ресь посрами́л еси́, / и велиа́рова шата́ния низложи́л еси́, твои́ми моли́твами; / не преста́й моля́ о рабе́х твои́х.
Святи́телю о́тче Нико́лае, моли́ Бо́га о нас.
Ю́ношу о́наго от руки́ Ами́ры срацы́нскаго изба́вил еси́, / роди́телем же его́ ра́дость дарова́л еси́, / тем ти с ни́ми и мы ра́дуйся прино́сим, Нико́лае преподо́бне.
Слава: Три воево́ды от убие́ния непра́веднаго, чудотво́рче, спасл еси́, / я́влься во сне царю́ благочести́вому, и запрети́в ему́, / и от них ра́дуйся, прия́л еси́, Нико́лае, / и мене́ укрепи́ твои́ми моли́твами.
И ныне: Преблагослове́нная Богоро́дице, ра́дуйся, / я́ко еси́ Царя́ всех престо́л, херуви́мов вы́шший, / не закосни́, моля́ Своего́ Сы́на и Бо́га на́шего, / о чту́щих Тя при́сно, с Никола́ем блаже́нным.
Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Святи́телю о́тче Нико́лае, моли́ Бо́га о нас.
Апо́столов тезоиме́нне, / со А́нгелы равностоя́телю Престо́ла Влады́чня неотсту́пне, / А́рия безу́мновавшаго посрами́л еси́; / сего́ ра́ди вопие́м ти, Нико́лае, ра́дуйся, / святи́телем удобре́ние и сто́лпе церко́вный.
Святи́телю о́тче Нико́лае, моли́ Бо́га о нас.
Ру́ку ми даждь, Нико́лае, по́мощи, моля́ся ко Го́споду, / зане́же бу́ря потопля́ет мя грехо́вная, / и приведи́ к ти́хому приста́нищу покая́ния, о́тче, твои́ми моли́твами.
Слава: А́ще и мно́го беззако́нновах, Нико́лае, / но не отступа́ю наде́жды покро́ва твоего́, / всегда́ ра́дуйся, принося́ ти; / ты мя изба́ви от вся́кия ско́рби и беды́, / ели́ка бо хо́щеши, вся мо́жеши.
И ныне: О́блаче превы́шший небе́с, ра́дуйся, / иска́пающий нам ка́плю, Богоро́дице всеблага́я, / пода́ждь от Бо́га лю́дем на́шим побе́ду на ва́рвары, / со иера́рхом Никола́ем Того́ моля́.
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.
Святи́телю о́тче Нико́лае, моли́ Бо́га о нас.
Друг Христо́в и вторы́й Петр, яви́лся еси́, о́тче, ра́дуйся, / я́ко еси́ столп церко́вный и чуде́сный орга́н, / Ду́хом Святы́м чудоде́йствуяй и бряца́яй: / те́мже, Нико́лае, ра́дуйся прино́сим ти всегда́.
Святи́телю о́тче Нико́лае, моли́ Бо́га о нас.
Услы́шав Константи́н царь благочести́вый во сне преще́ния твоя́, со Авла́вием епа́рхом, / о муже́х о́нех непра́ведно име́вших поги́бнути, / вско́ре повеле́ отпусти́ти их, / тебе́ же ра́дуйся вопия́ше, Нико́лае.
Слава: Кораблю́ о́ному потопа́ющу в мо́ри ты, о́тче, был еси́ ко́рмчий, / и мне лю́те обурева́ему от помышле́ний бесо́вских, / даждь я́дрило блага́го ра́зума во уме́ и в се́рдце, / я́ко да всегда́ ра́дуйся приношу́ ти, Нико́лае прехва́льне.
И ныне: Ра́дуйся, Пречи́стая Де́во, / ра́дуйся, мiру утвержде́ние, / ра́дуйся, я́ко родила́ еси́ Сы́на, всех Бо́га, / Того́ моли́, Богоро́дице пренепоро́чная, / спасти́ся душа́м на́шим.
Кондак 1: Возбра́нный чудотво́рче и изря́дный уго́дниче Христо́в, / мiру всему́ источа́яй многоце́нное ми́лости мv́ро и неисчерпа́емое чуде́с мо́ре, / восхваля́ю тя любо́вию, святи́телю Нико́лае; / ты же, я́ко име́яй дерзнове́ние ко Го́споду, / от вся́ких мя бед свободи́, да зову́ ти:
Ра́дуйся, Нико́лае, вели́кий чудотво́рче.
Икос 1: А́нгела о́бразом, земна́го су́ща естество́м яви́ тебе́ всея́ тва́ри Созда́тель, / благопло́дную бо добро́ту души́ твоея́ прови́дев, преблаже́нне Нико́лае, / научи́ всех вопи́ти тебе́ си́це:
Ра́дуйся, от утро́бы ма́терния очище́нный; / ра́дуйся, да́же до конца́ освяще́нный. / Ра́дуйся, рожде́нием свои́м роди́телей удиви́вый; / ра́дуйся, си́лу душе́вную а́бие по рождестве́ яви́вый. / Ра́дуйся, са́де земли́ обетова́ния; / ра́дуйся, цве́те Боже́ственнаго сажде́ния. / Ра́дуйся, лозо́ доброде́тельная виногра́да Христо́ва; / ра́дуйся, дре́во чудото́чное рая́ Иису́сова. / Ра́дуйся, кри́не ра́йскаго прозябе́ния; / ра́дуйся, мv́ро Христо́ва благоуха́ния. / Ра́дуйся, я́ко тобо́ю отго́нится рыда́ние; / ра́дуйся, я́ко тобо́ю прино́сится ра́дование.
Ра́дуйся, Нико́лае, вели́кий чудотво́рче.
Кондак 2: Ви́дяще твои́х мvр излия́ние, богому́дре, / просвеща́емся душа́ми и телесы́, / ди́внаго тя мvрото́чца живоно́сна, Нико́лае, разуме́юще. / Чудесы́ бо я́ко вода́ми, благода́тию Бо́жиею излива́ющимися, / напая́еши ве́рно вопию́щих к Бо́гу: Аллилу́иа.
Икос 2: Ра́зум неуразуме́нный вразумля́я о Святе́й Тро́ице, / был еси́ в Нике́и со святы́ми отцы́ / побо́рник испове́дания правосла́вныя ве́ры: / ра́вна бо Отцу́ Сы́на испове́дал еси́, соприсносу́щна и сопресто́льна, / А́рия же безу́мнаго обличи́л еси́. / Сего́ ра́ди ве́рнии научи́шася воспева́ти тебе́:
Ра́дуйся, вели́кий благоче́стия сто́лпе; / ра́дуйся, ве́рных прибе́жища гра́де. / Ра́дуйся, тве́рдое правосла́вия укрепле́ние; / ра́дуйся, честно́е Пресвяты́я Тро́ицы носи́ло и похвале́ние. / Ра́дуйся, Отцу́ равноче́стна Сы́на пропове́давый; / ра́дуйся, А́рия возбеси́вшагося от собо́ра святы́х отгна́вый. / Ра́дуйся, о́тче, отце́в сла́вная красото́; / ра́дуйся, всех богому́дрых прему́драя добро́то. / Ра́дуйся, о́гненная словеса́ испуща́яй; / ра́дуйся, до́бре ста́до свое́ наставля́яй. / Ра́дуйся, я́ко тобо́ю ве́ра утвержда́ется; / ра́дуйся, я́ко тобо́ю е́ресь низлага́ется.
Ра́дуйся, Нико́лае, вели́кий чудотво́рче.
Кондак 3: Си́лою, да́нною ти свы́ше, / сле́зу вся́ку отъя́л еси́ от лица́ лю́те стра́ждущих, / богоно́се о́тче Нико́лае: / а́лчущим бо яви́лся еси́ корми́тель, / в пучи́не морсте́й су́щим изря́дный прави́тель, / неду́гующим исцеле́ние и всем всяк помо́щник показа́лся еси́, / вопию́щим Бо́гу: Аллилу́иа.
Икос 3: Име́яше вои́стинну, о́тче Нико́лае, / с небесе́ песнь тебе́ воспева́ема бы́ти, а не от земли́, / ка́ко бо кто от челове́к возмо́жет твоея́ святы́ни вели́чия пропове́дати? / Но мы, любо́вию твое́ю побежда́еми, вопие́м ти си́це:
Ра́дуйся, о́бразе а́гнцев и па́стырей; / ра́дуйся, свято́е очисти́лище нра́вов. / Ра́дуйся, доброде́телей вели́ких вмести́лище; / ра́дуйся, святы́ни чи́стое и честно́е жили́ще. / Ра́дуйся, свети́льниче всесве́тлый и вселюби́мый; / ра́дуйся, све́те златоза́рный и непоро́чный. / Ра́дуйся, досто́йный А́нгелов собесе́дниче; / ра́дуйся, до́брый челове́ков наста́вниче. / Ра́дуйся, пра́вило ве́ры благочести́выя; / ра́дуйся, о́бразе кро́тости духо́вныя. / Ра́дуйся, я́ко тобо́ю от страсте́й теле́сных избавля́емся; / ра́дуйся, я́ко тобо́ю сла́достей духо́вных исполня́емся.
Ра́дуйся, Нико́лае, вели́кий чудотво́рче.
Кондак 4: Бу́ря недоуме́ния смуща́ет ми ум, / ка́ко досто́йно есть пе́ти чудеса́ твоя́, блаже́нне Нико́лае? / Никто́же бо мо́жет я́ исчести́, / а́ще бы и мно́ги язы́ки име́л и глаго́лати восхоте́л. / Но мы ди́вно Бо́гу в тебе́ прославля́ющемуся, / дерза́ем воспева́ти: Аллилу́иа.
Икос 4: Слы́шаша, богому́дре Нико́лае, / бли́жнии и да́льнии вели́чие чуде́с твои́х, / я́ко по возду́ху ле́гкими благода́тными крила́ми / навы́кл еси́ су́щих в беда́х предваря́ти, / ско́ро от тех избавля́я всех, вопию́щих к тебе́ такова́я:
Ра́дуйся, избавле́ние от печа́ли; / ра́дуйся, подая́ние благода́ти. / Ра́дуйся, неча́емых зол прогони́телю; / ра́дуйся, жела́емых благи́х насади́телю. / Ра́дуйся, ско́рый уте́шителю в беде́ су́щих; / ра́дуйся, стра́шный наказа́телю оби́дящих. / Ра́дуйся, чуде́с пучи́но, Бо́гом излия́нная; / ра́дуйся, зако́на Христо́ва скрижа́ли Бо́гом пи́санныя. / Ра́дуйся, кре́пкое па́дающих возведе́ние; / ра́дуйся, пра́во стоя́щих утвержде́ние. / Ра́дуйся, я́ко тобо́ю вся́кая лесть обнажа́ется; / ра́дуйся, я́ко тобо́ю вся́кая и́стина сбыва́ется.
Ра́дуйся, Нико́лае, вели́кий чудотво́рче.
Кондак 5: Боготе́чная звезда́ яви́лся еси́, / наставля́я по мо́рю пла́вающих лю́те, / и́мже смерть предстоя́ше вско́ре иногда́, / а́ще не бы ты предста́л еси́ призыва́ющим тя в по́мощь, / чудотво́рче святы́й Нико́лае; / уже́ бо несты́дно бесо́м лета́ющим и погрузи́ти корабли́ хотя́щим запрети́в, отгна́л еси́ их, / ве́рныя же научи́л еси́ спаса́ющему тобо́ю Бо́гу взыва́ти: Аллилу́иа.
Икос 5: Ви́деша отрокови́цы, на брак скве́рный нищеты́ ра́ди угото́ванныя, / вели́кое твое́ к ни́щим милосе́рдие, преблаже́нне о́тче Нико́лае, / егда́ ста́рцу роди́телю их но́щию узельцы́ три зла́та тая́ся по́дал еси́, / самаго́ со дще́рьми избавля́я от паде́ния грехо́внаго. / Того́ ра́ди слы́шиши от всех си́це:
Ра́дуйся, ми́лости превели́кия сокро́вище; / ра́дуйся, промышле́ния о лю́дех прия́телище. / Ра́дуйся, пи́ще и отра́до к тебе́ прибега́ющих; / ра́дуйся, хле́бе неснеда́емый а́лчущих. / Ра́дуйся, бога́тство, бе́дне живу́щим на земли́ Бо́гом да́нное; / ра́дуйся, воздви́жение ско́рое убо́гих. / Ра́дуйся, бы́строе ни́щих услы́шание; / ра́дуйся, скорбя́щих прия́тное попече́ние; / ра́дуйся, трие́х дев непоро́чный невести́телю; / ра́дуйся, чистоты́ усе́рдный храни́телю. / Ра́дуйся, ненаде́жных наде́яние; / ра́дуйся, всего́ мiра наслажде́ние.
Ра́дуйся, Нико́лае, вели́кий чудотво́рче.
Кондак 6: Пропове́дует мiр весь тебе́, преблаже́нне Нико́лае, / ско́раго в беда́х засту́пника, / я́ко мно́гажды во еди́ном часе́ / по земли́ путеше́ствующим и по мо́рю пла́вающим, предваря́я, посо́бствуеши, / ку́пно всех от злых сохраня́я, вопию́щих к Бо́гу: Аллилу́иа.
Икос 6: Возсия́л еси́ свет живо́тный, избавле́ние нося́ воево́дам, / непра́ведную смерть прия́ти иму́щим, / тебе́, до́брый па́стырю Нико́лае, призыва́ющим, / егда́ вско́ре я́влься во сне царе́ви, устраши́л еси́ его́, / сих же неврежде́нных отпусти́ти повеле́л еси́. / Сего́ ра́ди с ни́ми ку́пно и мы благода́рственно вопие́м ти:
Ра́дуйся, усе́рдно призыва́ющим тя помога́яй; / ра́дуйся, от непра́веднаго убие́ния избавля́яй. / Ра́дуйся, от ле́стныя сохраня́яй клеветы́; / ра́дуйся, непра́ведныя разруша́яй сове́ты. / Ра́дуйся, растерза́яй лжу я́ко паучи́ну; / ра́дуйся, возноша́яй сла́вно и́стину. / Ра́дуйся, непови́нных от уз разреше́ние; / ра́дуйся, и мертвеце́в оживле́ние. / Ра́дуйся, прояви́телю пра́вды; / ра́дуйся, помрачи́телю непра́вды. / Ра́дуйся, я́ко тобо́ю непови́ннии изба́влени от меча́; / ра́дуйся, я́ко тобо́ю наслади́шася све́та.
Ра́дуйся, Нико́лае, вели́кий чудотво́рче.
Кондак 7: Хотя́ богоху́льное ерети́ческое отгна́ти злосмра́дие, / мv́ро вои́стинну благово́нное, та́инственное яви́лся еси́, Нико́лае: / лю́ди мире́йския па́сый, весь мiр свои́м благода́тным мv́ром испо́лнил еси́. / И от нас у́бо богоме́рзкое грехо́вное злосмра́дие отжени́, / да благоприя́тно Бо́гу вопие́м: Аллилу́иа.
Икос 7: Но́ваго тя Но́я, наста́вника ковче́га спаси́тельнаго разуме́ем, / о́тче святы́й Нико́лае, / бу́рю всех лю́тых разгоня́ющаго направле́нием свои́м, / тишину́ же Боже́ственную принося́щаго вопию́щим такова́я:
Ра́дуйся, обурева́емых ти́хое приста́нище; / ра́дуйся, утопа́ющих изве́стное храни́лище. / Ра́дуйся, пла́вающих посреде́ пучи́н до́брый ко́рмчий; / ра́дуйся, треволне́ния морска́я уставля́ющий. / Ра́дуйся, превожде́ние су́щих в ви́хрех; / ра́дуйся, согре́яние су́щих во мра́зех. / Ра́дуйся, сия́ние, ско́рбный мрак разгоня́ющее; / ра́дуйся, свети́ло, вся концы́ земли́ просвеща́ющее. / Ра́дуйся, от бе́здны грехо́вныя челове́ки избавля́яй; / ра́дуйся, в бе́здну а́дскую сатану́ вверга́яй. / Ра́дуйся, я́ко тобо́ю дерзнове́нно бе́здну милосе́рдия Бо́жия призыва́ем; / ра́дуйся, я́ко тобо́ю от пото́па гне́ва изба́вльшеся, мир с Бо́гом обрета́ем.
Ра́дуйся, Нико́лае, вели́кий чудотво́рче.
Кондак 8: Стра́нное чу́до явля́ется притека́ющим к тебе́, блаже́нне Нико́лае, / свяще́нная твоя́ це́рковь, / в ней бо и ма́лое моле́ние принося́ще, / ве́лиих неду́гов прие́млем исцеле́ние, / а́ще то́кмо по Бо́зе упова́ние на тя возложи́м, / ве́рно вопию́ще: Аллилу́иа.
Икос 8: Весь еси́ всем вои́стинну помо́щник, богоно́се Нико́лае, / и собра́л еси́ вку́пе вся прибега́ющия к тебе́, / я́ко свободи́тель, пита́тель и врач ско́рый всем земны́м, / на похвалу́ всех воздвиза́я вопи́ти к тебе́ си́це:
Ра́дуйся, вся́ких исцеле́ний исто́чниче; / ра́дуйся, лю́те стра́ждущим помо́щниче. / Ра́дуйся, заре́, сия́ющая в нощи́ грехо́вней блужда́ющим; / ра́дуйся, росо́ небото́чная в зно́и трудо́в су́щим. / Ра́дуйся, подава́яй тре́бующим благострое́ние; / ра́дуйся, уготовля́яй прося́щим изоби́лие. / Ра́дуйся, мно́гажды проше́ние предваря́яй; / ра́дуйся, ста́рым седи́нам си́лу обновля́яй. / Ра́дуйся, мно́гих заблу́ждших от пути́ и́стиннаго обличи́телю; / ра́дуйся, та́ин Бо́жиих ве́рный служи́телю. / Ра́дуйся, я́ко тобо́ю за́висть попира́ем; / ра́дуйся, я́ко тобо́ю благонра́вное житие́ исправля́ем.
Ра́дуйся, Нико́лае, вели́кий чудотво́рче.
Кондак 9: Вся́кия утоли́ боле́зни, / вели́кий наш засту́пниче, Нико́лае, / растворя́я благода́тная врачева́ния, услажда́ющая ду́ши на́ша, / сердца́ же веселя́щая всех усе́рдно к по́мощи твое́й притека́ющих, / Бо́гу же вопию́щих: Аллилу́иа.
Икос 9: Вети́я суему́дренныя нечести́вых / ви́дим тобо́ю посра́мленныя, богому́дре о́тче Нико́лае, / А́рия бо ху́льника, разделя́юща Божество́, / и Саве́ллия, смеша́юща Святу́ю Тро́ицу, препре́л, / нас же во правосла́вии укрепи́л еси́. / Сего́ ра́ди вопие́м ти си́це:
Ра́дуйся, щи́те, защища́яй благоче́стие; / ра́дуйся, мечу́, посека́яй злоче́стие. / Ра́дуйся, учи́телю Боже́ственных веле́ний; / ра́дуйся, губи́телю богопроти́вных уче́ний. / Ра́дуйся, ле́ствице, Бо́гом утвержде́нная, е́юже восхо́дим к небеси́; / ра́дуйся, покро́ве, Бо́гом зда́нный, и́мже покрыва́ются мно́зи. / Ра́дуйся, нему́дрых умудри́вый твои́ми словесы́; / ра́дуйся, лени́вых подви́гнувый твои́ми нра́вы. / Ра́дуйся, све́тлосте за́поведей Бо́жиих неугаси́мая; / ра́дуйся, луче́ оправда́ний Госпо́дних пресве́тлая. / Ра́дуйся, я́ко уче́нием твои́м сокруша́ются ерети́ческия главы́; / ра́дуйся, я́ко тобо́ю ве́рнии сподобля́ются сла́вы.
Ра́дуйся, Нико́лае, вели́кий чудотво́рче.
Кондак 10: Спасти́ хотя́ ду́шу, / плоть твою́ ду́хови покори́л еси́ вои́стинну, о́тче наш Нико́лае, / молча́ньми бо пре́жде и боре́ньми с по́мыслы, / дея́нию богомы́слие приложи́л еси́, / богомы́слием же ра́зум соверше́н стяжа́л еси́, / и́мже дерзнове́нно с Бо́гом и А́нгелы бесе́довал еси́, / всегда́ вопию́щи: Аллилу́иа.
Икос 10: Стена́ еси́ похваля́ющим, преблаже́нне, чудеса́ твоя́ / и всем к заступле́нию твоему́ прибега́ющим; / те́мже и нас, в доброде́тели убо́гих, / от нищеты́, напа́сти, неду́гов и нужд разли́чных свобожда́й, / вопию́щих ти с любо́вию такова́я:
Ра́дуйся, от убо́жества ве́чнаго изыма́яй; / ра́дуйся, бога́тство нетле́нное подава́яй. / Ра́дуйся, бра́шно неги́блющее а́лчущим пра́вды; / ра́дуйся, питие́ неисчерпа́емое жа́ждущим жи́зни. / Ра́дуйся, от мятежа́ и бра́ни соблюда́яй; / ра́дуйся, от уз и плене́ния свобожда́яй. / Ра́дуйся, пресла́вный в беда́х засту́пниче; / ра́дуйся, превели́кий в напа́стех защи́тниче. / Ра́дуйся, мно́гих от поги́бели исхи́тивый; / ра́дуйся, безчи́сленных неврежде́нно сохрани́вый. / Ра́дуйся, я́ко тобо́ю лю́тыя сме́рти гре́шнии избега́ют; / ра́дуйся, я́ко тобо́ю жизнь ве́чную ка́ющиися получа́ют.
Ра́дуйся, Нико́лае, вели́кий чудотво́рче.
Кондак 11: Пе́ние Пресвяте́й Тро́ице / па́че ины́х прине́сл еси́, преблаже́нне Нико́лае, / умо́м, сло́вом и де́лом, мно́гим бо испыта́нием / правове́рная повеле́ния уясни́л еси́, / ве́рою, наде́ждою и любо́вию наставля́я нас / в Тро́ице Еди́ному Бо́гу воспева́ти: Аллилу́иа.
Икос 11: Светоза́рную лучу́ во мра́це жития́ су́щим неугаси́мую ви́дим тя, / Бо́гом избра́нне о́тче Нико́лае, / с невеще́ственными бо а́нгельскими све́ты бесе́дуеши о несозда́нном Тро́ическом све́те, / ве́рных же ду́ши просвеща́еши, вопию́щих ти такова́я:
Ра́дуйся, озаре́ние Трисо́лнечнаго Све́та; / ра́дуйся, денни́це незаходи́маго со́лнца. / Ра́дуйся, свеще́, Боже́ственным пла́менем возжже́нная; / ра́дуйся, я́ко угаси́л еси́ бесо́вский пла́мень нече́стия. / Ра́дуйся, све́тлое правове́рия пропове́дание; / ра́дуйся, доброзра́чное све́та Ева́нгельскаго сия́ние. / Ра́дуйся, мо́лние, е́реси пожига́ющая; / ра́дуйся, гро́ме, устраша́ющий соблазня́ющия. / Ра́дуйся, и́стиннаго научи́телю ра́зума; / ра́дуйся, та́инственнаго изъяви́телю ума́. / Ра́дуйся, я́ко тобо́ю попра́ся поклоне́ние тва́ри; / ра́дуйся, я́ко тобо́ю научи́хомся поклоня́тися Творцу́ в Тро́ице.
Ра́дуйся, Нико́лае, вели́кий чудотво́рче.
Кондак 12: Благода́ть, да́нную ти от Бо́га, све́дущии, ра́дующеся / твою́ па́мять пра́зднуем по до́лгу, пресла́вный о́тче Нико́лае, / и к чу́дному заступле́нию твоему́ вседу́шно притека́ем; / пресла́вных же твои́х дея́ний, я́ко песка́ морска́го и мно́жества зве́зднаго исчести́ не могу́ще, / недоуме́нием объя́ти бы́вше, вопие́м к Бо́гу: Аллилу́иа.
Икос 12: Пою́ще твоя́ чудеса́, восхваля́ем тя, всехва́льне Нико́лае, / в тебе́ бо Бог, в Тро́ице прославля́емый, ди́вно просла́вися, / но а́ще и попремно́гу соста́вленныя от души́ псалмы́ и пе́сни прино́сим ти, чудотво́рче святы́й, / ничто́же твори́м ра́вно дарова́нию чуде́с твои́х, / и́мже удивля́ющеся, вопие́м к тебе́ такова́я:
Ра́дуйся, Царя́ ца́рствующих и Го́спода госпо́дствующих служи́телю; / ра́дуйся, служи́телей Его́ небе́сных сожи́телю. / Ра́дуйся, лю́дем ве́рным поможе́ние; / ра́дуйся, ро́да христиа́нскаго возвыше́ние. / Ра́дуйся, побе́ды тезоимени́тый; / ра́дуйся, венцено́сче нарочи́тый. / Ра́дуйся, всех доброде́телей зерца́ло; / ра́дуйся, всех притека́ющих к тебе́ кре́пкое забра́ло. / Ра́дуйся, по Бо́зе и Богоро́дице все на́ше упова́ние; / ра́дуйся, теле́с на́ших здра́вие и душ спасе́ние. / Ра́дуйся, я́ко тобо́ю от ве́чныя сме́рти свобожда́емся; / ра́дуйся, я́ко тобо́ю безконе́чныя жи́зни сподобля́емся.
Ра́дуйся, Нико́лае, вели́кий чудотво́рче.
Кондак 13: О пресвяты́й и пречу́дный о́тче Нико́лае, утеше́ние всех скорбя́щих, / ны́нешнее на́ше приими́ приноше́ние / и от гее́нны изба́витися нам Го́спода умоли́ богоприя́тным твои́м хода́тайством, / да с тобо́ю воспева́ем: Аллилу́иа. [Трижды.]
Икос 1: А́нгела о́бразом, земна́го су́ща естество́м яви́ тебе́ всея́ тва́ри Созда́тель, / благопло́дную бо добро́ту души́ твоея́ прови́дев, преблаже́нне Нико́лае, / научи́ всех вопи́ти тебе́ си́це:
Ра́дуйся, от утро́бы ма́терния очище́нный; / ра́дуйся, да́же до конца́ освяще́нный. / Ра́дуйся, рожде́нием свои́м роди́телей удиви́вый; / ра́дуйся, си́лу душе́вную а́бие по рождестве́ яви́вый. / Ра́дуйся, са́де земли́ обетова́ния; / ра́дуйся, цве́те Боже́ственнаго сажде́ния. / Ра́дуйся, лозо́ доброде́тельная виногра́да Христо́ва; / ра́дуйся, дре́во чудото́чное рая́ Иису́сова. / Ра́дуйся, кри́не ра́йскаго прозябе́ния; / ра́дуйся, мv́ро Христо́ва благоуха́ния. / Ра́дуйся, я́ко тобо́ю отго́нится рыда́ние; / ра́дуйся, я́ко тобо́ю прино́сится ра́дование.
Ра́дуйся, Нико́лае, вели́кий чудотво́рче.
Кондак 1: Возбра́нный чудотво́рче и изря́дный уго́дниче Христо́в, / мiру всему́ источа́яй многоце́нное ми́лости мv́ро и неисчерпа́емое чуде́с мо́ре, / восхваля́ю тя любо́вию, святи́телю Нико́лае; / ты же, я́ко име́яй дерзнове́ние ко Го́споду, / от вся́ких мя бед свободи́, да зову́ ти:
Ра́дуйся, Нико́лае, вели́кий чудотво́рче.
Ирмос: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.
Святи́телю о́тче Нико́лае, моли́ Бо́га о нас.
Святе Нико́лае, святи́телю Христо́в / ра́дуйся, ты бо еси́ ра́дость всем неизглаго́ланная, / и мне пода́ждь ру́ку по́мощи, да глаго́лю ти: / ра́дуйся, всеблаже́нне.
Святи́телю о́тче Нико́лае, моли́ Бо́га о нас.
Егда́ услы́шаша воево́ды отпуще́ние из темни́цы повеле́нием твои́м, / взе́мше све́щники принесо́ша ти со свеща́ми, ве́лиим вопию́ще гла́сом: / ра́дуйся, о́тче преподо́бне, избавле́ние на́ше.
Слава: Не́когда услы́шал еси́ в темни́це свя́занныя, / услы́ши и мене́, Нико́лае, ра́дуйся принося́ща ти, / и исхи́ти мя огня́ гее́нскаго.
И ныне: Мари́е Госпоже́, Ма́ти Изба́вителя, / приими́ мя, ка́ющагося и прибега́ющаго под кров Твой, / я́ко да не престая́ вопию́ Тебе́: / ра́дуйся, Благода́тная Богоро́дице Присноде́во.
Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.
Святи́телю о́тче Нико́лае, моли́ Бо́га о нас.
Апо́столов сопресто́льниче, / со А́нгелы служи́телю Святе́й Тро́ице, / Нико́лае прехва́льне, ра́дуйся, / и мне да́руй ра́дость моли́твами твои́ми.
Святи́телю о́тче Нико́лае, моли́ Бо́га о нас.
Ко́рмчий обурева́емых, Нико́лае, ра́дуйся, / и бу́рю мои́х страсте́й, я́же от прило́га бесо́вскаго, ути́ши, / я́ко про́чее не могу́ терпе́ти, но вопию́: / ра́дуйся, помо́щниче мой и те́плый предста́телю.
Слава: О, коли́ка туга́ обдержи́т мя от стреля́ний бесо́вских, / и я́звы терпе́ти ми несть мо́щно, / пла́стыря приложи́ти несть врача́, / но ты ми приложи́ пла́стырь, и еле́й моли́тв твои́х, Нико́лае, да зову́ ти: / ра́дуйся, о́тче преподо́бне.
И ныне: Купино́ неопали́мая, ра́дуйся, / ю́же Моисе́й ви́де на Сина́и, / и ле́ствице, ю́же Иа́ков ви́де, / Преблагослове́нная Богоро́дице Присноде́во.
Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / / ра́дуйся, Всеблаже́нная, / Богоро́дице Чи́стая Присноде́во.
Святи́телю о́тче Нико́лае, моли́ Бо́га о нас.
Льсти́ваго стреля́ния обдержа́т мя, и стремле́ния грехо́вная, / но наде́яся на покро́в твой, к тебе́ прибега́ю, о́тче, / я́ко да отжене́ши от мене́ вся ле́сти лука́ваго, да зову́ ти: / ра́дуйся, Нико́лае.
Святи́телю о́тче Нико́лае, моли́ Бо́га о нас.
А́рия безу́мновавшаго посрами́л еси́, / пла́мень же ересе́й угаси́л еси́, / воево́ды в темни́це свя́занныя услы́шал еси́, / и от них ра́дуйся прия́л еси́, / и мы вопие́м ти, Нико́лае: / ра́дуйся, всеблаже́нне.
Слава: А́грика о́наго услы́шавый, / и сы́на его́ Васи́лия от Ами́ры восхи́тивый, / и предста́вивый роди́телем здра́ва во еди́н час от срацы́н, / и мне моля́щуся, исхи́ти неду́гущую мою́ ду́шу, и грехи́ обложе́нную, / от огня́ гее́нскаго, Нико́лае.
И ныне: Цари́це, всех Царя́ ро́ждшая / и носи́вшая Нося́щаго всю тварь, / спаси́ мя, велича́ющаго Тя, Пресвята́я Влады́чице.
О всехва́льный и всечестны́й архиере́ю, вели́кий чудотво́рче, святи́телю Христо́в, о́тче Нико́лае, челове́че Бо́жий и ве́рный ра́бе, му́жу жела́ний, сосу́де избра́нный, кре́пкий сто́лпе церко́вный, свети́льниче пресве́тлый, звездо́ осиява́ющая и освеща́ющая всю вселе́нную; ты еси́ пра́ведник, я́ко фи́никс процве́тший, насажде́нный во дво́рех Го́спода своего́, живы́й в Ми́рех, мv́ром облагоуха́л еси́ и мv́ро приснотеку́щее благода́ти Бо́жия источа́еши. Твои́м ше́ствием, пресвяты́й о́тче, мо́ре освяти́ся, егда́ многочуде́сныя твоя́ мо́щи ше́ствоваху во град Ба́рский, от восто́ка до за́пада хвали́ти и́мя Госпо́дне. О преизя́щный и преди́вный чудотво́рче, ско́рый помо́щниче, те́плый засту́пниче, па́стырю предо́брый, спаса́ющий слове́сное ста́до от вся́ких бед! Тебе́ прославля́ем и тебе́ велича́ем, я́ко наде́жду всех христиа́н, исто́чника чуде́с, защи́тителя ве́рных, прему́драго учи́теля, а́лчущих корми́теля, пла́чущих весе́лие, наги́х одея́ние, боля́щих врача́, по мо́рю пла́вающих управи́теля, пле́нников свободи́теля, вдов и сиро́т пита́теля и засту́пника, целому́дрия храни́теля, младе́нцев кро́ткаго наказа́теля, ста́рых укрепле́ние, по́стников наста́вника, тружда́ющихся упокое́ние, ни́щих и убо́гих изоби́льное бога́тство. Услы́ши нас, моля́щихся тебе́ и прибега́ющих под кров твой, яви́ предста́тельство твое́ о нас к Вы́шнему и исхода́тайствуй твои́ми Богоприя́тными моли́твами вся поле́зная ко спасе́нию душ и теле́с на́ших; сохрани́ святу́ю оби́тель сию́ [или храм сей], вся́кий град и весь, и вся́кую страну́ христиа́нскую, и лю́ди живу́щия от вся́каго озлобле́ния по́мощию твое́ю, ве́мы бо, ве́мы, я́ко мно́го мо́жет моли́тва пра́веднаго, поспешеству́ющая во благо́е; тебе́ же, пра́веднаго, по Преблагослове́нней Де́ве Мари́и, предста́теля ко Всеми́лостивому Бо́гу и́мамы, и к твоему́, преблаги́й о́тче, те́плому хода́тайству и заступле́нию смире́нно притека́ем; ты нас соблюди́, я́ко бо́дрый и до́брый па́стырь, от вся́ких враго́в, губи́тельства, тру́са, гра́да, гла́да, пото́па, огня́, меча́, наше́ствия иноплеме́нников, и во вся́ких беда́х и ско́рбех на́ших подава́й нам ру́ку по́мощи, и отве́рзи две́ри милосе́рдия Бо́жия; поне́же недосто́йни есмы́ зре́ти высоту́ небе́сную от мно́жества непра́вд на́ших, свя́зани есмы́ у́зами грехо́вными, и николи́же во́ли Созда́теля на́шего сотвори́хом, ни сохрани́хом повеле́ний Его́. Те́мже приклоня́ем коле́на сокруше́нна и смире́нна се́рдца на́шего к Зижди́телю своему́, и твоего́ оте́ческаго заступле́ния к Нему́ про́сим: помози́ нам, уго́дниче Бо́жий, да не поги́бнем со беззако́нии на́шими, изба́ви нас от вся́каго зла и от вся́кия ве́щи сопроти́вныя, упра́ви ум наш и укрепи́ се́рдце на́ше в пра́вой ве́ре, в не́йже твои́м предста́тельством и хода́тайством, ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде поживе́м житие́ и да сподо́бимся ви́дети блага́я на земли́ живы́х, сла́вяще Отца́, и Сы́на, и Свята́го Ду́ха, Еди́наго в Тро́ице сла́вимаго Бо́га и покланя́емаго, ны́не и при́сно, и во ве́ки веко́в, ами́нь.
О всесвяты́й Нико́лае, уго́дниче преизря́дный Госпо́день, те́плый наш засту́пниче, и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем житии́, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми, окая́нному, умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния; да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно и во ве́ки веко́в, ами́нь.
О всеблаги́й о́тче Нико́лае, па́стырю и учи́телю всех, ве́рою притека́ющих к твоему́ заступле́нию и те́плою моли́твою тебе́ призыва́ющих, ско́ро потщи́ся и изба́ви Христо́во ста́до от волко́в, губя́щих е́, и вся́ку страну́ христиа́нскую огради́ и сохрани́ святы́ми твои́ми моли́твами от мiрска́го мяте́жа, тру́са, на́шествия иноплеме́нников и междоусо́бныя бра́ни, от гла́да, пото́па, огня́, меча́ и напра́сныя сме́рти. И я́коже поми́ловал еси́ трие́х муже́й, в темни́це седя́щих, и изба́вил еси́ их царе́ва гне́ва и посече́ния ме́чнаго. Та́ко поми́луй и мене́, умо́м, сло́вом и де́лом во тьме грехо́в су́ща, и изба́ви мя гне́ва Бо́жия и ве́чныя ка́зни, я́ко да твои́м хода́тайством и по́мощию, Свои́м же милосе́рдием и благода́тию Христо́с Бог ти́хое и безгре́шное житие́ даст ми пожи́ти в ве́це сем и изба́вит мя шу́ияго стоя́ния, сподо́бит же десна́го со все́ми святы́ми, ами́нь.
Таже: Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Трисвятое: Пресвята́я Тро́ице: по О́тче наш:
Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.
Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.
А́нгеле Бо́жий, храни́телю мой святы́й, / живо́т мой соблюди́ во стра́се Христа́ Бо́га, / ум мой утверди́ во и́стиннем пути́, / и к любви́ го́рней уязви́ ду́шу мою́, / да тобо́ю направля́емь, / получу́ от Христа́ Бо́га ве́лию ми́лость.
Слава, и ныне, Богородичен: Свята́я Влады́чице, / Христа́ Бо́га на́шего Ма́ти, / я́ко всех Творца́ недоуме́нно ро́ждшая, / моли́ бла́гость Его́ всегда́, / со храни́телем мои́м а́нгелом, / спасти́ ду́шу мою́, страстьми́ одержи́мую, / и оставле́ние грехо́в дарова́ти ми.
Ирмос: Пои́м Го́сподеви, / прове́дшему лю́ди Своя́ сквозе́ Чермно́е мо́ре, / я́ко еди́н сла́вно просла́вися.
Иисусу: Го́споди Иису́се Христе́ Бо́же мой, поми́луй мя.
Песнь воспе́ти и восхвали́ти, Спа́се, / Твоего́ раба́ досто́йно сподо́би, / безпло́тному Áнгелу, наста́внику и храни́телю моему́.
Припев: Святы́й Áнгеле Бо́жий, храни́телю мой, моли́ Бо́га о мне.
Еди́н аз в неразу́мии и в ле́ности ны́не лежу́, / наста́вниче мой и храни́телю, / не оста́ви мене́, погиба́юща.
Слава: Ум мой твое́ю моли́твою напра́ви, / твори́ти ми Бо́жия повеле́ния, / да получу́ от Бо́га отда́ние грехо́в, / и ненави́дети ми злых наста́ви мя, молю́ся ти.
И ныне: Моли́ся, Деви́це, о мне, рабе́ Твое́м, ко Благода́телю, / со храни́телем мои́м Áнгелом, / и наста́ви мя твори́ти за́поведи Сы́на Твоего́ и Творца́ моего́.
Ирмос: Ты еси́ утвержде́ние / притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.
Святы́й Áнгеле Бо́жий, храни́телю мой, моли́ Бо́га о мне.
Все помышле́ние мое́ и ду́шу мою́ к тебе́ возложи́х, храни́телю мой; / ты от вся́кия мя напа́сти вра́жия изба́ви.
Святы́й Áнгеле Бо́жий, храни́телю мой, моли́ Бо́га о мне.
Враг попира́ет мя, и озлобля́ет, / и поуча́ет всегда́ твори́ти своя́ хоте́ния; / но ты, наста́вниче мой, / не оста́ви мене́ погиба́юща.
Слава: Пе́ти песнь со благодаре́нием и усе́рдием / Творцу́ и Бо́гу даждь ми, / и тебе́, благо́му Áнгелу храни́телю моему́: / изба́вителю мой, изми́ мя от враг озлобля́ющих мя.
И ныне: Исцели́, Пречи́стая, моя́ многонеду́жныя стру́пы, я́же в души́, / прожени́ враги́, и́же при́сно бо́рются со мно́ю.
От любве́ душе́вныя вопию́ ти, / храни́телю моея́ души́, всесвяты́й мой Áнгеле: / покры́й мя и соблюди́ от лука́ваго ловле́ния всегда́, / и к жи́зни наста́ви небе́сней, / вразумля́я и просвеща́я и укрепля́я мя.
Слава, и ныне, Богородичен: Богоро́дице безневе́стная Пречи́стая, / Я́же без се́мени ро́ждши всех Влады́ку, / Того́ со Áнгелом храни́телем мои́м моли́, / изба́вити ми ся вся́каго недоуме́ния, / и да́ти умиле́ние и свет души́ мое́й и согреше́нием очище́ние, / Я́же еди́на вско́ре заступа́ющи.
Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́, / и просла́вих Твое́ Божество́.
Святы́й Áнгеле Бо́жий, храни́телю мой, моли́ Бо́га о мне.
Моли́ Человеколю́бца Бо́га ты, храни́телю мой, / и не оста́ви мене́, / но при́сно в ми́ре житие́ мое́ соблюди́ / и пода́ждь ми спасе́ние необори́мое.
Святы́й Áнгеле Бо́жий, храни́телю мой, моли́ Бо́га о мне.
Я́ко засту́пника и храни́теля животу́ моему́ прие́м тя от Бо́га, Áнгеле, / молю́ тя, святы́й, / от вся́ких мя бед свободи́.
Слава: Мою́ скве́рность твое́ю святы́нею очи́сти, храни́телю мой, / и от ча́сти шу́ия да отлуче́н бу́ду моли́твами твои́ми / и прича́стник сла́вы явлю́ся.
И ныне: Недоуме́ние предлежи́т ми от обыше́дших мя зол, Пречи́стая, / но изба́ви мя от них ско́ро: / к Тебе́ бо еди́ней прибего́х.
Ирмос: У́тренююще вопие́м Ти: / Го́споди, спаси́ ны; / Ты бо еси́ Бог наш, / ра́зве Тебе́ ино́го не ве́мы.
Святы́й Áнгеле Бо́жий, храни́телю мой, моли́ Бо́га о мне.
Я́ко име́я дерзнове́ние к Бо́гу, / храни́телю мой святы́й, / Сего́ умоли́ от оскорбля́ющих мя зол изба́вити.
Святы́й Áнгеле Бо́жий, храни́телю мой, моли́ Бо́га о мне.
Све́те све́тлый, све́тло просвети́ ду́шу мою́, / наста́вниче мой и храни́телю, / от Бо́га да́нный ми Áнгеле.
Слава: Спя́ща мя зле тягото́ю грехо́вною, / я́ко бдя́ща сохрани́, Áнгеле Бо́жий, / и возста́ви мя на славосло́вие моле́нием твои́м.
И ныне: Мари́е, Госпоже́ Богоро́дице безневе́стная, наде́ждо ве́рных, / вра́жия возноше́ния низложи́, / пою́щия же Тя возвесели́.
Ирмос: Ри́зу ми пода́ждь све́тлу, / одея́йся све́том я́ко ри́зою, / многоми́лостиве Христе́ Бо́же наш.
Святы́й Áнгеле Бо́жий, храни́телю мой, моли́ Бо́га о мне.
Вся́ких мя напа́стей свободи́, и от печа́лей спаси́, / молю́ся ти, святы́й Áнгеле, да́нный ми от Бо́га, / храни́телю мой до́брый.
Святы́й Áнгеле Бо́жий, храни́телю мой, моли́ Бо́га о мне.
Освети́ ум мой, бла́же, и просвети́ мя, / молю́ся ти, святы́й Áнгеле, / и мы́слити ми поле́зная всегда́ наста́ви мя.
Слава: Уста́ви се́рдце мое́ от настоя́щаго мяте́жа, / и бде́ти укрепи́ мя во благи́х, храни́телю мой, / и наста́ви мя чу́дно к тишине́ живо́тней.
И ныне: Сло́во Бо́жие в Тя всели́ся, Богоро́дице, / и челове́ком Тя показа́ небе́сную ле́ствицу; / Тобо́ю бо к нам Вы́шний соше́л есть.
Яви́ся мне милосе́рд, святы́й Áнгеле Госпо́день, храни́телю мой, / и не отлуча́йся от мене́, скве́рнаго, / но просвети́ мя све́том неприкоснове́нным / и сотвори́ мя досто́йна Ца́рствия Небе́снаго.
Икос: Уничиже́нную ду́шу мою́ мно́гими собла́зны, / ты, святы́й предста́телю, / неизрече́нныя сла́вы небе́сныя сподо́би, / и певе́ц с ли́ки безпло́тных сил Бо́жиих, / поми́луй мя и сохрани́, и по́мыслы до́брыми ду́шу мою́ просвети́, / да твое́ю сла́вою, Áнгеле мой, обогащу́ся, / и низложи́ зломы́слящия мне враги́, / и сотвори́ мя досто́йна Ца́рствия Небе́снаго.
Ирмос: От Иуде́и доше́дше о́троцы, / в Вавило́не иногда́, / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.
Святы́й Áнгеле Бо́жий, храни́телю мой, моли́ Бо́га о мне.
Ми́лостив бу́ди ми, и умоли́ Бо́га, Госпо́день Áнгеле, / име́ю бо тя засту́пника во всем животе́ мое́м, наста́вника же и храни́теля, / от Бо́га дарова́ннаго ми во ве́ки.
Святы́й Áнгеле Бо́жий, храни́телю мой, моли́ Бо́га о мне.
Не оста́ви в путь ше́ствующия души́ моея́ окая́нныя / уби́ти разбо́йником, святы́й Áнгеле, / я́же ти от Бо́га предана́ бысть непоро́чне; / но наста́ви ю́ на путь покая́ния.
Слава: Всю посра́млену ду́шу мою́ / привожду́ от лука́вых ми по́мысл и дел: / но предвари́, наста́вниче мой, / и исцеле́ние ми пода́ждь благи́ми по́мыслы, / уклоня́ти ми ся всегда́ на пра́выя стези́.
И ныне: Прему́дрости испо́лни всех и кре́пости Боже́ственныя, / Ипоста́сная Прему́дросте Вы́шняго, Богоро́дицы ра́ди, ве́рою вопию́щих: / оте́ц на́ших Бо́же, благослове́н еси́.
Ирмос: Царя́ Небе́снаго, / Его́же пою́т во́и а́нгельстии, / хвали́те и превозноси́те во вся ве́ки.
Святы́й Áнгеле Бо́жий, храни́телю мой, моли́ Бо́га о мне.
От Бо́га по́сланный, / утверди́ живо́т мой, раба́ твоего́, преблаги́й Áнгеле, / и не оста́ви мене́ во ве́ки.
Святы́й Áнгеле Бо́жий, храни́телю мой, моли́ Бо́га о мне.
А́нгела тя су́ща бла́га, / души́ моея́ наста́вника и храни́теля, преблаже́нне, / воспева́ю во ве́ки.
Слава: Бу́ди ми покро́в и забра́ло / в день испыта́ния всех челове́к, / во́ньже огне́м искуша́ются дела́ блага́я же и зла́я.
И ныне: Бу́ди ми помо́щница и тишина́, Богоро́дице Присноде́во, рабу́ Твоему́, / и не оста́ви мене́ лише́на бы́ти Твоего́ влады́чества.
Ирмос: Вои́стинну Богоро́дицу / Тя испове́дуем, / спасе́ннии Тобо́ю, Де́во чи́стая, / с безпло́тными ли́ки Тя велича́юще.
Иисусу: Го́споди Иису́се Христе́ Бо́же мой, поми́луй мя.
Поми́луй мя, еди́не Спа́се мой, / я́ко ми́лостив еси́ и милосе́рд, / и пра́ведных лико́в сотвори́ мя прича́стника.
Святы́й Áнгеле Бо́жий, храни́телю мой, моли́ Бо́га о мне.
Мы́слити ми при́сно и твори́ти, Госпо́день Áнгеле, / блага́я и поле́зная да́руй, / я́ко си́льна яви́ в не́мощи и непоро́чна.
Слава: Я́ко име́я дерзнове́ние к Царю́ Небе́сному, Того́ моли́, / с про́чими безпло́тными, поми́ловати мя, окая́ннаго.
И ныне: Мно́го дерзнове́ние иму́щи, Де́во, к Вопло́щшемуся из Тебе́, / преложи́ мя от уз и разреше́ние ми пода́ждь и спасе́ние, моли́твами Твои́ми.
А́нгеле Христо́в святы́й, к тебе́ припа́дая молю́ся, храни́телю мой святы́й, прида́нный мне на соблюде́ние души́ и те́лу моему́ гре́шному от свята́го креще́ния, аз же свое́ю ле́ностию и свои́м злым обы́чаем прогне́вах твою́ пречи́стую све́тлость и отгна́х тя от себе́ все́ми сту́дными де́лы: лжа́ми, клевета́ми, за́вистию, осужде́нием, презо́рством, непоко́рством, братоненавиде́нием, и злопомне́нием, сребролю́бием, прелюбодея́нием, я́ростию, ску́постию, объяде́нием без сы́тости и опи́вством, многоглаго́ланием, злы́ми по́мыслы и лука́выми, го́рдым обы́чаем и блу́дным возбеше́нием, имы́й самохоте́ние на вся́кое плотско́е вожделе́ние. О, зло́е мое́ произволе́ние, его́же и ско́ти безслове́снии не творя́т! Да ка́ко возмо́жеши воззре́ти на мя, или́ приступи́ти ко мне, а́ки псу смердя́щему? Кото́рыма очи́ма, А́нгеле Христо́в, воззри́ши на мя, опле́тшася зле во гну́сных де́лех? Да ка́ко уже́ возмогу́ отпуще́ния проси́ти го́рьким и злым мои́м и лука́вым дея́нием, в ня́же впа́даю по вся дни и но́щи и на всяк час? Но молю́ся ти припа́дая, храни́телю мой святы́й, умилосе́рдися на мя гре́шнаго и недосто́йнаго раба́ твоего́ (имярек), бу́ди ми помо́щник и засту́пник на зла́го моего́ сопроти́вника, святы́ми твои́ми моли́твами, и Ца́рствия Бо́жия прича́стника мя сотвори́ со все́ми святы́ми, во ве́ки, ами́нь.
Спаси́, Го́споди, лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Припев: Слава, Господи, Кресту Твоему Честному.
Кре́сте всеси́льне, апо́столов похвала́, / преподо́бных утвержде́ние, и ве́рных зна́мение, / и иера́рхов и му́чеников сла́ва, / побе́да и утвержде́ние всех хва́лящих тя.
Кре́сте всечестны́й, четвероконе́чная си́ла, / апо́столов благоле́пие, и му́чеников кре́пость, / немощны́х здра́вие показа́лся еси́, / ме́ртвым воскресе́ние, па́дающим воздви́жение.
Слава: Кре́сте, ты ми си́ла бу́ди, кре́пость и держа́ва, / изба́витель и предра́тник на борю́щия мя, / щит и храни́тель, побе́да и утвержде́ние мое́, / при́сно соблюда́я мя и покрыва́я.
И ныне: На Кре́сте, Всенепоро́чная, Твоего́ Сы́на я́ко узре́ла еси́, / ору́жие ско́рбное утро́бу Твою́ растерза́, / и восклица́ла еси́ рыда́ющи в боле́зни, / но а́бие просла́вила еси́ Креста́ си́лу.
Ирмос: Твоя́ песносло́вцы, Богоро́дице, / живы́й и незави́стный исто́чниче, / лик Себе́ совоку́пльшия духо́вно, утверди́, / в Боже́ственней Твое́й сла́ве / венце́в сла́вы сподо́би.
Кре́сте, преподо́бных ору́жие, обою́дный меч Христо́в, / ве́рных удобре́ние, боля́щих исцеле́ние и заступле́ние, / и воздви́жение уме́рших, Всече́стне.
Кре́сте, основа́ние благоче́стия, / бесо́м показа́лся еси́ губи́тель, Це́рквам благоле́пие, / нечести́вым поги́бель, враго́м посрамле́ние на день су́дный.
Слава: Кре́сте живоно́сный, / ты ми бу́ди кре́пость и побе́да, и щит, / и стена́ нера́туема, бесо́м отгна́ние, / и помысло́м погаше́ние, и ума́ моего́ сохране́ние.
И ныне: Распя́тие поно́сное, Де́во Влады́чице, Твой Сын претерпе́л есть, и сме́рть неподо́бную. / Но возне́сся, низве́рже проти́вныя вра́жия си́лы, я́ко безсме́ртен.
Прообража́ше та́йне дре́вле Иису́с Нави́н Креста́ о́браз, / егда́ ру́це простре́ крестови́дне, Спа́се мой, / и ста со́лнце, до́ндеже враги́ низложи́, противостоя́щия Ти, Бо́гу; / ны́не же за́йде, на Кресте́ Тя зря, / и, держа́ву сме́ртную разруши́в, / весь мiр совоздви́гл еси́.
Ирмос: Седя́й в сла́ве на Престо́ле Божества́, / во о́блаце ле́гце, / прии́де Иису́с Пребоже́ственный, / нетле́нною дла́нию, и спасе́ зову́щия: / сла́ва, Христе́, си́ле Твое́й.
Четвероконе́чный сый мiр, / и я́ко триобою́дный меч, нача́ла тьмы сече́ши, / на́ми вообража́емь, Кре́сте, ору́жие вели́кое Христо́во, / и непобеди́мое победи́тельство всеси́льное.
Твоя́ высота́, Живоно́сне Кре́сте, возду́шнаго кня́зя бие́т, / и глубина́ всея́ бе́здны закала́ет зми́я, / широту́ па́ки вообража́ет, / низлага́я мiрска́го кня́зя кре́постию Твое́ю.
Слава: Возне́сся сопривле́кл еси́ па́дшия, / воздви́гл еси́ естество́ земно́е, / Престо́лу Бо́жию спросла́вился еси́, Кре́сте, / высото́ вели́кая, мiрски́й мо́сте, / ду́шу мою́ от страсте́й глубины́ вознеси́ вско́ре.
И ныне: Крестообра́зно, Пречи́стая Отрокови́це Богоро́дице, / дла́ни Твои́ распросте́рши ко и́же на Кресте́ Воздви́женному, / и моли́твы, Де́во, ны́не принеси́, / за всех ве́рно моля́щихся Тебе́.
Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Кре́сте, небе́сная ле́ствице святы́ни, степе́нем наста́вниче, / Христо́ва высота́ и сла́ва еси́, / Бо́жий о́браз назнамена́телен мiру, / неви́димому же и ви́димому, единоче́стне.
Кре́сте, о́бразе неиспи́санный си́лою, / освяще́ние вода́м, очище́ние возду́ху, / освяще́ние и просвеще́ние вся́кому, му́жества зна́мение, / и Христо́в ски́птр непрело́жный, проти́вныя в зе́млю попира́я.
Слава: Кре́сте всеси́льне, / злочести́выя низложи́ враги́, ненави́дящия и ху́лящия тя безу́мно, / язы́ки попали́ и угаси́ шата́ния их. / О Кре́сте всесвяты́й и Христоно́сный, / сохрани́ нас держа́вою Твое́ю.
И ныне: Всех Цари́це Влады́чице, ски́птром Рождества́ Твоего́ / разруши́, Деви́це, воста́ние ху́лящих кре́стную си́лу. / Даждь кре́пость и очище́ние, / побе́ду и по́мощь ве́рным лю́дем Твои́м.
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.
Кре́сте всех воскресе́ние, / Крест па́дших исправле́ние, / страсте́й умерщвле́ние и пло́ти пригвожде́ние, / Крест душа́м сла́ва и свет ве́чный.
Крест враго́в губи́тель, / Крест злочести́вых я́зва и плене́ние, и ве́рных держа́ва, / благочести́вых храни́тель и бесо́в отгони́тель.
Слава: Крест страсте́й па́губа, / Крест помысло́в отгна́ние, / Крест сокруше́ние язы́ческо искуси́тельно / и духово́м показа́ся лови́тельство.
И ныне: Крест воздви́жется и па́дают духо́в возду́шных чи́нове, / Крест снизхо́дит, и нечести́вии вси ужаса́ются, / я́ко мо́лнию ви́дяще кре́стную си́лу.
Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ нас си́лою Твое́ю, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.
Икос: И́же до тре́тияго Небесе́ восхище́н бысть в рай / и глаго́лы слы́шав неизрече́нныя и Боже́ственныя, / и́хже не леть язы́ки [челове́ческими] глаго́лати, / что Гала́том пи́шет, я́ко рачи́телие Писа́ний прочто́сте и позна́сте: / мне, глаго́лет, хвали́тися да не бу́дет, то́кмо во еди́ном Кресте́ Госпо́дни, / на не́мже, страда́в, уби́ стра́сти. / Того́ у́бо и мы изве́стно держи́м, Крест Госпо́день, хвалу́ вси: / есть бо нам спаси́тельное сие́ Дре́во / oру́жие ми́ра, непобеди́мая побе́да.
Ирмос: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.
Неразде́льную Тро́ицу и неслия́нну, / естество́ еди́нством благосло́вим, / Отца́ нерожде́нна, и рожде́нна Сы́на, / и Свята́го исходи́тельнаго Боже́ственнаго Ду́ха, пе́сньми пою́ще: / благослове́н Бог оте́ц на́ших.
Незаходи́тельными мо́лниями Твои́ми, Триипоста́сне, / на́ша озари́ у́мныя о́чи, / добро́ту Твою́, Трисве́тне, пресу́щественную зре́ти, / я́же челове́ком недове́домая и непристу́пная А́нгелом.
Слава: Луча́ми све́та Твоего́ / па́дшую мою́ ду́шу возведи́ от глубины́, / благи́й Бо́же, препе́тый и всеси́льный, / попо́лзшуюся от све́та благода́тнаго и во тьму воглу́бльшуюся.
И ныне: Крестообра́зно просте́рши ру́це, Чи́стая, / к распросте́ршему свои́ ру́це на Дре́ве Кре́стнем, / и возне́сшему естество́ на́ше, и умертви́вшему вражде́бныя полки́, / моля́щи не преста́й.
Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.
Высота́ Христо́вых страсте́й и лук, и ору́жие, и меч, / ору́жие непосты́дное, и си́ла непобеди́мая, / Христо́во подно́жие и победи́тельство на враги́, / зна́мения Ца́рствия, ски́птре ве́рных, / показа́лся еси́, Кре́сте победоно́сне.
Воздви́гл еси́ на́ше па́дшее естество́, Христо́м распе́ншимся, совозста́вив; / высото́ Боже́ственная, глубино́ неизглаго́ланная, / Христо́во ты еси́ зна́мение, Кре́сте пребога́те, и широта́ безме́рная, / и зна́мение непостижи́мыя Тро́ицы, жизноно́сче.
Слава: Устна́ми, душе́ю же и се́рдцем Крест Госпо́день лобыза́юще, / прииди́те ны́не вознесе́м вси и возвели́чим, / покланя́ющеся рцем вку́пе, песнь пречи́стую, вопию́ще: / pа́дуйся, вели́кое бога́тство, Кре́сте, церко́вное украше́ние.
И ныне: Дре́во жи́зни и спасе́ния, / Дре́во безсме́ртия, Дре́во ра́зума, / Дре́во трилюбе́зно, нетле́нно и неизнуря́емо, / Крест трисоста́вный, честно́е Дре́во, / Тро́ицы бо но́сит Триипоста́сныя о́браз.
Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.
Кто слы́шана сотвори́т, я́коже пи́шется, де́йствия твоя́, мiролюбе́зный Кре́сте, / си́лы и чудеса́, уме́ршим воста́ние; / и мiр весь совозне́сл еси́, вознесы́йся к Бо́гу многожела́емый.
Утвержде́ние ве́рным Крест треблаже́нный, / зна́мение и похвала́, Дре́во всеси́льное, / Крест Христо́в вели́кий и соверше́нный, / апо́столом похвала́, преподо́бным утвержде́ние / и му́чеником кре́пость и держа́ва, / ве́рным побе́да и похвала́.
Слава: Ра́дуйся, Кре́сте, о́бразе неопи́санный и многоимени́тый, / Дре́во требога́тное, стра́шно же и всеблаже́нно; / ра́дуйся, Кре́сте всесвяты́й и всеси́льный; / ра́дуйся, храни́телю жи́зни на́шея, / Госпо́день Кре́сте многопе́тый.
И ныне: Кре́сте Честны́й, храни́тель души́ и те́ла бу́ди ми, / о́бразом свои́м бе́сы низлага́я, враги́ отгоня́я, стра́сти упраждня́я, / и благослове́ние да́руя ми, и жизнь и си́лу, / соде́йствием Свята́го Ду́ха, и честны́ми Пречи́стыя мольба́ми.
Го́споди Иису́се Христе́, Сы́не Бо́га жива́го, Тво́рче не́ба и земли́, Спаси́телю мiра, се аз, недосто́йный и па́че всех грешне́йший, смире́нно коле́на се́рдца моего́ пред сла́вою вели́чества Твоего́ преклоня́я, воспева́ю и велича́ю безме́рное страда́ние Твое́, и благодаре́ние Тебе́, Царю́ всех и Бо́гу приношу́, я́ко благоизво́лил еси́ сни́ти с небе́снаго Престо́ла Твоего́ и воплоти́тися от Пречи́стыя Де́вы Мари́и, ра́ди спасе́ния челове́ческаго; безпло́тен сый, плотско́е естество́ Божеству́ совокупля́я; бога́т сый, во́лею обнища́л еси́, да челове́ка во Ца́рствии Твое́м обогати́ши; труды́ и вся́кия челове́ческия беды́, я́ко челове́к, на Себе́ поне́сл еси́, да всем во вся́ких печа́лех и ну́ждах посо́бствуеши; четы́редесять дней пости́выйся, всем к воздержа́нию путь показа́л еси́; мно́жицею от лука́вых искуше́н был еси́, всех от искуше́ний вся́ких избавля́я. Вем, всеси́льный Влады́ко, я́ко вся сия́ Тебе́ непотре́бна бы́ша, но челове́ческаго ра́ди спасе́ния вся претерпе́л еси́: пре́дан был еси́ за три́десять сре́бреник, да челове́ка иску́пиши от лю́тыя рабо́ты вра́жия; от неми́лостивых Иуде́й, я́ко незло́бивый а́гнец, похище́н был еси́, род челове́ческий от поглоще́ния во́лка мы́сленнаго исторга́я; на суди́щи пред А́нною и Каиа́фою предста́л еси́, всех от осужде́ния огня́ ве́чнаго отводя́; свя́зан, пору́ган, оплева́н, от ло́жных свиде́телей оклевета́н и на поно́сную смерть осужде́н, челове́ка от вся́кия напа́сти, муче́ния и от ве́чныя сме́рти свобожда́я; Пила́ту, нико́его зла соде́явый, пре́дан был еси́ и ко И́роду по́слан, и па́ки пору́ган, челове́ка от зла́го обстоя́ния и от поруга́ний вра́жиих избавля́я. Что у́бо возда́м Тебе́, Влады́ко Человеколю́бче, о всех, я́же претерпел еси́ мене́ ра́ди гре́шнаго? Не вем. Ду́ша бо и те́ло, и вся блага́я от Тебе́ суть, и вся моя́ Твоя́ суть, и аз Твой есмь; то́чию на безчи́сленное Твое́ милосе́рдие, благоутро́бне Го́споди, наде́яся, пою́ Твое́ неизрече́нное долготерпе́ние, велича́ю неисповеди́мое смотре́ние Твое́, сла́влю Твою́ безме́рную ми́лость, и́миже преклони́лся еси́ мене́ ра́ди осужде́ннаго, да аз оправда́н бу́ду. К столпу́, Спа́се, привя́зан и без ми́лости бие́н, ми́лостив сый, разреши́ мя, молю́ся, от грехо́в мои́х; те́рнием венча́н, души́ моея́ грехо́вное те́рние искорени́; тро́стию бие́н по главе́, сокруши́ главу́ зми́я, уязвля́ющаго мя жа́лом греха́; в багря́ну ри́зу оболче́н и мучи́телем пре́дан, просвети́ ми, Царю́ Пресвяты́й, одея́ние душе́вное, да вни́ду в черто́г Твой всекра́сный; с разбо́йники вмене́н и Крест на ра́му Свое́ю понесы́й, разбо́йника врага́, и́щущаго ду́шу мою́ уби́ти, Твои́м Кресто́м прожени́. Вем Тя, Иису́се долготерпели́ве, лю́те уя́звленнаго; от верху́ главы́ Твоея́ святы́я, да́же до стопы́ ножны́я, не бе в Тебе́ ме́ста це́ла. Что же возглаго́лю о неизрече́нном человеколю́бии Твое́м, Христе́ Спаси́телю? То́чию в сокруше́нии се́рдца моего́, покланя́яся Твои́м Пречи́стым страсте́м и вселюбе́зно ты́я лобыза́я, вопию́: поми́луй мя, гре́шнаго. На Кресте́ пригвозди́тися изво́ливый, пригвозди́ за́поведем Твои́м се́рдце мое́; воздви́жен со Кресто́м на горе́ Голго́фе, воздви́гни мы́сли моя́ к небеси́, да всегда́ го́рняя му́дрствую; же́лчию со о́цтом напое́н, огорче́нное ми грехо́м се́рдце услади́ любо́вию Твое́ю, и жа́ждуща напо́й пото́ком сла́дости Твоея́; ру́це Свои́ пречи́стеи распростры́й на прия́тие всех, приими́ мя, гре́шнаго; но́зе пригвожде́ны име́вый, хотя́ всегда́ со гре́шники бы́ти, бу́ди со мно́ю, гре́шным, возбраня́я нога́м мои́м от вся́каго пути́ лука́ваго; се́рдце отве́рсто име́вый, яви́ мне благода́ть Свою́, гре́шному; главу́ пресвяту́ю на Кресте́ преклони́вый, услы́ши недосто́йныя моли́твы моя́. О, пречу́дная и неизме́римая глубино́ милосе́рдия, Христе́ Бо́же, за враги́ распина́тели Своя́ Бо́гу Отцу́ моли́выйся, даждь и мне, гре́шному, сию́ благода́ть, люби́ти враги́ моя́ и моли́тися за них; разбо́йнику ка́ющемуся рай отве́рзый, воззри́, Све́те мой, на мя, гре́шнаго, пода́ждь покая́ние и отве́рзи ми две́ри ми́лости Твоея́, и помяни́ мя, недосто́йнаго, во Ца́рствии Твое́м. Наконе́ц, Ду́ха Своего́ Пресвята́го преда́вый в ру́це Бо́гу Отцу́, приими́, Созда́телю, дух мой во вре́мя кончи́ны моея́; со Креста́ снят и во гро́бе я́ко мертв положе́н, Спа́се, живы́й во све́те непристу́пнем, возьми́ от мене́ тя́жкое бре́мя грехо́вное, и не возгнуша́йся, Человеколю́бче, всели́тися во гроб се́рдца моего́ недосто́йнаго, на умерщвле́ние моего́ плотска́го мудрова́ния; я́ко да не ктому́ себе́, бре́нное созда́ние Твое́, но Тебе́, Го́сподеви и Бо́гу моему́ живы́й, Твои́м, о Всемилости́ве, благоутро́бием, слодо́блюся ви́дети Тебе́, Созда́теля и Спаси́теля моего́, за прия́тие сме́рти кре́стныя, сла́вою и че́стию венча́ннаго, во све́те неприкоснове́нныя Твоея́ сла́вы; иде́же со Безнача́льным Твои́м Отце́м, и со Пресвяты́м, и Благи́м, и Животворя́щим и Единосу́щным Твои́м Ду́хом ца́рствуеши пре́жде век, ны́не и при́сно и во ве́ки веко́в, ами́нь.
Ирмос: Пресека́емое мо́ре жезло́м дре́вле, / Изра́иль про́йде я́ко по пусты́ни, / и крестообра́зно я́ве, предуготовля́ет стези́. / Сего́ ра́ди пои́м во хвале́нии чу́дному Бо́гу на́шему, / я́ко просла́вися.
Ми́лостиве Го́споди, услы́ши моли́тву раб Свои́х, моля́щихся Тебе́.
В день печа́ли наше́дшия на ны / к Тебе́, Христе́ Спа́се, припа́дающе, / Твоея́ ми́лости про́сим. / Облегчи́ боле́знь раба́ Твоего́, / изреки́ нам, я́ко со́тнику: / иди́, се здрав есть о́трок твой.
Ми́лостиве Го́споди, услы́ши моли́тву раб Свои́х, моля́щихся Тебе́.
Мольбы́ и моле́ния с воздыха́нием к Тебе́ вопие́м, Сы́не Бо́жий: / поми́луй нас. / Воздви́гни со одра́ лежа́щаго, я́ко разсла́бленнаго сло́вом: / возьми́ одр твой, глаго́ля, отпуща́ются ти греси́ твои́.
Слава: Твоего́, Христе́, о́браза подо́бию покланя́ющиеся, ве́рою целу́ем, / и боля́щему здра́вия про́сим, подража́юще кровоточи́вей, / я́же подо́льца риз Твои́х косну́ся и исцеле́ние неду́га прия́т.
И ныне: Пречи́стая Госпоже́ Богоро́дице, всем изве́стная Помо́щница, / не пре́зри нас к Тебе́ припа́дающих, / моли́ я́ко бла́га Своего́ Сы́на и Бо́га на́шего / да́ти здра́вие боля́щему, да Тя с на́ми прославля́ет.
Ирмос: И́же от не су́щих вся приведы́й, / сло́вом созида́емая, / соверша́емая Ду́хом / Вседержи́телю Вы́шний, / в любви́ Твое́й утверди́ мене́.
Ми́лостиве Го́споди, услы́ши моли́тву раб Свои́х, моля́щихся Тебе́.
И́же от тя́жких боле́зней на земли́ пове́ржен / к Тебе,́ Христе́, с на́ми вопие́т, / пода́ждь здра́вие телеси́ его́, / я́коже и Езеки́и пла́кавшуся к Тебе́.
Ми́лостиве Го́споди, услы́ши моли́тву раб Свои́х, моля́щихся Тебе́.
При́зри, Го́споди, на на́ше смире́ние и не помяни́ беззако́ний на́ших, / но ве́ры ра́ди боля́щаго, / я́ко прокаже́ннаго сло́вом, исцели́ ему́ боле́знь, / да Твое́, Христе́ Бо́же, сла́вится и́мя.
Слава: Це́рковь, ю́же еси́ освяти́л, / на ту, Христе́, не даждь поноше́ния, / но воздви́гни неви́димо в неду́зе на одре́ лежа́щаго, / в не́йже мо́лим Ти ся: / да не реку́т неве́рнии, где есть Бог их.
И ныне: К Твоему́ пречи́стому, Богоро́дице, о́бразу ру́це возде́юще вопие́м: / услы́ши раб Твои́х моли́тву и спаси́ в боле́зни лежа́щаго, / да от боле́зни воста́в, возда́ст обе́ты, / я́же в печа́ли глаго́лаша уста́ его́.
На одре́ грехо́внем лежа́ща мя, и страстьми́ уя́звлена, / и я́коже воздви́гл еси́ Петро́ву те́щу / и спасе́ разсла́бленнаго носи́ма со одро́м, / та́ко и ны́не посети́, Ми́лостиве, боля́щаго, / понесы́й неду́ги ро́да на́шего. / Тебе́ Еди́наго ве́мы терпели́ва и милосе́рда, / ми́лостива врача́ душа́м и телесе́м, Христа́ Бо́га на́шего, / наводя́ща неду́ги и па́ки исцеля́юща, / подава́юща проще́ние ка́ющимся о согреше́ниих, / Еди́наго Милосе́рдаго и Ми́лостиваго.
Слава: Аз гре́шный пла́чуся на одре́ свое́м лежа́, / проще́ние ми пода́ждь, Христе́ Бо́же, / и от боле́зни сея́ воздви́гни мя, / и я́же есмь от ю́ности грехи́ сотвори́л, / избы́ти ми сих моли́твами Богоро́дицы да́руй.
И ныне: Умилосе́рдися и спаси́ мя, / воздви́гни мя от одра́ боле́зненнаго, / мощь бо моя́ во мне изнемо́же / и весь неча́янием одержи́м есмь, Ма́ти Бо́жия Пречи́стая, / исцели́ неду́гующа лю́те, / Ты бо еси́ Помо́щница христиа́ном.
Ирмос: Положи́л еси́ к нам тве́рдую любо́вь, Го́споди, / Единоро́днаго бо Твоего́ Сы́на за ны на смерть дал еси́. / Те́мже Ти зове́м благодаря́ще: / сла́ва си́ле Твое́й, Го́споди.
Ми́лостиве Го́споди, услы́ши моли́тву раб Свои́х, моля́щихся Тебе́.
Уже́ отча́янна лю́тым неду́гом / и к сме́рти прибли́жившася возврати́, Христе́, на живо́т / и даждь пла́чущимся уте́ху, / да вси прославля́ем Твоя́ свята́я чудеса́.
Ми́лостиве Го́споди, услы́ши моли́тву раб Свои́х, моля́щихся Тебе́.
Тебе́, Тво́рче, ка́емся во свои́х гресе́х, / я́ко не хо́щеши сме́рти гре́шничи, / оживи́, уздра́ви боля́щаго, / да возста́в послу́жит Ти, / испове́дуя с на́ми Твою́ бла́гость.
Слава: Сле́зы Манаси́ины, ниневи́тян покая́ние, / Дави́дово испове́дание прии́м, вско́ре спасл еси́, / и на́ши моли́твы ны́не приими́, / даждь здра́вие боля́щему, о не́мже Тя мо́лим.
И ныне: Пода́ждь нам Твою́ ми́лость, Госпоже́, / всегда́ на Тя наде́ющимся, / испроси́ здра́вие боля́щему, / враче́бнии Твои́ ру́це с Предте́чею, Богоро́дице, / ко Го́споду Бо́гу простира́ющи.
Ирмос: На земли́ неви́димый яви́лся еси́, / и челове́ком во́лею сожи́л еси́ непости́жимый, / и к Тебе́ у́тренююще, / воспева́ем Тя, Человеколю́бче.
Ми́лостиве Го́споди, услы́ши моли́тву раб Свои́х, моля́щихся Тебе́.
Дщерь Иаи́рову уже́ уме́ршу, я́ко Бог оживи́л еси́, / и ны́не возведи́, Христе́ Бо́же, от врат сме́ртных боля́щаго, / Ты бо еси́ путь и живо́т всем.
Ми́лостиве Го́споди, услы́ши моли́тву раб Свои́х, моля́щихся Тебе́.
Сы́на вдови́ча оживи́в, Спа́се, / и тоя́ сле́зы преложи́в на ра́дость, / спаси́ от неду́га тле́ющаго раба́ Своего́, / да и на́ша скорбь и боле́знь на ра́дость прии́дет.
Слава: О́гненну боле́знь Петро́ве те́ще прикоснове́нием Твои́м исцели́в, / и ны́не возста́ви боля́щаго раба́ Твоего́, / да воста́в, я́ко Ио́на, послу́жит Ти.
И ныне: Ско́рбнии, смире́нии, гре́шнии, не иму́щии дерзнове́ния / к Тебе́, Пречи́стая Богома́ти, вопие́м: / умоли́ Сы́на Своего́ Христа́ / да́ти боля́щему здра́вие телеси́.
Ирмос: Бе́здна после́дняя грехо́в обы́де мя, / и исчеза́ет дух мой: / но простры́й, Влады́ко, высо́кую Твою́ мы́шцу, / я́ко Петра́ мя Упра́вителю, спаси́.
Ми́лостиве Го́споди, услы́ши моли́тву раб Свои́х, моля́щихся Тебе́.
Бе́здну милосе́рдия и ми́лости име́я, Христе́ Бо́же, / услы́ши моле́ния раб Твои́х. / Ты бо еси́ Петро́м Тави́фу воскреси́в, / Ты и ны́не в боле́зни лежа́щаго воздви́гни, / послу́шав церко́вных моли́твенник.
Ми́лостиве Го́споди, услы́ши моли́тву раб Свои́х, моля́щихся Тебе́.
Врачу́ душа́м и телесе́м на́шим, / понесы́й неду́ги всего́ ми́ра, Христе́, / и Ене́я Па́влом исцели́вый, / Ты и ны́не боля́щаго исцели́, / святы́х апо́стол моли́твами.
Слава: Преложи́, Христе́, на ра́дость рыда́ние о неду́жнем скорбя́щих, / да Твою́ получи́в ми́лость, вни́дет в дом Твой, со обе́тными дарми́, / сла́вяща Тя в Тро́ице Еди́наго Бо́га.
И ныне: Прииди́те, о дру́зи, поклони́мся / моля́щеся о боля́щем Бо́жией Ма́тери. / Та бо име́ет власть неду́жныя исцеля́ти, со безме́здникома вку́пе, / духо́вным неви́димо помазу́юще ма́слом.
Ду́шу мою́, Го́споди, во гресе́х вся́ческих, / безме́стными дея́ньми разсла́блену, / воздви́гни Боже́ственным Свои́м человеколю́бием, / я́коже и разсла́бленнаго воздви́гл еси́ дре́вле, / да зову́ Ти спаса́ем: / ще́дре Христе́, даждь ми исцеле́ние.
Икос: И́же руки́ Своея́ го́рстию содержа́й концы́, Иису́се Бо́же, / И́же Отцу́ Собезнача́льный и Ду́ху Свято́му совлады́чествуя, / я́ко пло́тию, яви́лся еси́, неду́ги исцеля́я, / и стра́сти очи́стил еси́, слепы́я просвети́л еси́, / и разсла́бленнаго сло́вом Боже́ственным совозста́вил еси́, / сего́ пра́во ходя́ща сотвори́в, и одр повеле́л еси́ на ра́мо взя́ти. / Те́мже вси с ним воспева́ем и пое́м: / ще́дре Христе́, даждь ми исцеле́ние.
Ирмос: Пре́жде о́бразу злато́му, / перси́дскому чти́лищу о́троцы не поклони́шася, / трие́ пою́ще посреде́ пе́щи: / отце́в Бо́же, благослове́н еси́.
Ми́лостиве Го́споди, услы́ши моли́тву раб Свои́х, моля́щихся Тебе́.
О Кре́сте Пресвяты́й Христо́в, Честно́е Дре́во живо́тное, / тобо́ю смерть поги́бе и ме́ртвии воскресо́ша, / и ны́не боля́щаго исцели́ и оживи́, / я́коже при Еле́не уме́ршую деви́цу.
Ми́лостиве Го́споди, услы́ши моли́тву раб Свои́х, моля́щихся Тебе́.
До́лгую и лю́тую боле́знь И́овлю на гно́ищи и в че́рвех того́ моля́щася, / слово́м исцели́л еси́, Го́споди. / И ны́не же в Це́ркви о боля́щем мо́лим Тя: / я́ко благ исцели́ неви́димо моли́твами святы́х Твои́х.
Слава: Вси ве́мы, я́ко умре́ти нам есть, Тебе́ Бо́гу та́ко изво́лившу, / но на ма́ло вре́мя, Ми́лостиве, здра́вия про́сим боля́щему, / премени́ от сме́рти на живо́т, даждь скорбя́щим уте́ху.
И ныне: Посо́бствуй и помога́й на́шему сиро́тству, Богоро́дице, / Ты бо ве́си вре́мя и час, егда́ умоли́ти Сы́на Твоего́ и Бо́га на́шего, / да́ти боля́щему здра́вие и проще́ние от всех грех.
Ирмос: Служи́ти живо́му Бо́гу, в Вавило́не о́троцы претерпе́вше, / о мусики́йских орга́нех неради́ша, / и посреде́ пла́мени стоя́ще боголе́пную песнь воспева́ху, глаго́люще: / благослови́те вся дела́ Госпо́дня Го́спода.
Ми́лостиве Го́споди, услы́ши моли́тву раб Свои́х, моля́щихся Тебе́.
Ми́лость покажи́, Влады́ко, в боле́зни раба́ Твоего́, / и ско́ро исцели́, ми́лостиве Христе́ Бо́же, / и еще́ сме́рти не преда́ждь су́дней, да Ти покая́ние возда́ст. / Сам бо рекл еси́: не хощу́ сме́рти гре́шничи.
Ми́лостиве Го́споди, услы́ши моли́тву раб Свои́х, моля́щихся Тебе́.
Го́споди ми́лостиве, Твоя́ пресла́вная чудеса́ да и до нас ны́не дости́гнут: / бе́сы прожени́, неду́ги погуби́, / ра́ны исцели́, боле́зни уврачу́й, / и потво́ры и чароде́яния, и вся́кие я́зи изба́ви ны.
Слава: Запрети́вый, Христе́, морски́м ве́тром, / и страх учени́к на ра́дость преложи́вый, / запрети́ и ны́не тя́жким боле́знем, тружда́ющим раба́ Твоего́, / да вси возвесели́мся, хва́ляще Тя во ве́ки.
И ныне: Изба́ви, Богоро́дице, от обыше́дших ны печа́лей, / разли́чных неду́г, отра́вы же и чароде́йства, / и бесо́вского мечта́ния и от наве́та злых челове́к / и напра́сныя сме́рти, мо́лим ти ся.
Ирмос: На Сина́йстей горе́ ви́де Тя в купине́ Моисе́й, / неопа́льно огнь Божества́ заче́ншую во чре́ве; / Дании́л же Тя ви́де го́ру несеко́мую, / жезл прозя́бший, Иса́ия взыва́ше, / от ко́рене Дави́дова.
Ми́лостиве Го́споди, услы́ши моли́тву раб Свои́х, моля́щихся Тебе́.
Исто́чниче жи́зни, пода́телю, Христе́, ми́лости, / не отврати́ лица́ Твоего́ от нас. / Обле́гчи боле́знь утружде́нному боле́знею, / и воздви́гни я́ко Фадде́ем А́вгаря, / да при́сно Тебе́ сла́вит, со Отце́м и Святы́м Ду́хом.
Ми́лостиве Го́споди, услы́ши моли́тву раб Свои́х, моля́щихся Тебе́.
Ева́нгельскому ве́рующе гла́су, / Твоего́ и́щем обе́та, Христе́: / проси́те, рекл еси́ бо, рече́, и да́стся вам. / Тем и ны́не предстоя́ще мо́лим Тя, / возста́ви со одра́ здра́ва лю́тым пове́ржена неду́гом, / да Тя с на́ми вку́пе велича́ет.
Слава: Му́чимый неду́гом, внутрь неви́димыми ра́нами, / Тебе́, Христе́, с на́ми вопие́т, / не нам, Го́споди, не нас ра́ди, вси бо испо́лнены грехо́в, / но Ма́терними Ти и Предте́чевыми моли́твами / даждь исцеле́ние боля́щему, да Тя вси возвели́чим.
И ныне: Бо́жия Ма́ти Пречи́стая, / со все́ми святы́ми призыва́ем Тя, / со А́нгелы и Арха́нгелы, / со проро́ки и патриа́рхи, со апо́столы, / с преподо́бными и пра́ведными / моли́ся Христу́ Бо́гу на́шему / да́ти здра́вие боля́щему, да Тя вси велича́ем.
Бо́же си́льный, ми́лостию стро́яй вся на спасе́ние ро́ду челове́ческому, посети́ раба́ Своего́ сего́ (имярек), нарица́юща и́мя Христа́ Твоего́, исцели́ его́ от вся́каго неду́га плотска́го и душе́внаго; и отпусти́ грех, и грехо́вные собла́зны, и вся́ку напа́сть, и вся́ко наше́ствие неприя́зненно дале́че сотвори́ от раба́ Твоего́. И воздви́гни от одра́ грехо́внаго, и устро́й его во Святу́ю Твою́ Це́рковь здр́ава душе́ю и те́лом, и де́лы до́брыми сла́вящаго со все́ми людьми́ и́мя Христа́ Твоего́, я́ко Тебе́ сла́ву возсыла́ем, со Единоро́дным Твои́м Сы́ном, и со Святы́м Ду́хом ны́не и при́сно и во ве́ки веко́в. Ами́нь.
Подобает ведати, яко от сего дне святыя и великия Недели Пасхи даже до субботы, часы сице поются.
Наченшу иерею: Благослове́н Бог наш:
Аще ли не иерей: Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Лик: Ами́нь. Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.
Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному, / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси ве́рнии, / поклони́мся Свято́му Христо́ву Воскресе́нию: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́.
Предвари́вшия у́тро, я́же о Мари́и, / и обре́тшия ка́мень отвале́н от гро́ба, / слы́шаху от А́нгела: во све́те присносу́щнем Су́щаго / с ме́ртвыми что и́щете, я́ко челове́ка? / Ви́дите гро́бныя пелены́, тецы́те и ми́ру пропове́дите, / я́ко воста́ Госпо́дь, умертви́вый смерть, / я́ко есть Сын Бо́га, спаса́ющаго род челове́ческий.
А́ще и во гроб снизше́л еси́, Безсме́ртне, / но а́дову разруши́л еси́ си́лу / и воскре́сл еси́, я́ко Победи́тель, Христе́ Бо́же, / жена́м мироно́сицам веща́вый: ра́дуйтеся! / И Твои́м апо́столом мир да́руяй, / па́дшим подая́й воскресе́ние.
Во гро́бе пло́тски, во а́де же с душе́ю я́ко Бог, / в раи́ же с разбо́йником, и на Престо́ле был еси́ Христе́, со Отце́м и Ду́хом, / вся исполня́яй, неопи́санный.
Слава: Я́ко Живоно́сец, я́ко рая́ красне́йший, / вои́стину и черто́га вся́каго ца́рскаго показа́ся светле́йший, Христе́, гроб Твой, / исто́чник на́шего воскресе́ния.
И ныне, Богородичен: Вы́шняго освяще́нное Боже́ственное селе́ние, ра́дуйся, / Тобо́ю бо даде́ся ра́дость, Богоро́дице, зову́щим: / благослове́нна Ты в жена́х еси́, Всенепоро́чная Влады́чице.
Таже Го́споди, поми́луй, 40.
Сла́ва, и ны́не: Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу Тя велича́ем.
И́менем Госпо́дним благослови́, о́тче.
Иерей: Моли́твами святы́х оте́ц на́ших: Мы же речем: Ами́нь.
И паки глаголем подобне: Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в. Трижды.
Сла́ва, и ны́не: Го́споди, поми́луй, трижды. Благослови́. И отпуст перваго часа.
Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в. Трижды.
И нам дарова́ живо́т ве́чный, / покланя́емся Его́ / тридне́вному Воскресе́нию.
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды. Сла́ва, и ны́не:
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Живы́й в по́мощи Вы́шняго, в кро́ве Бо́га небе́снаго водвори́тся. Рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна, плещма́ Свои́ма осени́т тя, и под криле́ Его́ наде́ешися, ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща и бе́са полу́деннаго. Паде́т от страны́ твое́й ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́; Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́; на а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́; покры́ю и́, я́ко позна́ и́мя мое́. Воззове́т ко Мне, и услы́шу его́, с ним есмь в ско́рби, изму́ его́ и просла́влю его́, долгото́ю дней испо́лню его́ и явлю́ ему́ спасе́ние мое́.
Слава, и ныне: Аллилу́иа, аллилу́иа, аллилу́иа, сла́ва Тебе́, Бо́же. Трижды.
Со ду́хи пра́ведных сконча́вшихся, / ду́шу раба́ Твоего́ [или рабы́ Твоея́], Спа́се, упоко́й, / сохраня́я ю́ во блаже́нной жи́зни, / я́же у Тебе́, Человеколю́бче.
В поко́ищи Твое́м, Го́споди, / иде́же вси святи́и Твои́ упокоева́ются, / упоко́й и ду́шу раба́ Твоего́ [или рабы́ Твоея́], я́ко еди́н еси́ Человеколю́бец.
Слава: Ты еси́ Бог соше́дый во ад, и у́зы окова́нных разреши́вый, / Сам и ду́шу раба́ Твоего́ [или рабы́ Твоея́] упоко́й.
И ныне: Еди́на чи́стая и непоро́чная Де́во, Бо́га без се́мене ро́ждшая, / моли́ спасти́ся души́ его́ [или ея́].
Со святы́ми упоко́й, / Христе́, ду́шу раба́ Твоего́ [или рабы́ Твоея́], / иде́же несть боле́знь, ни печа́ль, / ни воздыха́ние, / но жизнь безконе́чная.
Икос: Сам еди́н еси́ безсме́ртный, / сотвори́вый и созда́вый челове́ка: / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́, и в зе́млю оты́деши: / а́може вси челове́цы по́йдем, / надгро́бное рыда́ние творя́ще песнь: / аллилу́ия, аллилу́ия, аллилу́ия.
Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды. Благослови́.
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Ве́чная ва́ша па́мять, достоблаже́ннии отцы́ и бра́тия на́ша, при́сно помина́емии. Трижды.
Душа́ его́ [или ея́] во благи́х водвори́тся, и па́мять его́ [или ея́] в род и род.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.
Со ду́хи пра́ведных сконча́вшихся, / ду́шу раба́ Твоего́ [или рабы́ Твоея́], Спа́се, упоко́й, / сохраня́я ю́ во блаже́нной жи́зни, / я́же у Тебе́, Человеколю́бче.
В поко́ищи Твое́м, Го́споди, / иде́же вси святи́и Твои́ упокоева́ются, / упоко́й и ду́шу раба́ Твоего́ [или рабы́ Твоея́], я́ко еди́н еси́ Человеколю́бец.
Слава: Ты еси́ Бог соше́дый во ад, и у́зы окова́нных разреши́вый, / Сам и ду́шу раба́ Твоего́ [или рабы́ Твоея́] упоко́й.
И ныне: Еди́на чи́стая и непоро́чная Де́во, Бо́га без се́мене ро́ждшая, / моли́ спасти́ся души́ его́ [или ея́].
Со святы́ми упоко́й, / Христе́, ду́шу раба́ Твоего́ [или рабы́ Твоея́], / иде́же несть боле́знь, ни печа́ль, / ни воздыха́ние, / но жизнь безконе́чная.
А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победитель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом мир да́руяй, / па́дшим подая́й воскресе́ние.
Упоко́й, Го́споди, ду́шу раба́ Твоего́ [или рабы́ Твоея́] (имярек), и прости́ ему́ [или ей] вся согреше́ния во́льная и нево́льная, и да́руй ему́ [или ей] Ца́рствие Небе́сное.
Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Го́споди, поми́луй, трижды. Благослови́.
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Трижды.
И нам дарова́ живо́т ве́чный, / покланя́емся Его́ / тридне́вному Воскресе́нию.
И обращаемся к лежащим в могиле со словами: Христо́с воскре́се!
Аще иерей, глаголет: Благослове́н Бог наш:
Аще же несвященный, глаголет: Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Царю́ Небе́сный: Святы́й Бо́же: [трижды.] Сла́ва, и ны́не: Пресвята́я Тро́ице: Го́споди поми́луй, [трижды.] Сла́ва, и ны́не: О́тче наш: Го́споди поми́луй, 12. Сла́ва, и ны́не: Прииди́те, поклони́мся: [трижды.]
Госпо́дь просвеще́ние мое́ и Спаси́тель мой, кого́ убою́ся? Госпо́дь Защи́титель живота́ моего́, от кого́ устрашу́ся? Внегда́ приближа́тися на мя зло́бующым, е́же сне́сти пло́ти моя́, оскорбля́юшии мя, и врази́ мои́, ти́и изнемо́гоша и падо́ша. А́ще ополчи́тся на мя полк, не убои́тся се́рдце мое́, а́ще воста́нет на мя брань, на Него́ аз упова́ю. Еди́но проси́х от Го́спода, то взыщу́: е́же жи́ти ми в дому́ Госпо́дни вся дни живота́ моего́, зре́ти ми красоту́ Госпо́дню и посеща́ти храм святы́й Его́. Я́ко скры мя в селе́нии Свое́м в день зол мои́х, покры́ мя в та́йне селе́ния Своего́, на ка́мень вознесе́ мя. И ны́не се вознесе́ главу́ мою́, на враги́ моя́: обыдо́х и пожро́х в селе́нии Его́ же́ртву хвале́ния и воскликнове́ния, пою́ и воспою́ Го́сподеви. Услы́ши, Го́споди, глас мой, и́мже воззва́х: поми́луй мя и услы́ши мя. Тебе́ рече́ се́рдце мое́, Го́спода взыщу́. Взыска́ Тебе́ лице́ мое́, лица́ Твоего́, Го́споди, взыщу́. Не отврати́ лица́ Твоего́ от мене́ и не уклони́ся гне́вом от раба́ Твоего́: помо́щник мой бу́ди, не отри́ни мене́, и не оста́ви мене́, Бо́же Спаси́телю мой. Я́ко оте́ц мой и ма́ти моя́ оста́виста мя, Госпо́дь же восприя́т мя. Законоположи́ ми, Го́споди, в пути́ Твое́м и наста́ви мя на стезю́ пра́вую враг мои́х ра́ди. Не преда́ждь мене́ в ду́шы стужа́ющих ми, я́ко воста́ша на мя свиде́теле непра́веднии и солга́ непра́вда себе́. Ве́рую ви́дети блага́я Госпо́дня на земли́ живы́х. Потерпи́ Го́спода, мужа́йся и да крепи́тся се́рдце твое́, и потерпи́ Го́спода.
Блаже́ни, и́хже оста́вишася беззако́ния и и́хже прикры́шася греси́. Блаже́н муж, eму́же не вмени́т Госпо́дь греха́, ниже́ есть во усте́х eго́ лесть. Я́ко умолча́х, обетша́ша ко́сти моя́, от е́же зва́ти ми весь день. Я́ко день и нощь отяготе́ на мне рука́ Твоя́, возврати́хся на страсть, егда́ унзе́ ми терн. Беззако́ние мое́ позна́х и греха́ моего́ не покры́х, рех: испове́м на мя беззако́ние мое́ Го́сподеви, и Ты оста́вил еси́ нече́стие се́рдца моего́. За то помо́лится к Тебе́ всяк преподо́бный во вре́мя благопотре́бно: оба́че в пото́пе вод мно́гих к нему́ не прибли́жатся. Ты еси́ прибе́жище мое́ от ско́рби обдержа́щия мя: ра́досте моя́, изба́ви мя от обыше́дших мя. Вразумлю́ тя и наста́влю тя на путь сей, во́ньже по́йдеши, утвержу́ на тя о́чи Мои́. Не бу́дите я́ко конь и меск, и́мже несть ра́зума: брозда́ми и уздо́ю че́люсти их востя́гнеши, не приближа́ющихся к тебе́. Мно́ги ра́ны гре́шному, упова́ющаго же на Го́спода ми́лость обы́дет. Весели́теся о Го́споде, и ра́дуйтеся, пра́веднии, и хвали́теся, вси пра́вии се́рдцем.
Поми́луй мя, Бо́же, поми́луй мя, я́ко на Тя упова́ душа́ моя́, и на сень крилу́ Твое́ю наде́юся, до́ндеже пре́йдет беззако́ние. Воззову́ к Бо́гу Вы́шнему, Бо́гу, благоде́явшему мне. Посла́ с Небесе́ и спасе́ мя, даде́ в поноше́ние попира́ющыя мя, посла́ Бог ми́лость Свою́ и и́стину Свою́, и изба́ви ду́шу мою́ от среды́ ски́мнов. Поспа́х смуще́н, сы́нове челове́честии, зу́бы их ору́жия и стре́лы, и язы́к их меч остр. Вознеси́ся на Небеса́, Бо́же, и по всей земли́ сла́ва Твоя́. Сеть угото́ваша нога́м мои́м и сляко́ша ду́шу мою́, ископа́ша пред лице́м мои́м я́му и впадо́ша в ню. Гото́во се́рдце мое́, Бо́же, гото́во се́рдце мое́, воспою́ и пою́ во сла́ве мое́й. Воста́ни сла́ва моя́, воста́ни псалти́рю и гу́сли, воста́ну ра́но. Испове́мся Тебе́ в лю́дех, Го́споди, воспою́ Тебе́ во язы́цех, я́ко возвели́чися до Небе́с ми́лость Твоя́, и да́же до о́блак и́стина Твоя́. Вознеси́ся на Небеса́, Бо́же, и по всей земли́ сла́ва Твоя́.
Таже, Трисвятое. И по О́тче наш:
Объя́тия О́тча отве́рсти ми потщи́ся, / блу́дно мое́ ижди́х жити́е, / на бога́тство неиждива́емое взира́яй щедро́т Твои́х, Спа́се, / ны́не обнища́вшее мое́ да не пре́зриши се́рдце. / Тебе́ бо, Го́споди, умиле́нием зову́: / согреши́х на не́бо и пред Тобо́ю.
Слава: Егда́ прии́деши, Бо́же, на зе́млю со сла́вою, / и трепе́щут вся́ческая, / река́ же о́гненная пред суди́щем влече́т, / кни́ги разгиба́ются и та́йная явля́ются, / тогда́ изба́ви мя от огня́ неугаси́маго, / и сподо́би мя одесну́ю Тебе́ ста́ти, Судие́ пра́веднейший.
И ныне: Ма́терь Тя Бо́жию све́мы вси Де́ву вои́стинну и по Рождестве́ я́вльшуюся, / любо́вию прибега́ющии к Твое́й бла́гости: / Тебе́ бо и́мамы гре́шнии предста́тельство, / Тебе́ стяжа́хом в напа́стех спасе́ние, / Еди́ну Всенепоро́чную.
Посем: Го́споди, поми́луй, 30. Таже, Прииди́те, поклони́мся: [трижды.]
Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю и вознесе́м и́мя Его́ вку́пе. Взыска́х Го́спода и услы́ша мя, и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и́, и от всех скорбе́й eго́ спасе́ и́. Ополчи́тся А́нгел Госпо́день о́крест боя́щихся Его́, и изба́вит их. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси святи́и Его́, я́ко несть лише́ния боя́щымся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто́ есть челове́к хотя́й живо́т, любя́й дни ви́дети бла́ги? Удержи́ язы́к твой от зла, и устне́ твои́, е́же не глаго́лати льсти. Уклони́ся от зла и сотвори́ бла́го. Взыщи́ ми́ра, и пожени́ и́. О́чи Госпо́дни на пра́ведныя, и у́ши Его́ в моли́тву их. Лице́ же Госпо́дне на творя́щыя зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их, и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегре́шат. Изба́вит Госпо́дь ду́шы раб Свои́х, и не прегреша́т вси, упова́ющии на Него́.
Рех: сохраню́ пути́ моя́, е́же не согреша́ти ми язы́ком мои́м: положи́х усто́м мои́м храни́ло, внегда́ воста́ти гре́шному предо мно́ю. Онеме́х и смири́хся, и умолча́х от благ, и боле́знь моя́ обнови́ся. Согре́яся се́рдце мое́ во мне, и в поуче́нии мое́м разгори́тся огнь. Глаго́лах язы́ком мои́м: скажи́ ми, Го́споди, кончи́ну мою́ и число́ дней мои́х, ко́е есть? Да разуме́ю, что лиша́юся аз? Се пя́ди положи́л еси́ дни моя́, и соста́в мой я́ко ничто́же пред Тобо́ю, оба́че вся́ческая суета́ всяк челове́к живы́й. У́бо о́бразом хо́дит челове́к, оба́че всу́е мяте́тся: сокро́вищствует, и не весть, кому́ собере́т я́. И ны́не кто терпе́ние мое́, не Госпо́дь ли? И соста́в мой от Тебе́ есть. От всех беззако́ний мои́х изба́ви мя, поноше́ние безу́мному дал мя еси́. Онеме́х и не отверзо́х уст мои́х, я́ко Ты сотвори́л еси́. Отста́ви от мене́ ра́ны Твоя́: от кре́пости бо руки́ Твоея́ аз исчезо́х. Во обличе́ниих о беззако́нии наказа́л еси́ челове́ка и иста́ял еси́, я́ко паучи́ну, ду́шу eго́: оба́че всу́е всяк челове́к. Услы́ши моли́тву мою́, Го́споди, и моле́ние мое́ внуши́, слез мои́х не премолчи́: я́ко пресе́льник аз есмь у Тебе́ и пришле́ц, я́коже вси отцы́ мои́. Осла́би ми, да почи́ю, пре́жде да́же не отъиду́, и ктому́ не бу́ду.
Блаже́н разумева́яй на ни́ща и убо́га, в день лют изба́вит eго́ Госпо́дь. Госпо́дь да сохрани́т eго́ и живи́т eго́, и да ублажи́т eго́ на земли́, и да не преда́ст eго́ в ру́ки враго́в eго́. Госпо́дь да помо́жет eму́ на одре́ боле́зни eго́: все ло́же eго́ обрати́л еси́ в боле́зни eго́. Аз рех: Го́споди, поми́луй мя, исцели́ ду́шу мою́, я́ко согреши́х Ти. Врази́ мои́ ре́ша мне зла́я: когда́ у́мрет и поги́бнет и́мя eго́? И вхожда́ше ви́дети, всу́е глаго́лаше се́рдце eго́, собра́ беззако́ние себе́, исхожда́ше вон и глаго́лаше вку́пе. На мя шепта́ху вси врази́ мои́, на мя помышля́ху зла́я мне. Сло́во законопресту́пное возложи́ша на мя: еда́ спяй не приложи́т воскресну́ти? И́бо челове́к ми́ра моего́, на него́же упова́х, яды́й хле́бы моя́, возвели́чи на мя запина́ние. Ты же, Го́споди, поми́луй мя и возста́ви мя и возда́м им. В сем позна́х, я́ко восхоте́л мя еси́, я́ко не возра́дуется враг мой о мне. Мене́ же за незло́бие прия́л и утверди́л мя еси́ пред Тобою́ в век. Благослове́н Госпо́дь Бог Изра́илев от ве́ка и до ве́ка: бу́ди, бу́ди.
Таже, Трисвятое. И по О́тче наш:
Смире́нную мою́ ду́шу посети́, Го́споди, / во гресе́х все житие́ ижди́вшую, / и́мже о́бразом блудни́цу, приими́ и мене́, и спаси́ мя.
Слава: Все житие́ мое́ сра́мно ижди́х, Го́споди, со блудни́цами окая́нный. / Я́коже блу́дный умиле́нием зову́: / О́тче Небе́сный, согреши́х, очи́сти и спаси́ мя, / и не отри́ни мене́, сама́го себе́ от Тебе́ удали́вшаго, / и безпло́дных ра́ди дел ны́не обнища́вшаго.
И ныне: К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.
Посем: Го́споди, поми́луй, 30. Таже, Прииди́те, поклони́мся: [трижды.]
Бо́же, в по́мощь мою́ вонми́, Го́споди, помощи́ ми потщи́ся. Да постыдя́тся и посра́мятся и́щущии ду́шу мою́, да возвратя́тся вспять и постыдя́тся хотя́щии ми зла́я. Да возвратя́тся а́бие стыдя́щеся глаго́лющии ми: бла́гоже, бла́гоже. Да возра́дуются и возвеселя́тся о Тебе́ вси и́щущии Тебе́, Бо́же, и да глаго́лют вы́ну, да возвели́чится Госпо́дь, лю́бящии спасе́ние Твое́: аз же нищ есмь и убо́г, Бо́же, помози́ ми: Помо́щник мой и Изба́витель мой еси́ Ты, Го́споди, не закосни́.
На Тя, Го́споди, упова́х, да не постыжу́ся в век. Пра́вдою Твое́ю изба́ви мя и изми́ мя, приклони́ ко мне у́хо Твое́ и спаси́ мя. Бу́ди ми в Бо́га Защи́тителя и в ме́сто кре́пко спасти́ мя, я́ко утверже́ние мое́ и прибе́жище мое́ еси́ Ты. Бо́же мой, изба́ви мя из руки́ гре́шнаго, из руки́ законопресту́пнаго и оби́дящаго, я́ко Ты еси́ терпе́ние мое́, Го́споди, Го́споди, упова́ние мое́ от ю́ности моея́. В Тебе́ утверди́хся от утро́бы, от чре́ва ма́тере моея́ Ты еси́ мой покрови́тель: о Тебе́ пе́ние мое́ вы́ну. Я́ко чу́до бых мно́гим, и Ты помо́щник мой кре́пок. Да испо́лнятся уста́ моя́ хвале́ния, я́ко да воспою́ сла́ву Твою́, весь день великоле́пие Твое́. Не отве́ржи мене́ во вре́мя ста́рости, внегда́ оскудева́ти кре́пости мое́й, не оста́ви мене́. Я́ко ре́ша врази́ мои́ мне, и стрегу́щии ду́шу мою́ совеща́ша вку́пе, глаго́люще: Бог оста́вил есть eго́, пожени́те и ими́те eго́, я́ко несть избавля́яй. Бо́же мой, не удали́ся от мене́, Бо́же мой, в по́мощь мою́ вонми́. Да постыдя́тся и исче́знут оклевета́ющии ду́шу мою́, да облеку́тся в студ и срам и́щущии зла́я мне. Аз же всегда́ возупова́ю на Тя и приложу́ на вся́ку похвалу́ Твою́. Уста́ моя́ возвестя́т пра́вду Твою́, весь день спасе́ние Твое́, я́ко не позна́х кни́жная. Вни́ду в си́ле Госпо́дни, Го́споди, помяну́ пра́вду Тебе́ Еди́наго. Бо́же мой, и́мже научи́л мя еси́ от ю́ности моея́, и до ны́не возвещу́ чудеса́ Твоя́, и да́же до ста́рости и престаре́ния, Бо́же мой, не оста́ви мене́, до́ндеже возвещу́ мы́шцу Твою́ ро́ду всему́ гряду́щему, си́лу Твою́ и пра́вду Твою́, Бо́же, да́же до вы́шних, я́же сотвори́л ми еси́ вели́чия. Бо́же, кто подо́бен Тебе́? Ели́ки яви́л ми еси́ ско́рби мно́ги и злы, и обра́щься оживотвори́л мя еси́, и от бездн земли́ возве́л мя еси́. Умно́жил еси́ на мне вели́чествие Твое́, и обра́щься уте́шил мя еси́, и от бездн земли́ па́ки возве́л мя еси́. И́бо аз испове́мся Тебе́ в лю́дех, Го́споди, в сосу́дех псало́мских и́стину Твою́, Бо́же, воспою́ Тебе́ в гу́слех, Святы́й Изра́илев. Возра́дуетеся устне́ мои́, егда́ воспою́ Тебе́, и душа́ моя́, ю́же еси́ изба́вил. Еще́ же и язы́к мой весь день поучи́тся пра́вде Твое́й, егда́ постыдя́тся и посра́мятся и́щущии зла́я мне.
Гла́сом мои́м ко Го́споду воззва́х, гла́сом мои́м к Бо́гу, и внят ми. В день ско́рби моея́ Бо́га взыска́х рука́ма мои́ма, но́щию пред Ним, и не прельще́н бых. Отве́ржеся уте́шитися душа́ моя́. Помяну́х Бо́га и возвесели́хся, поглумля́хся и малоду́шествоваше дух мой. Предвари́сте стражбы́ о́чи мои́: смято́хся и не глаго́лах. Помы́слих дни пе́рвыя, и ле́та ве́чная помяну́х, и поуча́хся: но́щию се́рдцем мои́м глумля́хся, и тужа́ше дух мой: еда́ во ве́ки отри́нет Госпо́дь, и не приложи́т благоволи́ти па́ки? Или́ до конца́ ми́лость Свою́ отсече́т, сконча́ глаго́л от ро́да в род? Еда́ забу́дет уще́дрити Бог? Или́ удержи́т во гне́ве Свое́м щедро́ты Своя́? И рех: ны́не нача́х, сия́ изме́на десни́цы Вы́шняго. Помяну́х дела́ Госпо́дня, я́ко помяну́ от нача́ла чудеса́ Твоя́, и поучу́ся во всех де́лех Твои́х, и в начина́ниих Твои́х поглумлю́ся. Бо́же, во святе́м путь Твой: кто бог ве́лий я́ко Бог наш? Ты еси́ Бог творя́й чудеса́: сказа́л еси́ в лю́дех си́лу Твою́, изба́вил еси́ мы́шцею Твое́ю лю́ди Твоя́, сы́ны Иа́ковли и Ио́сифовы. Ви́деша Тя во́ды, Бо́же, ви́деша Тя во́ды, и убоя́шася: смято́шася бе́здны, мно́жество шу́ма вод, глас да́ша о́блацы, и́бо стре́лы Твоя́ прехо́дят. Глас гро́ма Твоего́ в колеси́, освети́ша мо́лния Твоя́ вселе́нную: подви́жеся и тре́петна бысть земля́. В мо́ри путие́ Твои́, и стези́ Твои́ в вода́х мно́гих, и следы́ Твоя́ не позна́ются. Наста́вил еси́ я́ко о́вцы лю́ди Твоя́ руко́ю Моисе́овою и Ааро́нею.
Таже, Трисвятое. И по О́тче наш:
Помышля́ю день стра́шный / и пла́чу дея́ний мои́х лука́вых, / ка́ко отвеща́ю Безсме́ртному Царю́? / Или́ ко́им дерзнове́нием воззрю́ на Судию́, блу́дный аз? / Благоутро́бный О́тче, Сы́не Единоро́дный, / Ду́ше Святы́й, поми́луй мя.
Слава: Во юдо́ли плаче́вне, / на ме́сте, е́же завеща́л еси́, / егда́ ся́деши, Ми́лостиве, сотвори́ти пра́ведный суд, / не обличи́ моя́ сокрове́нная, / ниже́ посрами́ мене́ пред А́нгелы, / но пощади́ мя, Бо́же, и поми́луй мя.
И ныне: Милосе́рдия две́ри отве́рзи нам, / благослове́нная Богоро́дице, / наде́ющиися на Тя да не поги́бнем, / но да изба́вимся Тобо́ю от бед, / Ты бо еси́ спасе́ние ро́да христиа́нскаго.
Го́споди, поми́луй, 30. Таже, Прииди́те, поклони́мся: [трижды.]
Го́споди, услы́ши моли́тву мою́, и вопль мой к Тебе́ да прии́дет. Не отврати́ лица́ Твоего́ от мене́: во́ньже а́ще день скорблю́, приклони́ ко мне у́хо Твое́: во́ньже а́ще день призову́ Тя, ско́ро услы́ши мя. Я́ко исчезо́ша я́ко дым дни́е мои́, и ко́сти моя́ я́ко суши́ло сосхо́шася. Уя́звен бых я́ко трава́, и и́зсше се́рдце мое́, я́ко забы́х сне́сти хлеб мой. От гла́са воздыха́ния моего́ прильпе́ кость моя́ пло́ти мое́й. Уподо́бихся нея́сыти пусты́нней, бых я́ко нощны́й вран на ны́рищи. Бдех и бых я́ко пти́ца осо́бящаяся на зде. Весь день поноша́ху ми врази́ мои́, и хва́лящии мя мно́ю кленя́хуся. Зане́ пе́пел я́ко хлеб ядя́х, и питие́ мое́ с пла́чем растворя́х. От лица́ гне́ва Твоего́ и я́рости Твоея́: я́ко возне́с низве́ргл мя еси́. Дни́е мои́ я́ко сень уклони́шася, и аз я́ко се́но изсхо́х. Ты же, Го́споди, во век пребыва́еши, и па́мять Твоя́ в род и род. Ты воскре́с уще́дриши Сио́на, я́ко вре́мя уще́дрити eго́, я́ко прии́де вре́мя. Я́ко благоволи́ша раби́ Твои́ ка́мение eго́, и персть eго́ уще́дрят. И убоя́тся язы́цы и́мене Госпо́дня, и вси ца́рие зе́мстии сла́вы Твоея́. Я́ко сози́ждет Госпо́дь Сио́на, и яви́тся во сла́ве Свое́й. Призре́ на моли́тву смире́нных, и не уничижи́ моле́ния их. Да напи́шется сие́ в род ин, и лю́дие зи́ждемии восхва́лят Го́спода. Я́ко прини́че с высоты́ святы́я Своея́, Госпо́дь с Небесе́ на зе́млю призре́, услы́шати воздыха́ние окова́нных, разреши́ти сы́ны умерщвле́нных, возвести́ти в Сио́не И́мя Госпо́дне, и хвалу́ Его́ во Иерусали́ме. Внегда́ собра́тися лю́дем вку́пе, и царе́м, е́же рабо́тати Го́сподеви. Отвеща́ eму́ на пути́ кре́пости eго́: умале́ние дней мои́х возвести́ ми. Не возведи́ мене́ в преполове́ние дней мои́х: в ро́де родо́в ле́та Твоя́. В нача́лех Ты, Го́споди, зе́млю основа́л еси́, и дела́ руку́ Твое́ю суть небеса́. Та поги́бнут, Ты же пребыва́еши: и вся, я́ко ри́за обетша́ют, и я́ко оде́жду свие́ши я́ и изменя́тся. Ты же то́йжде еси́, и ле́та Твоя́ не оскуде́ют. Сы́нове раб Твои́х вселя́тся, и се́мя их во век испра́вится.
Го́споди Вседержи́телю, Бо́же отец на́ших, Авраа́мов, и Исаа́ков, и Иа́ковль, и се́мене их пра́веднаго: сотвори́вый не́бо и зе́млю со все́ю ле́потою их, связа́вый мо́ре сло́вом повеле́ния Твоего́, заключи́вый бе́здну, и запеча́тствовавый ю́ стра́шным и сла́вным и́менем Твои́м, его́же вся боя́тся, и трепе́щут от лица́ си́лы Твоея́, я́ко непостоя́нно великоле́пие сла́вы Твоея́, и нестерпи́мь гнев, е́же на гре́шники преще́ния Твоего́. Безме́рна же и неизсле́дованна ми́лость обеща́ния Твоего́: Ты бо еси́ Госпо́дь Вы́шний, благоутро́бен. долготерпели́в и многоми́лостив, и ка́яйся о зло́бах челове́ческих. Ты Го́споди, по мно́жеству бла́гости Твоея́, обеща́л еси́ покая́ние и оставле́ние согреши́вшим Тебе́, и мно́жеством щедро́т Твои́х, определи́л еси́ покая́ние гре́шником во спасе́ние. Ты у́бо Го́споди Бо́же сил, не положи́л еси́ покая́ние пра́ведным, Авраа́му и Исаа́ку и Иа́кову, не согреши́вшим Тебе́. Но положи́л еси́ покая́ние на мне, гре́шнем: зане́ согреши́х па́че числа́ песка́ морска́го. Умно́жишася беззако́ния моя́, Го́споди, умно́жишася беззако́ния моя́: и несмь досто́ин воззре́ти, и ви́дети высоту́ небе́сную от мно́жества непра́вд мои́х. Сля́чен есмь мно́гими у́зами желе́зными, во е́же не возвести́ главы́ моея́, и несть ми ослабле́ния: зане́ прогне́вах я́рость Твою́, и лука́вое пред Тобо́ю сотвори́х, не сотвори́вый во́ли Твоея́, и не сохрани́вый повеле́ний Твои́х. И ны́не приклоня́ю коле́на се́рдца, тре́буя от Тебе́ бла́гости: согреши́х, Го́споди, согреши́х, и беззако́ния моя́ аз вем, но прошу́ моля́ся, осла́би ми, Го́споди, осла́би ми, и не погуби́ мене́ со беззако́ньми мои́ми. Ниже́ в век враждова́в соблюде́ши зол мои́х, ниже́ осу́диши мя в преиспо́дних земли́. Зане́ Ты еси́ Бо́же, Бог ка́ющихся, и на мне яви́ши всю бла́гость Твою́, я́ко недосто́йна су́ща спасе́ши мя, по мно́зей ми́лости Твое́й, и восхвалю́ Тя вы́ну во днех живота́ моего́, я́ко Тя пое́т вся си́ла небе́сная, и Твоя́ есть сла́ва во ве́ки веко́в, ами́нь.
Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех мiра, поми́луй нас. Взе́мляй грехи́ мiра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят; Ты еси́ Еди́н Госпо́дь, Иису́с Христо́с, в сла́ву Бо́га Отца́, ами́нь. На вся́к день благословлю́ Тя и восхвалю́ и́мя Твое́ во ве́ки, и в век ве́ка. Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой, я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя. Сподо́би, Го́споди, в день сей без греха́ сохрани́тися нам. Благослове́н еси́ Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь. Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми. Го́споди, ми́лость Твоя́ во век, дел руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Велича́я велича́ю Тя, Го́споди, я́ко призре́л еси́ на смире́ние мое́, и не́си мене́ затвори́л в рука́х вра́жиих, но спасл еси́ от нужд ду́шу мою́. И ны́не, Влады́ко, да покры́ет мя рука́ Твоя́, и да прии́дет на мя ми́лость Твоя́, я́ко смяте́ся душа́ моя́, и боле́зненна есть во исхожде́нии свое́м, от окая́ннаго моего́ и скве́рнаго телесе́ сего́. Да не когда́ лука́вый сопоста́та сове́т сря́щет, и препне́т ю́ во тме, за неве́домыя и ве́домыя в житии́ сем бы́вшия ми грехи́. Ми́лостив бу́ди ми, Влады́ко, и да не у́зрит душа́ моя́ мра́чнаго взо́ра лука́вых де́монов, но да прии́мут ю́ А́нгели Твои́ све́тлии и пресве́тлии. Даждь сла́ву и́мени Твоему́ свято́му, и Твое́ю си́лою возведи́ мя на Боже́ственное Твое́ суди́ще, внегда́ суди́тися ми, да не прии́мет мя рука́ кня́зя мiра сего́, е́же исто́ргнути мя, гре́шника, во глубину́ а́дову, но предста́ни ми, и бу́ди ми Спас и Засту́пник. Теле́сныя бо и сия́ муче́ния, весе́лия суть рабо́м Твои́м. Поми́луй, Го́споди, оскверни́вшуюся страстьми́ жития́ сего́ ду́шу мою́, и чи́сту ю́ покая́нием и испове́данием приими́, я́ко благослове́н еси́ во ве́ки веко́в, ами́нь.
Таже, Трисвятое. И по О́тче наш:
О́ком благоутро́бным, Го́споди, / виждь мое́ смире́ние, / я́ко пома́ле жизнь моя́ иждива́ется, / и от дел несть мне спасе́ния. / Сего́ ра́ди молю́ся: / о́ком благоутро́бным, Го́споди, / виждь мое́ смире́ние и спаси́ мя.
Слава: Век мой скончава́ется, / и стра́шный Твой престо́л гото́вится, / житие́ мое́ мимохо́дит, / суд мене́ ждет, претя́ мне о́гненною му́кою, / и пла́менем негаси́мым. / Слез ту́чу пода́ждь ми и угаси́ его́ си́лу, / хотя́й спасти́ся всем челове́ком.
И ныне: И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть, / и воскресе́ние явле́й, я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве, / приими́ ро́ждшую Тя Богоро́дицу, моля́щуюся за ны, / и спаси́, Спа́се наш, лю́ди отча́янныя.
Таже, Го́споди, поми́луй, 30. И отпуст.
Внегда случится кому искуситися во сне по действу диаволю.
Востав от одра, творит поклоны, глаголя:
Бо́же, ми́лостив бу́ди мне, гре́шному.
Таже начало обычное.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Па́стырю до́брый, ду́шу Твою́ положи́вый о нас, / све́дый сокрове́нная, соде́янная мно́ю, / Еди́не Бла́же, упаси́ мя ра́зумом заблу́ждшаго, / и исхи́ти мя от во́лка, А́гнче Бо́жий, / и поми́луй мя.
Отягче́н сном уны́ния, / помрача́юся пре́лестию грехо́вною: / но да́руй ми у́тро покая́ния, / просвеща́я о́чи мы́сленныя, Христе́ Бо́же, / просвеще́ние души́ моея́, и спаси́ мя.
Мгло́ю грехо́вною и сластьми́ жите́йскими сплета́ем / ум окая́нныя души́ моея́, стра́сти разли́чныя ражда́ет, / и в по́мысл умиле́ния не прихо́дит. / Но уще́дри, Спа́се, смире́ние мое́, / и даждь ми по́мысл умиле́ния, / да и аз спаса́ем пре́жде конца́ воззову́ благоутро́бию Твоему́: / Го́споди Христе́ Спа́се мой, / отча́яннаго спаси́ мя и недосто́йнаго.
Я́ко впады́й в разбо́йники, и уя́звен, / та́ко и аз впадо́х во мно́гия грехи́, / и уя́звена ми есть душа́. / К кому́ прибе́гну пови́нный аз: / то́кмо к Тебе́, милосе́рдому душ Врачу́: / изле́й на мя, Бо́же, вели́кую Твою́ ми́лость.
Слава: Я́ко блу́дный сын, приидо́х и аз, Ще́дре: / приими́ мя, О́тче, возвраща́ющася, / я́ко еди́наго от нае́мник Твои́х, Бо́же, и поми́луй мя.
И ныне, Богородичен: Изба́ви, Богоро́дице, от обдержа́щих нас грехо́в: / я́ко ино́го упова́ния ве́рнии не и́мамы, ра́зве Тебе́, / и от Тебе́ ро́ждшагося Го́спода.
Таже: Го́споди, поми́луй, 40. И поклонов 50, с молитвою: Бо́же, ми́лостив ми бу́ди, и прости́ мя, блу́днаго, за и́мя Твое́ Свято́е.
Па́ки запя́т бых окая́нный умо́м и лука́вым обы́чаем, рабо́тая греху́. Па́ки князь тьмы и стра́стных сла́достей роди́тель, плене́на мя сотвори́, и я́коже раба́ смире́ннаго, того́ хоте́нием, и жела́нием плотски́м рабо́тати принужда́ет мя. И что сотворю́, Го́споди мой, и Изба́вителю, и Засту́пниче, упова́ющим на Тя, а́ще не к Тебе́ па́ки возвращу́ся и постеню́, и ми́лости испрошу́ о соде́янных мно́ю; но бою́ся и трепе́щу, да не ка́ко всегда́ испове́даяся, и отступи́ти злых обещава́яся, и на ки́йждо час согреша́я: и не возда́в моли́твы моея́ Тебе́ Бо́гу моему́, долготерпе́ние Твое́ воздви́гну к негодова́нию. И кто стерпи́т гне́ва Твоего́, Го́споди; ве́дый у́бо мно́жество щедро́т Твои́х, и пучи́ну человеколю́бия Твоего́, па́ки возверза́ю себе́ на ми́лость Твою́, и взыва́ю Ти: е́же согреши́х, прости́. Поми́луй мя, па́дшаго, даждь ми ру́ку по́мощи, в ти́не сласте́й погруже́нному. Не оста́ви, Го́споди, созда́ние Твое́ растли́тися беззако́ньми мои́ми и грехи́ мои́ми, но обы́чным Твои́м милосе́рдием и бла́гостию принужда́ем, изба́ви от ка́ла и скве́рны теле́сныя и стра́стных помышле́ний, оскверня́ющих всегда́ ду́шу мою́ окая́нную: се бо, Го́споди, я́коже зри́ши, несть в ней ме́ста чи́ста, но вся прокази́ся, и все те́ло объя́т я́зва. Сам у́бо, Человеколю́бче, врачу́ душ и теле́с, и ми́лости исто́чниче, очи́сти ту слез мои́х тече́нием, сих излива́я на мя оби́льно: изле́й на мя человеколю́бие Твое́, и даждь ми исцеле́ние и очище́ние, и исцели́ сокруше́ние мое́, и не отврати́ лица́ Твоего́ от мене́, да не я́коже вещь, поя́ст мя отча́яния огнь, но я́коже рекл еси́, нело́жный Бо́же, я́ко ве́лия ра́дость быва́ет на небеси́ о еди́ном гре́шнице ка́ющемся, сие́ сотвори́ и на мне, гре́шнем, и не затвори́ у́шию благоутро́бия Твоего́, в моли́тве покая́ния моего́, но отве́рзи их, и я́ко кади́ло испра́ви ту пред Тобо́ю: ве́си бо не́мощь естества́, Созда́телю, и удо́бь поползнове́ние ю́ности, и тя́жесть те́ла, и презира́еши грехи́, и покая́ние прие́млеши призыва́ющих Тя и́стиною. Я́ко благослови́ся и просла́вися пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Многоми́лостиве, нетле́нне, нескве́рне, безгре́шне Го́споди, очи́сти мя, непотре́бнаго раба́ Твоего́, от вся́кия скве́рны плотски́я и душе́вныя, и от невнима́ния и уны́ния моего́ прибы́вшую ми нечистоту́, со ине́ми беззако́нии мои́ми, и яви́ мя нескве́рна, Влады́ко, за бла́гость Христа́ Твоего́, и освяти́ мя наше́ствием Пресвята́го Твоего́ Ду́ха: я́ко да возбну́в от мглы нечи́стых привиде́ний диа́вольских, и вся́кия скве́рны, сподо́блюся чи́стою со́вестию отве́рсти скве́рная моя́ и нечи́стая уста́, и воспева́ти всесвято́е и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Го́споди Бо́же наш, е́же согреши́х во дни сем сло́вом, де́лом и помышле́нием, я́ко Благ и Человеколю́бец прости́ ми. Ми́рен сон и безмяте́жен да́руй ми. А́нгела Твоего́ храни́теля посли́, покрыва́юща и соблюда́юща мя от вся́каго зла, я́ко Ты еси́ храни́тель душа́м и телесе́м на́шим, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
Го́споди, не лиши́ мене́ небе́сных Твои́х благ. Го́споди, изба́ви мя ве́чных мук. Го́споди, умо́м ли или́ помышле́нием, сло́вом или́ де́лом согреши́х, прости́ мя. Го́споди, изба́ви мя вся́каго неве́дения и забве́ния, и малоду́шия, и окамене́ннаго нечу́вствия. Го́споди, изба́ви мя от вся́каго искуше́ния. Го́споди, просвети́ мое́ се́рдце, е́же помрачи́ лука́вое похоте́ние. Го́споди, аз я́ко челове́к согреши́х, Ты же я́ко Бог щедр, поми́луй мя, ви́дя не́мощь души́ моея́. Го́споди, посли́ благода́ть Твою́ в по́мощь мне, да просла́влю и́мя Твое́ свято́е. Го́споди Иису́се Христе́, напиши́ мя раба́ Твоего́ в кни́зе живо́тней и да́руй ми коне́ц благи́й. Го́споди, Бо́же мой, а́ще и ничто́же бла́го сотвори́х пред Тобо́ю, но даждь ми по благода́ти Твое́й положи́ти нача́ло благо́е. Го́споди, окропи́ в се́рдце мое́м ро́су благода́ти Твоея́. Го́споди небесе́ и земли́, помяни́ мя гре́шнаго раба́ Твоего́, сту́днаго и нечи́стаго, во Ца́рствии Твое́м. Ами́нь.
Го́споди, в покая́нии приими́ мя. Го́споди, не оста́ви мене́. Го́споди, не введи́ мене́ в напа́сть. Го́споди, даждь ми мысль бла́гу. Го́споди, даждь ми сле́зы и па́мять сме́ртную, и умиле́ние. Го́споди, даждь ми по́мысл испове́дания грехо́в мои́х. Го́споди, даждь ми смире́ние, целому́дрие и послуша́ние. Го́споди, даждь ми терпе́ние, великоду́шие и кро́тость. Го́споди, всели́ в мя ко́рень благи́х, страх Твой в се́рдце мое́. Го́споди, сподо́би мя люби́ти Тя от всея́ души́ моея́ и помышле́ния и твори́ти во всем во́лю Твою́. Го́споди, покры́й мя от челове́к не́которых, и бесо́в, и страсте́й, и от вся́кия ины́я неподо́бныя ве́щи. Го́споди, ве́си, я́ко твори́ши, я́коже Ты во́лиши, да бу́дет во́ля Твоя́ и во мне гре́шнем, я́ко благослове́н еси́ во ве́ки. Ами́нь.
Пресвята́я Влады́чице моя́ Богоро́дице, святы́ми Твои́ми и всеси́льными мольба́ми отжени́ от мене́, смире́ннаго и окая́ннаго раба́ Твоего́, уны́ние, забве́ние, неразу́мие, нераде́ние, и вся скве́рная, лука́вая и ху́льная помышле́ния от окая́ннаго моего́ се́рдца и от помраче́ннаго ума́ моего́; и погаси́ пла́мень страсте́й мои́х, я́ко нищ есмь и окая́нен. И изба́ви мя от мно́гих и лю́тых воспомина́ний и предприя́тий, и от всех действ злых свободи́ мя. Я́ко благослове́на еси́ от всех родо́в, и сла́вится пречестно́е и́мя Твое́ во ве́ки веко́в. Ами́нь.
Таже: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Сла́ва, и ны́не: Го́споди, поми́луй, трижды. Го́споди, благослови́, и отпуст:
Го́споди Иису́се Христе́, Боже наш, моли́тв ра́ди Пречи́стыя Твоея́ Ма́тере и всех святы́х, спаси́ мя, гре́шнаго.
Го́споди Бо́же наш, Еди́не Благи́й и Человеколю́бче, Еди́не Святы́й и на святы́х почива́яй, И́же верхо́вному Твоему́ апо́столу Петру́ яви́вый виде́нием, ничто́же скве́рно, или́ нечи́сто мне́ти, от Тебе́ сотворе́нных на пи́щу и в наслажде́ние челове́ком, и сосу́дом Твои́м избра́нным, апо́столом Па́влом вся чи́ста чи́стым запове́давый: Ты Сам, Влады́ко Пресвяты́й призыва́нием стра́шнаго и пречи́стаго Твоего́ и́мене, и зна́мением Честна́го и Животворя́щаго Креста́, благослови́ и очи́сти мя, раба́ Твоего́ (имярек), оскве́рншагося от вся́каго неприя́зненнаго ду́ха, от вся́каго мечта́ния и га́да ядови́таго, от вся́каго беззако́ния и от вся́кия ле́сти, от вся́каго потво́ра и от вся́кия суеты́, и от вся́каго неду́га, и вся́кия я́зи, и от вся́каго проти́внаго злоде́йства диа́воля. И ны́не, недосто́йнаго мене́, раба́ Твоего́ (имярек), сподо́би по Твоему́ милосе́рдию служи́ти пречи́стым Твои́м Та́йнам. И пре́жде очи́сти ми ду́шу и те́ло от вся́кия скве́рны, и оста́ви вся́кое прегреше́ние, во́льное и нево́льное, е́же согреши́х во вся дни живота́ моего́, де́лом, сло́вом и помышле́нием, во дни и в нощи́, и до ны́нешняго часа́. И даждь ми, Го́споди, служе́ние сие́ стра́шное небе́сных Чино́в, и прича́стие пречи́стых Твои́х Та́ин, не в суд, ни во осужде́ние, но в проще́ние грехо́в, и в Ду́ха Свята́го прише́ствие, и живо́т присносу́щныя ра́дости, его́же угото́вал еси́ и́стинным Твои́м служе́бником. Сохрани́ мя, Влады́ко Всеси́льне, от вся́каго греха́ и зло́бы, соблюди́ нескве́рна и непоро́чна от вся́кия прока́зы проти́внаго диа́вола, и даждь ми, Го́споди, служи́ти Тебе́ в преподо́бии и пра́вде до после́дняго дне и часа́ и сконча́ния моего́.
Ты бо еси́ благословля́яй и освяща́яй вся́ческая, Христе́ Бо́же наш, и Тебе́ сла́ву возсыла́ем со Безнача́льным Твои́м Отце́м и с Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.